سىر ەلىندە كونستيتۋتسيا كۇنى مەرەكەسىنە وراي 124 وتباسىعا پاتەر بەرىلدى. سالتاناتتى شاراعا وبلىس اكىمى قىرىمبەك كوشەرباەۆ قاتىسىپ, قىزىلوردالىقتاردى مارتەبەلى مەرەكەمەن قۇتتىقتادى. ول: «تاۋەلسىز ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ حالىقتى, سونىڭ ىشىندە كومەككە مۇقتاج ازاماتتاردى قولداۋ جونىندە ارقاشان ايتىپ كەلەدى. كورسەتىلەتىن قولداۋلاردىڭ باستىسى – باسپانامەن قامتاماسىز ەتۋ. بۇل ماقساتتا قابىلدانعان مەملەكەتتىك باعدارلامالار ايماعىمىزدا ءساتتى جۇزەگە اسىپ, بۇگىندە «الاشتىڭ اناسى» اتانعان قاسيەتتى مەكەن قارقىندى قۇرىلىس ايماعىنا اينالدى. ايماقتا الەۋمەتتىك نىسانداردان بولەك, تۇرعىن ۇيلەردىڭ دە كوپتەپ سالىنىپ جاتقانىن ەشكىم جاسىرمايدى. وبلىستا بىلتىردىڭ وزىندە قۇرىلىس كولەمى 3,5 ەسەگە وسسە, ونىڭ ىشىندە قىزىلوردا قالاسىندا اتالعان كورسەتكىش 8 ەسەگە ارتتى», – دەدى. ايماق باسشىسى سونىمەن قاتار, سوڭعى 3 جىلدا قىزىلوردا قالاسى بويىنشا جالپى اۋدانى 265 مىڭ شارشى مەتردى قۇرايتىن, 3,5 مىڭ پاتەرلىك 82 كوپقاباتتى تۇرعىن ءۇيدىڭ قۇرىلىسى جۇرگىزىلگەنىن ايتتى.
وبلىس اكىمىنىڭ سوزىنە سۇيەنسەك, وڭىردە بيىل 80 كوپقاباتتى تۇرعىن ءۇيدىڭ قۇرىلىسى جۇرگىزىلىپ, ءۇش جىلدا قىزىلوردادا جاڭادان 11 شاعىن اۋدان بوي كوتەرگەن. سونداي-اق, بۇگىندە «تۇرعىن ءۇي قۇرىلىس جيناق بانكى» باعدارلاماسى بويىنشا 100 پاتەردەن تۇراتىن 2 ءۇي تاپسىرىلسا, الداعى جەلتوقساندا «اراي-3» شاعىن اۋدانىندا تاعى 200 پاتەرلىك 6 ءۇي پايدالانۋعا بەرىلەدى. جالپى العاندا, وسى جىلدىڭ قورىتىندىسى بويىنشا وبلىستا «ءوز ءۇيىم» باعدارلاماسى اياسىندا 20 مىڭ شارشى مەتردەن استام باسپانا تاپسىرىلادى. بۇل پايدالانۋعا بەرىلىپ وتىرعان تۇرعىن ۇيلەر ەلىمىزدە مەملەكەت تاراپىنان تۇرعىنداردىڭ ءال-اۋقاتىن ارتتىرۋعا جاسالىپ جاتقان قولداۋدىڭ ناقتى كورىنىسى.
بۇگىندە تاسبوگەت كەنتىندەگى امانگەلدى كوشەسىنەن مەملەكەتتىك قىزمەتكەر, قۇقىق قورعاۋ سالاسى, ەل نامىسىن قورعاعان سپورتشىلار مەن مەديتسينا سالاسى قىزمەتكەرلەرىنە ارنالعان 24 پاتەرلىك ءۇي پايدالانۋعا بەرىلدى.
تالعات رايىمبەك
