اقىننىڭ ماڭگىلىك مەرەيى

ەندى ءبىراز كۇندەردەن كەيىن ۇلى جامبىلدىڭ تۋعانىنا 165 جىل تولادى. سوعان بايلانىستى جەتىسۋ وڭىرىندە اقىن داڭقىن اسقاقتاتۋ ماقساتىمەن بىرقاتار اۋقىمدى شارالار قولعا الىن­دى. اتاپ ايتقاندا, رەس­پۋب­ليكالىق اقىندار ايتىسى مەن وبلىستىق وقۋشىلار ايتىسىن, جىر ءمۇشايراسىن ۇيىمداستىرۋ, مەكتەپتەردە وتكىزىلەتىن تاقى­رىپ­تىق كەشتەرمەن قاتار, 5 سى­نىپتان باستاپ ءاربىر ورەنگە جامبىلدىڭ جىرىن جاتتاتۋ سياقتى مازمۇندى جۇمىستار ورىستەگەن. اقىننىڭ 165 جىلدىعىن اتاپ ءوتۋ دايىندىعىنا وتكەن جىل­دان باستاپ-اق قىزۋ كىرىسكەن جەرلەستەرى اۋەلى ونىڭ مۇراجاي عيماراتى مەن كەسەنەسىن ءجون­دەۋدى ويلاستىرىپ ەدى. وبلىس اكى­مىنىڭ تىكەلەي تاپسىرماسىمەن جۇزەگە اسىرىلعان بۇل جۇمىس­تىڭ تياناعى تۋرالى جامبىل مۇراجايىنىڭ ديرەكتورى ءماۋ­لەن قوجاشەۆ بىلاي دەدى. – مەن وسى مۋزەيگە 1974 جىلى قىركۇيەكتە باس قور ساق­تاۋشى بولىپ قىزمەتكە تۇردىم. سودان بەرى اعىمداعىسى بار, باس­قاسى بار بىرنەشە مارتە ءجون­دەۋ جۇمىستارى جۇرگىزىلسە, ەڭ كوزگە كورىنەرلىگى – اقىننىڭ 150 جىلدىعى قارساڭىندا ورىندال­عان جۇمىستار دەر ەدىم. ەندى, مىنە, وبلىس اكىمى سەرىك ۇمبەتوۆتىڭ قامقورلىعى ناتيجە­سىندە بىلتىرعى قىركۇيەك­تىڭ 1-ىنەن جەلتوقساننىڭ 10-ىنا دەيىنگى ارا­لىقتا جەدەل جوندەلسە دە, وتە ساپالى اتقارىلعان جۇ­مىستارعا بارشا كەلۋشىلەر ءدان ريزا. مۇ­راجايعا قاراستى 7 عيماراتپەن قوسا اقىننىڭ كەسەنەسى, ۇلى كومپوزيتور نۇرعيسا تىلەنديەۆ ەسكەرت­كىشىنىڭ اينالاسى تۇگەلدەي ابات­تان­دىرىلدى. وعان بيۋدجەتتەن 70 ملن.تەڭگەدەن استام قارجى جۇم­سالدى. كۇردەلى ءجون­دەۋ جۇمىس­تارىن اناتولي ريابينين باسقا­راتىن «ال­ماتى اۋىل قۇرىلىس» مەكەمەسىنىڭ ۇجىمى ات­قارسا, قو­سالقى جۇ­مىستارىن «كۇم­بەز» سەرىكتەستىگى جۇرگىزىپ, كەسەنەنىڭ كوركىن كەلتىردى. اتا­مىزدىڭ ارۋاعى دەم بەرگەن بولار, قىسقا مەرزىمدە قى­رۋار ءىس تىندىرىلدى. ءيا, جامبىلدىڭ ەڭ سۇيىكتى ۇلدارىنىڭ ءبىرى قوجاشتىڭ نەمەرەسى ماۋلەن  مۇراجاي تىزگىنىن  قو­لىنا العالى دا وتىز بەس جىلعا جۋىقتاپتى. ونىڭ بىلىكتى باس­شىلىعىمەن ىستەلگەن جۇمىستار از ەمەس. قاي كەزدە كەلسەڭىز دە اينالاسى مۇنتازداي تاپ-تازا. سان الۋان گۇلگە ورانىپ, باعىندا بۇل­بۇل سايراعان مۇراجايدىڭ اۋلا­سىنا كىرگەن ادامنىڭ شىققىسى كەلمەيدى. اقىننىڭ كوزى تىرىسىندە اعاش­تان سالىنعان ءۇيدىڭ  12 بولمە­سىندەگى جادىگەرلەردى تاماشالاپ, 150 جىلدىق مەرەيتويى قار­ساڭىندا 900 شارشى مەتر اۋ­ماعىندا قوسىمشا سالىنعان ءما­جىلىس زالىن ەركىن ارالايتىن كەلۋشىلەردى مۋزەي قىزمەتكەرلەرى قاشان بولسىن قۇشاق جايا قارسى الادى. سوندىقتان دا شىعار, جامبىلعا تاعزىم ەتۋ ءۇشىن جىل سايىن ەڭ كەمىندە 11-12 مىڭ ادام ات باسىن بۇرادى. الەمنىڭ ءار تۇكپىرىنەن اعى­لاتىن اسا مارتەبەلى قوناقتارى دا ۇزىلمەيدى. مۇراجاي ۇجىم­نىڭ 2002 جىلدان بەرى وبلىس­تاعى 22 مۇراجاي اراسىنداعى ءوزارا باسەكەدە «التىن ساپا» بەلگىسىنە تۇراقتى يە بولعانى جارقىن جەتىستىكتىڭ ءبىرى دەۋگە بولار. جامبىل دەگەن ءسوزدىڭ توركى­نىن قامال دەپ ۇعىنامىز. ول راسىندا, حالقىنا قامال بولا ءبىلدى. وتىزىنشى جىلدارداعى اشارشىلىق پەن الاساپىران قۋ­عىن-سۇرگىن كەزىندە ەلىنىڭ رۋ­حىن ساقتاپ قالدى. جانتالاسقان سوعىستا, جان-جاعىنان جاۋى انتالاپ جەتكەندە, نەۆا وزەنى بو­يىنداعى كەشەگى لەنينگرادتى شىنايى قامالعا اينالدىرعان دا جامبىلدىڭ جالىندى ولەڭى بولاتىن. ونىڭ ءاربىر شۋماعى قورشاۋداعى ەلگە دەم بەردى, وق بولىپ اتىلدى, سنارياد بولىپ جارىلدى. ميلليون جول ولەڭدى جا­دىنا تۇتىپ, جاتقا ساپىراتىن داستاندارىن تىڭداعان ادەبيەت ساراپشىلارى توقساننان اسقان قۇدىرەتتى اقىننىڭ دارىنىنا ءشۇباسىز باس يگەن كۇندەردەن بەرى دە 70 جىلدان اسىپتى. الەم ءالى جامبىلدىڭ قۇپياسىنا تامسانۋمەن كەلەدى. الاشىن جىرىنا قوسىپ, تاتۋلىقتى تۋ ەتكەن قاتاعانمەن ايتىسىن ءالى كۇنگە جىرسۇيەر قاۋىم بوي­تۇمارداي باعالايتىنىن دا ايتپاي كەتۋ ابەستىك. قازاقتىڭ ءتول­قۇجاتىنداي بولعان ونىڭ مارتەبەسى قاشان دا جوعارى. كۇمىسجان بايجان. الماتى وبلىسى.