تايلاندقا ساپار تابىستى ءوتتى

ەلوردامىزدا حالىقارالىق مامان­دان­دىرىلعان كورمە وتكىزۋ كۇنى جاقىنداعان سايىن وسى ءبىر جاھاندىق شاراعا بايلانىستى كەلىسسوزدەر دە كەڭەيە تۇسۋدە. ۇستىمىزدەگى جىلدىڭ 8-9 تامىزى كۇندەرىندە «ەكسپو-2017»-ءنىڭ كوميسسارى ءراپىل جوشىباەۆ تايلاند كورولدىگىندە بولىپ, بىرقاتار كەزدەسۋلەر وتكىزدى. ساپار بارىسىندا, ءراپىل جوشىباەۆ تايلاند ەنەرگەتيكا مينيسترلىگىنىڭ تۇراقتى حاتشىسى – ەكسپو-2017 كورمەسىندەگى تاي­لاند سەكتسياسىنىڭ ۇلت­تىق كوميسسارى ارەەپونگ بحو­وچاووممەن, بۇۇ باس حاتشى­سىنىڭ ورىنباسارى – ەسكاتو-نىڭ اتقارۋشى حاتشىسى شامشاد احتارمەن, تايلاند ەلىنىڭ ىسكەر توپتارىمەن جانە ەلدىڭ جەتەكشى باق وكىلدەرىمەن كەزدەستى. ەنەرگەتيكا مينيسترلىگىندە ءوت­كەن كەزدەسۋ بارىسىندا ەكى ەل ارا­سىنداعى ەكونوميكالىق جانە ەنەرگەتيكالىق ىنتىماقتاستىق جانە تايلاندتىڭ استاناداعى ەكسپو-2017 كورمەسىنە قاتىسۋ ماسەلەلەرى تىلگە تيەك ەتىلدى. ءراپىل جوشىباەۆ ءوز سوزىندە كورمەگە حالىقارالىق قاتىسۋشىلاردى تارتۋ جانە ەلورداداعى كورمەنى وتكىزۋگە دايىندىق شارالارى بويىنشا اتقارىلىپ  جاتقان جۇ­مىس­تارعا توقتالدى. ءوز كەزە­گىندە, تايلاندتىڭ ۇلتتىق كوميس­سارى ا.بحووچاووم ءوز ەلى­نىڭ ەكسپو-2017 كورمەسىنە قاتى­سا­تىندىعىن تاعى دا قۋاتتاپ, كورمەگە «جاسىل» ەنەرگەتيكا سالاسىندا ات­قارىلعان جەتىستىكتەردىڭ جەتكى­زى­لەتىندىگىن ايتتى. تاي­لاند ەلى 2021 جىلعا دەيىن بالا­مالى ەنەرگيا كوزدەرى ارقىلى الىناتىن ەنەرگەتيكا ۇلەسىن 25 پايىزعا جەتكىزۋدى بەلگىلەپ وتىر. بۇل ەل بالامالى ەنەرگەتيكا كوزى رەتىندە بيوماسسالاردى پاي­دالانۋدا باي تاجىريبە جيناق­تاپ, بيوماسسالاردى ەنەرگيا كوزى­نە اينالدىرۋ بويىنشا ازيا – تىنىق مۇحيتى ايماعىندا كوشباسشىلىققا قول جەتكىزدى. تاراپتار سونىمەن بىرگە, قازاقستان جانە تايلاند ەلدەرى اراسىندا ديپلوماتيالىق قاتىناستىڭ ورناتىلۋىنا 25 جىل بولاتىن جىلى ەكىجاقتى ىنتىماقتاستىقتا جاڭا سەرپىندى قادامدارعا قول جەتكىزىلەتىن­دىگىن اتاپ كورسەتتى. وسى رەتتە, ەكسپو-2017 كورمەسى شەڭبەرىندە وتكىزىلەتىن ۇلتتىق كۇنگە وراي­لاس تايلاند كورولدىك وت­با­سى مۇشەلەرىنىڭ استاناعا ار­نايى ساپارىن ۇيىمداستىرۋ ءمۇم­كىن­دىكتەرى دە قاراستىرىلدى. كەلىسسوز قورىتىندىسى بو­يىن­شا, تاراپتار كوميسسار ا.بحووچاوومنىڭ ۇستىمىزدەگى جىلعى 19 تامىزدا تايلاندتىڭ ەكسپو-2017 كورمەسىنە قاتىسۋى جونىندەگى شارتقا قول قويۋ ءۇشىن استانا قالاسىنا ساپارىن ۇيىم­داس­تىرۋ تۋرالى كەلىسىمگە قول جەتكىزدى. تايلاند ەلوردادا وتەتىن ەكسپو-2017 كورمەسىنە قاتىسۋىن رەسمي تۇردە بەكىتكەن 96-شى مەملەكەت بولىپ تابىلدى. تايلاند ەلىنىڭ كورمەدەگى پاۆيلونىنىڭ جالپى كولەمى 734 شارشى مەتردى قۇرايدى. كورولدىك سوڭعى جىلدارى وتكىزىلىپ كەلە جاتقان ەكسپو كورمەسىنىڭ بارلىعىنا قاتىسىپ كەلەدى. اتاپ ايتقاندا, تايلاند كورولدىگى گاننوۆەر-2000, ايچي-2005, ساراگوسا-2008, شانحاي-2010, يوسۋ-2012, ميلان-2015 حالىق­ارالىق كورمەلەرىنىڭ بەلسەندى قاتىسۋشىسى بولىپ تابىلادى. بۇۇ-نىڭ ازيا جانە تىنىق مۇحيتى ءۇشىن ەكونوميكالىق جانە الەۋمەتتىك كوميسسياسى­نىڭ اتقارۋشى حاتشىسى شامشاد احتارمەن بولعان كەزدەسۋدە ەسكاتو-نىڭ كورمەگە قاتىسۋ ماسەلەلەرى جانە «جاسىل» ەكونو­مي­كا سالاسىنداعى ىنتىماقتاستىق ماسەلەلەرى تالقىلاندى. احتار حانىم كورمە اياسىندا ەسكاتو-نىڭ ارنايى سايد-يۆەنتىن ۇيىمداستىرۋدى ۇسىندى. وسى سايد ارقىلى ازيا – تىنىق مۇحيتى ەنەرگەتيكالىق پورتالىن تانىستىرىپ تۇراقتى ەنەرگەتيكا جانە جاسىل ەنەرگەتيكانى دامىتۋ جونىندە ونلاين-ترەنينگتەر وتكىزۋ ماسەلەسىن تىلگە تيەك ەتتى. اتقارۋشى حاتشى بۇۇ باس اسسامبلەياسىنىڭ 70-ءشى سەسسياسى بارىسىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ۇسىنعان «جاسىل تەحنولوگيا جانە ينۆەستيتسيالىق جوبالاردى»  دامىتۋ بويىنشا ەكسپو بازاسىندا بۇۇ حالىقارالىق ورتالىعىن قۇرۋ جونىندەگى باستامانىڭ ماڭىزدىلىعىن ەرەكشە اتاپ كورسەتتى. كەزدەسۋ قورىتىندىسىندا, ەسكاتو ۇيىمى استانادا وسىنداي ورتالىقتى قۇرۋعا جان-جاقتى قولداۋ كورسەتۋگە دايىن ەكەندىكتەرىنە سەنىم ءبىلدىردى. ساپار بارىسىندا وتكەن كەزدەسۋلەردە تايلاندتىق ەنەرگەتيكالىق جانە تۋريستىك كومپانيالار, بيزنەس توپتارىنىڭ وكىلدەرى استانادا وتەتىن ەكسپو-2017 كورمەسىنە ەرەكشە قىزىعۋشىلىق تانىتتى. تايلاندتىق تۋر-وپەراتورلارمەن ىنتىماقتاستىق بايلانىستى دامىتا وتىرىپ, جەرگىلىكتى تۋريستەردى كورمەگە كەڭىنەن تارتۋ ماسەلەلەرى قاراستىرىلدى. ساپار قورىتىندىسى بويىنشا ەكسپو-2017 كوميسسارى كورولدىكتىڭ «Bangkok Post», «Radio Thailand» جانە «TNN-24» اتتى جەتەكشى باق-تارىنا سۇحبات بەردى. «ەگەمەن-اقپارات»