دوستىق ۇيىندەگى ديدارلاسۋ

وبلىستىق دوستىق ۇيىندە سەمەي يادرولىق سىناق پوليگونىنىڭ (سياسپ) جابىلۋىنا 25 جىل تولۋىنا وراي ارنايى شارا بولىپ ءوتتى. وعان يادرولىق سىناق پوليگونى ار­داگەرلەرى مەن مۇگەدەكتەرى, لوكالدى سوعىسقا قاتىسۋشىلار, مەملەكەتتىك ورگاندار مەن ۇكىمەتتىك ەمەس ۇيىمدار وكىلدەرى قاتىستى. – بيىلعى جىلدى اسا ماڭىزدى بەلەس دەۋگە بولادى. ەلىمىز تاۋەلسىزدىگىنىڭ 25 جىلدىعى قارساڭىندا كوپتەگەن اۋقىمدى شارالار ۇيىمداستىرىلۋدا. سولاردىڭ قاتارىندا سەمەي يادرولىق سىناق پوليگونى جابىلۋىنىڭ 25 جىلدىعى دا بار. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ 1991 جىلدىڭ 29 تامىزىنداعى سياسپ جابۋ تۋرالى جارلىعى اسا ماڭىزدى شەشىمدەردىڭ ءبىرى بولىپ تابىلادى. وسى كۇنى يادرولىق پوليگون  تاريحىندا جاڭا ءداۋىر باستالدى. ەلباسىنىڭ باستاماسىمەن قازاقستان يادروسىز الەم قۇرۋداعى كوشباسشى ەل رەتىندە تانىلدى, – دەپ اتاپ ءوتتى وبلىستىق ىشكى ساياسات باسقارماسىنىڭ باسشىسى ەربول نۇرعاليەۆ. جەرگىلىكتى اتقارۋشى ورگاندار وسى ساناتتاعى ادامداردىڭ قۇقىقتارى مەن مۇددەلەرىن قورعاۋ باعىتىندا بارلىق شارالاردى قولعا الىپ كەلەدى. ەل زاڭنامالارى مەن الەۋمەتتىك قولداۋ باعدارلامالارىندا كوزدەلگەن شارالاردى جۇزەگە اسىرۋعا باعىتتالعان جۇمىستار جۇرگىزىلۋدە. مىسالى, ءماسليحاتتاردىڭ شەشىمدەرىمەن ۇلى وتان سوعىسىنا قاتىسۋشىلار مەن مۇگەدەكتەرىنە تەڭەستىرىلگەن ادامدارعا جەڭىس كۇنى قارساڭىندا اقتوبە قالاسى بويىنشا 32 ايلىق ەسەپتىك كورسەتكىش نەمەسە 67 872 تەڭگە, اۋدانداردا 50 مىڭ تەڭگەدەن وتەماقى تولەندى.   قالالىق ءماسليحات دەپۋتاتتارىنىڭ شەشىمدەرى بويىنشا, 2013 جىلدان بەرى ۇوس قاتىسۋشىلارى مەن مۇگەدەكتەرىنە تەڭەستىرىلگەن ادامدارعا كوممۋنالدىق تولەمدەرگە جىلۋ ماۋسىمى كەزەڭىندە 1,7 اەك (3605 تەڭگە) تولەنەدى, ەلىمىزدەگى ساناتوريلەرگە تەگىن جولدامالار بەرىلەدى. شارا بارىسىندا سياسپ جابىلۋىنىڭ 25 جىلدىعىنا وراي, ارداگەرلەرگە وبلىس جانە قالا باسشىلارىنىڭ العىس حاتتارى تابىستالدى. ساتىبالدى ءساۋىرباي, «ەگەمەن قازاقستان»  اقتوبە وبلىسى