العا سۇيرەگەن ءبىر ءۇمىت

مەن ۇزاق جىل اتامەكەنىمنەن جىراقتا ءجۇردىم. وزبەكستاننىڭ ناۋاي وبلىسىندا تۋىپ-ءوسىپ, وسى وب­لىستاعى قازاق تىلىندە وقى­تاتىن ورتا مەكتەپتە ءبىلىم الدىم. 1983 جىلى ن.ۆ. گوگول اتىن­داعى قىزىلوردا پەداگوگيكا ينس­تيتۋتىنىڭ فيلولوگيا فاكۋل­تەتىن قازاق ءتىلى مەن ادەبيەتى ءپانى­نىڭ مۇعالىمى ماماندىعى بو­يىنشا ءبىتىردىم. سودان 2005 جىلعا دەيىن وزبەكستاننىڭ  ناۋاي وبلىسىنداعى ورتا مەكتەپ­تەردە وقىتۋشى, قازاق تىلىندە شىعاتىن اۋداندىق  «كەنيمەح تاڭى» گازەتىندە ءتىلشى قىزمەتتەرىن اتقار­دىم. وسى جىلدار ارالىعىندا ءتۇرلى تاقىرىپتاعى ولەڭ, ماقالا­لارىم رەسپۋبليكالىق باسىلىم­داردا جاريالانىپ تۇردى. ءاسى­رەسە, «التىن بەسىك» جۋرنالىندا «الەم قازاقتارى سىر شەرتەدى» ايدارىمەن جارىق كورگەن  «قال­داش جىراۋ» اتتى ماقالام مەنىڭ اتامەكەنگە  جەتسەم دەگەن تال­پىنى­سىمدى كۇشەيتىپ, كوڭىلىمە قانات بەرگەنى ءالى ەسىمدە. سول جۋر­­نالدى قولىما الىپ, ءوز ماقا­لامدى قادالىپ وقىعان ساتتەگى قۋا­نىشىم, اتاقونىسىما دەگەن  ساعى­نىشىم, تۋعان تىلىمە دەگەن ءسۇيىس­پەنشىلىگىم – ارمانعا تولى جىر شۋماقتارىمنىڭ ارقاۋىنا اينالدى. 2005 جىلى اتاجۇرتقا قونىس اۋدارىپ, جامبىل وبلىسىنىڭ جامبىل اۋدانىنداعى ورتا مەك­تەپكە ۋاقىتشا  جۇمىسقا قا­بىلداندىم. بوس ورىن بول­ماعاندىقتان, ءبىر جىلدان سوڭ  جۇمىستان شىعىپ قالدىم. وسى وبلىستاعى ءبىلىم وردالارىنىڭ بىرىندە تاعى ءبىر جىلعا جۋىق ءوز ءپانىم بويىنشا ءدارىس بەردىم. قىسقاسى, ەكى-اق  جىل ۇستازدىق ەتىپپىن. ءيا, جىلدار جىلجىپ وتە بەردى. جۇمىسسىزدىق جانىما باتتى. «الدامشى ەلەس سىقىلدى  ءۇمىت قۋىپ» دەپ قاسىم اقىن ايتقانداي, جۇمىسسىز جۇرگەن كۇندەرىمە, جىلدارىما ءىشىم اشيدى, وكىنەمىن. جۋىردا گازەتتەن «جۇمىسپەن قامتۋدىڭ جول كارتاسى-2020» باعدارلاماسى  بويىنشا ءوڭتۇس­تىكتەن سولتۇستىككە قونىس اۋدارۋ­شىلار  تۋرالى وقىپ, ءبىلدىم. مەن دە سولتۇستىك قازاقستان وب­لىسىنا بارۋ ماقساتىندا ت­اراز قالاسىنداعى جۇمىسپەن قام­تۋ بولىمىنە ءوتىنىش جازىپ, ءتيىستى قۇجاتتاردىڭ كو­شىر­مەلەرىن تاپسىرعان ەدىم. ءبى­راق سولتۇستىكتەن ءالى حات-حا­بار جوق. تەلەفون ارقىلى ءتىل­دەسكەنىمىزدە «بوس جۇمىس ورىندارىن ىزدەستىرۋدەمىز, ءسىزدىڭ تۇيىندەمە, ساۋالنامالارىڭىزدى ءتيىستى ورىندارعا جولدادىق», دەدى ولار. «قيمىلداعان قىر اسار» دە­مەكشى, ءوزىم دە بەكەر جاتپاي, ءوز كاسىبىم بويىنشا جۇمىسقا ورنالاسسام دەگەن وي-ارمانىمدى قاعازعا ءتۇسىرىپ, سولتۇستىكتەگى قازاق تىلىندە شىعاتىن باسى­لىم­داردىڭ بىرىنە جولدادىم. اۋداندىق گازەتتەردەن, ءبىلىم وردالارىنان بوس جۇمىس ورىن­دارى تابىلىپ قالار دەگەن وي قولىما قالام العىزدى. «وسىنداي مامان قاجەت ەدى» دەپ ەشكىم حابارلاسپاسا دا, ءۇمىتىمدى ۇزگىم كەلمەيدى, كەلەر كۇندەرگە سەنىممەن قارايمىن. ويتكەنى,  «جۇمىسپەن قامتۋدىڭ جول كارتاسى-2020»  باعدارلاماسى – ماعان بەرىلگەن ءبىر مۇمكىندىك, العا سۇيرەگەن ءبىر ءۇمىت. ىشكى كوشى-قون ماسەلەسىمەن شۇعىلدانۋشىلارمەن وي ءبولىس­كەنىمدە, ولار «وسى باعدارلاما ارقىلى ءوز كاسىبىڭىز بويىنشا جۇمىسقا ورنالاساتىندىعىڭىزعا سەنە بەرىڭىز», دەگەن ەدى. لايىم سولاي بولعاي! قۇتتىمۇرات رامان ۇلى جامبىل وبلىسى, ءشولدالا اۋىلى