استانا قالاسىنداعى «ازىرەت سۇلتان» مەشىتى جاڭا وقۋ جىلى الدىندا ەلورداداعى الەۋمەتتىك جاعدايى تومەن وتباسىلارعا قۋانىش سىيلادى. مەشىت اشىلعالى بەرى جەلىسى ۇزىلمەي ۇيىمداستىرىلىپ كەلە جاتقان «مەكتەپكە جول» اكتسياسى اياسىندا بيىل دا وتكىزىلىپ, ءبىلىم ىزدەگەن بۇلدىرشىندەردىڭ تالابىنا قولداۋ تانىتتى.
«مەكتەپكە جول» اكتسياسى مارەسىنە جەتىپ, «ازىرەت سۇلتان» مەشىتىندە ارنايى تابىستاۋ ءراسىمى بولدى. استانا قالاسىنداعى جاعدايى تومەن, الەۋمەتتىك از قامتىلعان, كوپ بالالى, سونداي-اق اسىراۋشىسىنان ايىرىلعان وتباسىلارعا كومەك رەتىندە ۇيىمداستىرىلعان ءىس-شارادا 221 وقۋشىعا قاجەتتى قۇرال-جابدىقتار سالىنعان سومكە سىيعا بەرىلدى جانە مەكتەپ فورماسىن الۋ ءۇشىن قارجىلاي كومەك كورسەتىلدى. يگى شارادا ءسوز سويلەگەن «ازىرەت سۇلتان» مەشىتىنىڭ باس يمامى سەرىكباي ساتىبالدى ۇلى يسلام دىنىندەگى وقۋ-ءبىلىمنىڭ ورنى جايلى ايتا كەلە, بالالاردى وقۋدا وزات بولۋعا شاقىردى.
بىلىمگە قۇشتار جاس بۇلدىرشىندەرگە قۋانىشىن شارىقتاتىپ, شاتتىققا بولەگەن بۇل اكتسيادا جالپى قۇنى 3 757 000 تەڭگە جۇمسالدى.
ايان ءابدۋالي
فوتو: muslim.kz
