ماسكەۋدە ورىن العان ورتتەن قىرعىز جۇمىسشىلارى زارداپ شەكتى

ماسكەۋدىڭ سولتۇستىك-شىعىسىنداعى باسپاحانا قويماسىندا ورىن العان ءىرى ءورتتىڭ سالدارىنان 17 ادام قازا تاپتى. بۇل تۋرالى Euronews حابارلادى. ءورت سوندىرۋشىلەر ءورتتى ءسوندىرۋ كەزىندە ونداعى سىرتقا جولى جابىلىپ قالعان باسپانالاردىڭ بىرىنەن 16 ادامنىڭ دەنەلەرىن تاپتى. ءتورت ادام بىردەن اۋرۋحاناعا جونەلتىلدى. دارىگەرلەر ولاردىڭ اراسىنداعى ءبىر ايەلدىڭ ءومىرىن ساقتاپ قالا المادى. تاعى ءبىر زارداپ شەگۋشى وتە اۋىر حالدە جاتىر. تەرگەۋدىڭ الدىن الا مالىمەتى بويىنشا, ورتكە باسپاحانا عيماراتىندا ورىن العان ەلەكتر سىمدارىنىڭ قىسقا تۇيىقتالۋى سەبەپ بولعان. وت ءتورت قاباتتى ءۇيدى بىردەن قامتىعان. قازا تاپقان جۇمىسشىلاردىڭ ءبارى قىرعىزستان ازاماتتارى بولىپ شىقتى. قالا بيلىگى ولاردىڭ جانىپ كەتكەن كاسىپورىندا زاڭدى تۇردە جۇمىس جاساعاندارىن ايتادى. سونىمەن بىرگە, قايعىلى وقيعا ورنىنا كەلگەن ماسكەۋدەگى قىرعىز دياسپوراسىنىڭ وكىلدەرى قازا تاپقانداردىڭ ءبىرىنىڭ جاسى ءالى 16-دا ەكەنىن جەتكىزدى. مۇرات ايتقوجا