زاماناۋي زاۋىت

ەۋروپالىق ستاندارتقا ساي اليۋميني بۇيىمدارىن وندىرەدى زامان تالابىنا ساي جاس بۋىن وكىلدەرى شەتەلدەرگە بارىپ, ءبىلىم الىپ ەلگە ورالىسىمەن وتاندىق ءونىم ءوندىرۋدى جەدەل جۇزەگە اسىرا باستاعانى قۋانتادى. بۇل ءۇردىس جەتىسۋ جەرىندە دە جىلدام جۇزەگە اسىرىلۋدا. ەڭ باستىسى, ساپاعا باسا نازار اۋدارىلادى. «وسى سەرىكتەستىكتىڭ بيزنەس جوباسىن 2013 جىلى ءوزىم جاساپ, اراعا ەكى جىل ۋاقىت سالىپ زاۋىتتى ىسكە قوسۋ مۇمكىندىگىنە يە بولدىق. سول ۋاقىتتان بەرى ءوندىرىس ورنى توقتاۋسىز جۇمىس ىستەپ كەلەدى. بۇگىنگى تاڭدا 120 ادام ەڭبەك ەتەدى. قاجەتتى شيكىزاتتى پاۆلودارداعى قازاقستان ەلەكتروليز زاۋىتىنان الامىز. كادىمگى كىرپىش ىسپەتتى ارقايسىسى 20-50 كيلولىق قۇپ-قۇرعاق «شۋشكا» دەپ اتالاتىن شيكىزاتتى الىپ, بالقىتىپ, «بيلەت» دەگەن قوسىندىنى قوسامىز. ديامەترى – 203 مم جانە 152 مم ۇزىندىعى – 6 مەتر. بىراق, پاۆ­لو­داردان كەلگەن شيكىزاتتىڭ ىشىندەگى ماگني مەن مارگانەتستى ەرى­تۋ ارقىلى بولەمىز. حيميالىق قۇرا­مى ەۋروپالىق ستاندارت بويىنشا 6063, 6463, 6060 بولادى. جالپى, سالا وندىرىسىندە اليۋميني ءپروفيلىن ءوندىرۋ ارقىلى انودتى وكسيد دەگەن جاڭا تەحنولوگيامەن ءتۇسىن وزگەرتەمىز. سوندا ءبىزدىڭ ءونىم بارلىق تالاپ بويىنشا ەۋروپالىق ستاندارتقا سايكەس كەلىپ وتىر. ەكولوگيالىق تۇرعىدان تەكسەرگەندە پلاستيكتە زيان بار ەكەندىگى, ال اليۋمينيدە جوقتىعى انىقتالعان. بۇگىندە ەۋروپا مەملەكەتتەرىندە ءاليۋمينيدى قايتا وڭدەۋ ءتاسىلى بار. مىسالعا, ءوندىرىس ورىندارىندا جاسالعان اليۋميني ونىمدەرى تالاپقا سايكەس كەلمەي جاتسا, سول ءونىمدى قايتا وڭدەپ بالقىتۋعا بولادى», دەدى «Aluminium of Kazakhstan» جشس باس ديرەكتورى نۇرسۇلتان جۇمابەك. يندۋستريالىق-يننوۆا­تسيا­لىق دامۋ مەملەكەتتىك باعدار­لا­ما­سى اياسىندا ارنايى ۇيىم­داس­تىرىلعان تەلەكوپىردە ەلباسىنىڭ رۇقساتىمەن «Aluminium of Kazakhstan» جشس اليۋميني پروفيلدەرىن شىعارۋ زاۋىتى ىسكە قوسىلعانى ءمالىم. قازىرگى ۋاقىتتا بۇل ءوندىرىس ورنى HOFFMANN Aluminium ساۋدا تاڭباسىمەن جوعارى تەحنولوگيامەن تولىق كەزەڭدى اليۋميني پروفيلدەرىن ءوندىرۋشى زاۋىت بولىپ تابىلادى. اليۋميني پروفيلدەرىن شىعارۋ زاۋىتى قۇيۋ تسەحى مەن 1540 جانە 2400 توننالىق باسپاقتان, وعان قوسا ۇنتاقتى بوياۋ مەن انودتاۋ تىزبەگىنەن قۇرىلعان. جالپى اۋماعى 14 000 شارشى مەتر. زاۋىت تەحنولوگيالىق ءۇردىسى باستاپقى كەزەڭدەگى ءاليۋمينيدى قايتا وڭدەۋ جولىمەن 1000-نان اسا ءارتۇر­لى اليۋميني پروفيلدەرىن ەۋرو­پا­لىق ستاندارتقا ساي شىعارا­دى. زاۋىتتىڭ جوبالىق قۋاتى جى­لىنا – 16400 توننا. زاۋىت قىز­مەت­كەرلەرى تۇركيا جانە قازاقستان رەسپۋبليكاسىنىڭ جوعارى كاسىبي ينجەنەر-تەحنولوگ ماماندارىنان قۇرالعان. زاۋىت ىسكە قوسىلعاننان بەرى 1500 تونناعا جۋىق اليۋميني بۇيىمدارىن ءوندىردى. نۇربول الدىباەۆ, «ەگەمەن قازاقستان» الماتى وبلىسى, ىلە اۋدانى