«ەگەمەن قازاقستان» گازەتىنىڭ ينتەرنەت-سايتىندا الداعى ۋاقىتتا ورىس جانە اعىلشىن تىلىندەگى نۇسقالار ىسكە قوسىلادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالى مالىمدەدى.
بۇگىنگى ۋاقىت جەدەل اقپارات زامانى بولعاندىقتان, گازەتتىڭ ينتەرنەت-سايتىن دامىتۋعا دا ايرىقشا كوڭىل ءبولىنىپ وتىر. نەگىزگى ماقسات – سايتتى جەدەل ءارى سەنىمدى اقپاراتتىق پورتالعا اينالدىرۋ
«گازەتتىڭ ينتەرنەت سايتى باسىلىم ماتەريالدارىنا تاۋەلدى بولماۋى كەرەك. ياعني, سايت گازەتتە جاريالانعان ماقالالاردى كوشىرىپ باسىپ قانا وتىرماۋى ءتيىس. ويتكەنى, گازەتتىڭ ءوز وقىرمانى, ينتەرنەتتىڭ ءوز وقىرمانى بار. سوندىقتان ءبىز دە سايتتىڭ دەربەس جۇمىس ىستەۋىنە ەرەكشە كوڭىل بولە باستادىق. وندا جاريالاناتىن اقپاراتتار لەگىن ارتتىردىق. سايكەسىنشە, ءبىزدىڭ سايتتى وقيتىن وقىرماندار قاتارى دا كوبەيدى. جالپى, ءبىز «ەگەمەننىڭ» سايتى بولاشاقتا اقپارات كەڭىستىگىندە وزىندىك ورنى مەن سالماعى بار, ەڭ سەنىمدى ءارى جىلدام اقپارات تاراتاتىن تولىققاندى ينتەرنەت پورتالعا اينالۋى ءتيىس دەپ سانايمىز. بۇعان قاجەتتى مۇمكىندىكتەر بىزدە بارشىلىق. سوعان بايلانىستى بىرقاتار جوسپارلارىمىز دا بار. اتاپ ايتساق, سايتتىڭ كوزى ناشار كورەتىندەرگە ارنالعان جانە ورىس, اعىلشىن تىلدەرىندە شىعاتىن نۇسقالارىن اشۋ, اۋديو-گازەت قوسىمشالارىن ەنگىزۋ, مۋلتيمەديالىق مۇمكىندىكتەرىن ارتتىرۋ سىندى جۇمىستاردى قولعا الۋدى جوسپارلاپ وتىرمىز», – دەدى باسقارما توراعاسى.
ايدار ورىسباەۆ
