ەلباسى حالىقارالىق كونفەرەنتسيا وتىرىسىنا قاتىستى

مەملەكەت باسشىسى «يادرولىق قارۋسىز الەم قالىپتاستىرۋ» اتتى حالىقارالىق كونفەرەنتسيانىڭ پلەنارلىق وتىرىسىنا قاتىستى. بۇل تۋرالى akorda.kz حابارلادى. سەمەي يادرولىق پوليگونىنىڭ جابىلعانىنا 25 جىل تولۋىنا وراي وتكەن كونفەرەنتسيا جۇمىسىنا مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, ديپلوماتيالىق كورپۋستىڭ, عىلىم مەن ءبىلىم سالاسىنىڭ وكىلدەرى, كورنەكتى قوعام قايراتكەرلەرى, سونداي-اق الەمنىڭ 50-دەن استام ەلىنەن شەتەلدىك قوناقتار قاتىستى. ەلباسى كونفەرەنتسياعا قاتىسۋشىلارعا ارناعان سوزىندە جاھاندىق بەيبىتشىلىك پەن قاۋىپسىزدىك ءۇشىن قازاقستان پرەزيدەنتى سىيلىعىن تاعايىنداۋ تۋرالى كوتەرىلگەن باستاماعا ريزاشىلىعىن ءبىلدىردى. «جالپى, مەن بۇل باستامانى قولدايمىن. مۇمكىن ونى يادرولىق قارۋسىزداندىرۋ ءۇشىن بەرىلگەن سىيلىق دەپ اتاعان ءجون بولار, ونىڭ اتاۋىن قايتا ويلاستىرۋ قاجەت. ءبىز اقىلداسىپ, بۇل سىيلىقتى تاعايىنداۋ تۋرالى شەشىم قابىلدايتىن بولامىز», – دەدى قازاقستان پرەزيدەنتى. مەملەكەت باسشىسى 1991 جىلعى 29 تامىزدا ەلىمىز ءۇشىن دە, بۇكىل الەم ءۇشىن دە تاريحي ماڭىزدى وقيعا بولعانىن اتاپ ءوتتى. «شيرەك عاسىر بۇرىن ءبىزدىڭ جەرىمىز بەن حالقىمىزعا 40 جىلداي ازاپ تارتقىزعان ءميليتاريزمنىڭ ەڭ سۇراپىل سىناعى زاڭدى تۇردە توقتاتىلدى. ءبىزدىڭ شەشىمىمىزدەن كەيىن بارلىق جەتەكشى يادرولىق دەرجاۆالاردىڭ پوليگوندارىنىڭ ءۇنى شىقپاي قالدى, الايدا ولاردىڭ ەشقايسىسى ءالى كۇنگە دەيىن جابىلعان جوق. قازاقستان – مۇنداي قادامعا بارعان العاشقى ەل. ءبىزدىڭ حالقىمىزدىڭ قالاۋى سولاي بولدى. بۇل وقيعانىڭ بارشا الەم ءۇشىن ماڭىزدىلىعى وسىندا», – دەدى نۇرسۇلتان نازارباەۆ. قازاقستان پرەزيدەنتى شيرەك عاسىر ىشىندە ءبىزدىڭ رەسپۋبليكامىز بەيبىتشىلىككە, يادرولىق قارۋدان ازات بولۋعا باستايتىن ءتيىمدى مودەلدى قالىپتاستىرا العانىن ايتىپ, ونى بارلىق ەلدە قولدانۋ جونىندە ۇسىنىس جاسادى. مەملەكەت باسشىسى يادرولىق قارۋ ارقىلى ءوزىن-ءوزى جويۋ قاۋپىن ازايتۋعا جانە بەيبىتشىلىكتى بىرتە-بىرتە دەميليتاريزاتسيالاۋعا باعىتتالعان بىرقاتار ۇسىنىستار ايتا كەلىپ, مۇنىڭ حالىقارالىق قارىم-قاتىناستا تەرەڭ مەنتالدى وزگەرىستەردى, كوپتاراپتى جاڭا ساياسي شەشىمدەردى, جوعارى دەڭگەيدەگى سەنىمدى قاجەت ەتەتىنە نازار اۋداردى. سوڭىندا نۇرسۇلتان نازارباەۆ كونفەرەنتسياعا قاتىسۋشىلار ايتقان ۇسىنىستار بۇكىل الەمدەگى ساياساتكەرلەر مەن عالىمداردىڭ قۇلاعىنا جەتەرىنە سەنىم ءبىلدىرىپ, جينالعانداردىڭ جۇمىسىنا جەمىس تىلەدى. سونداي-اق, ءىس-شارا بارىسىندا كۇن تارتىبىندەگى ماسەلەلەر بويىنشا حالىقارالىق ۇيىمدار مەن شەت ەل ۇكىمەتتەرى وكىلدەرى بايانداما جاسادى. ايدار ورىسباەۆ