استانانىڭ ىرگەسىندەگى يلينكا ەلدى-مەكەنىندە فرانتسيانىڭ سيمۆولى سانالاتىن «ەيفەل» مۇناراسى بار. ونى كەيبىر ادامدار بىلسە, كەيبىرى بىلە بەرمەيدى. ول ەيفەل مۇناراسىنا ۇقساتىپ 2014 جىلى سالىنعان. مۇنارانىڭ بيىكتىگى – 19 مەتر. ونى جامبىل ەسىمدى ازامات ءوز ءۇيىنىڭ اۋلاسىندا تۇرعىزىپتى.
جامبىل ارىپتەسىمىز راۋان ەسقاليدىڭ دوسى. ەكەۋى 5 جىلدان بەرى ءبىر-ءبىرىن كورمەي, اياق استىنان كوشەدە ءبىر كەزدەسىپ قالعاندا دوسىنا ءۇيىنىڭ اۋلاسىندا «ەيفەل» مۇناراسىن سالىپ قويعانىن ايتادى. جىلت ەتكەن جاڭالىقتى جىبەرمەيتىن جۋرناليست سونى ءوز كوزىمەن كورۋ ءۇشىن يلينكاعا بارىپ, سۋرەتكە ءتۇسىرىپ قايتادى.
جامبىلدىڭ ايتۋىنشا, ول پاريجگە بارىپ كەلگەننەن كەيىن ەيفەل مۇناراسىنا ۇقساس مۇنارانى ءوز اۋلاسىندا سالعىسى كەلگەن. سودان ءارى ويلانىپ, بەرى ويلانىپ, 2014 جىلدىڭ ماۋسىم ايىندا مۇرانانىڭ قۇرىلىسىن باستاپ, ەكى ايدا سالىپتى. قازىر يلينكاداعى ەيفەل مۇناراسىنان اينالاداعى بارلىق نارسە كورىنەدى. ونىڭ بيىكتىگى 6 قاباتتى ۇيمەن بىردەي. وسى مۇنارانى سالعاننان كەيىن جامبىلدىڭ ۇيىنە كەلىپ, مۇنارانى تاماشالۋشىلار كوبەيەدى. سولاردىڭ ءبىرى - ۇيالى بايلانىس كومپانيالارىنىڭ وكىلدەرى جامبىلدىڭ ۇيىندەگى 19 مەتر مۇنارانى ەستىپ, ۇيدىڭ يەسىنەن ۇيالى بايلانىس قۇرالدارىن ورناتۋدى وتىنەدى. ولار مۇناراعا بايلانىس جابدىقتارى ورناتىلسا ۇيالى بايلانىس بەلگىسىنىڭ 5 كم راديۋسكە تەز تارايتىنىن ايتىپ قويمايدى. ءسويتىپ, جامبىلعا ءوتىنىش جاساپ, اقىرى ەكى جاق كەلىسەدى. ارينە, ءۇيدىڭ يەسى مۇنارانىڭ جوعارعى جاعىن تەگىنگە بەرمەيدى. قازىر ۇيالى بايلانىس وپەراتورلارى جامبىلعا ارەنداعا اقشا تولەيدى.
«فرانتسيانىڭ سيمۆولى سانالاتىن «ەيفەل» مۇناراسى الماتىدا دا بار. ول 2009 جىلى سالىنعان. قازىر ول تۋريستەر ەڭ كوپ سۋرەتكە تۇسەتىن جانە تاماشالايتىن جەرگە اينالعان. سوندىقتان دا استانادا دا وسىنداي ءبىر مۇنارا بولسا ارتىق ەتپەيدى. ول كەلەسى جىلى ەكسپو كورمەسى كەزىندە دە تۋريستەر تاماشالايتىن جەر بولۋى مۇمكىن», دەيدى راۋان ەسقالي.
داستان كەنجالين
فوتو: راۋان ەسقالي
