ريو وليمپياداسىنىڭ قولا جۇلدەگەرى الەكساندر زايچيكوۆتى وبلىس اكىمى قىرىمبەك كوشەرباەۆ قابىلداپ, حالىقتىڭ جانە ءوزىنىڭ اتىنان قۇتتىقتادى. سونىمەن قاتار, اۋىر اتلەتشىگە Toyota Land Cruiser اۆتوكولىگىنىڭ كىلتىن تابىستادى.
«وليمپيادادا سەن تەك زىلتەمىردى كوتەرىپ قانا قويعان جوقسىڭ, بۇكىل قازاقستاندىقتاردىڭ رۋحىن اسقاقتاتتىڭ. الەكساندردىڭ كەلەسى مەدالى التىن بولاتىنىنا سەنەمىن. ءبىز ساعان الداعى جارىستارعا, اسىرەسە توكيودا وتەتىن وليمپياداعا دايىندىق ءۇشىن بارلىق جاعدايدى جاساۋعا ءازىرمىز. سونىمەن قاتار, باتىر ۇلدى تاربيەلەپ, وسىرگەن اناسىنا زور العىس ايتامىز», – دەدى وبلىس اكىمى.
مۇنان سوڭ الەكساندر زايچيكوۆ وليمپيادا كەزىندە جانكۇيەر بولىپ, قولداۋ كورسەتكەن قازاقستاندىقتارعا, اسىرەسە جەرلەستەرىنە ۇلكەن العىسىن جەتكىزدى. ول: «مەن ريودا ءجۇرىپ قازاقستان حالقىنىڭ قولداۋ بىلدىرگەنىن سەزىندىم. قىزىلوردالىقتار تاڭعى 4-تە جينالىپ, مەنىڭ ونەرىمدى تاماشالاعاندارىن بىلەمىن. سىزدەردىڭ قولداۋلارىڭىز ماعان كۇش بەردى», – دەدى. كەزدەسۋ سوڭىندا ايماق باسشىسى اۋىر اتلەتشىنىڭ باپكەرىنە 5 ملن. تەڭگەنىڭ سەرتيفيكاتىن تاپسىردى.
تالعات رايىمبەك
