مۋتكو ماكلارەن بايانداماسى وتىرىكتەن قۇرالعانىن مالىمدەدى

رەسەيدىڭ سپورت ءمينيسترى ۆيتالي مۋتكو ريچارد ماكلارەن باستاعان WADA كوميسسياسى بايانداماسىنىڭ زاڭدىق جاعىنان تۇككە تۇرعىسىز ەكەنىن مالىمدەدى. بۇل تۋرالى ريا «نوۆوستي» حابارلادى. «ءبىز بۇل بايانداما بويىنشا ءوز تۇجىرىمدارىمىزدى جاساپ, حالىقارالىق وليمپيالىق كوميتەتكە WADA جونىندەگى پىكىرىمىزدى جەتكىزەمىز. شىعاتىن قورىتىندا بىرەۋ – ول قولدان وتىرىك جاسالعان. ونىڭ زاڭدىق جاعىنىڭ ەشقانداي دا كۇشى جوق», - دەدى مۋتكو «ماتچ تۆ» ەفيرىندە سويلەگەن سوزىندە. ونىڭ ايتۋىنشا, سپورت مينيسترلىگى وسى فاكتىلەرگە بايلانىستى ازاماتتىق سوتتارعا شاعىم جاسايدى, ال بايانداما اۆتورلارى قىلمىستىق جاۋاپتارعا تارتىلادى. «ءبىز سونداي-اق سىناما اۋلاسى ءۇشىن بانك جۇرگىزگەن شۆەيتساريا كومپانياسىنىڭ باسشىلىعىنا دا شىعامىز. ءبىز ونىڭ الىنعان ءونىم جونىندە جۇرت الدىندا باعا بەرۋلەرىن قالايمىز», - دەدى بۇدان ءارى مينيستر. ال ماكلارەننىڭ بايانداماسىندا رەسەيدە وڭ دوپينگ-سىنامالاردى جاسىرىپ وتىراتىن مەملەكەتتىك جۇيە بار ەكەنى اتاپ كورسەتىلگەن بولاتىن. وسى زەرتتەۋدىڭ نەگىزىندە WADA رەسەي قۇراماسىن تولىق قۇرامىندا ريو-دە-جانەيروداعى وليمپيالىق ويىنداردان جانە پارااليمپيالىق ويىنداردان الاستاۋدى ۇسىنعان. ناتيجەسىندە حوك-ءتىڭ اتقارۋ كوميتەتى جەڭىل اتلەتتەردى ويىندارعا جىبەرۋ قۇقىعىن حالىقارالىق سپورت فەدەراتسيالارىنىڭ ەنشىسىنە قالدىردى. وسىعان وراي داريا كليشينادان باسقا رەسەي جەڭىل اتلەتتەرى وليمپياداعا جىبەرىلمەي قالدى. دامير قوجامقۇل