ەلباسىنىڭ ەلدەستىرۋدەگى ەڭبەگىن جوعارى باعالادى

تۇركيانىڭ تارالىمى ەڭ كوپ باسىلىمى «حۋرريەت» گازەتىندە 8 شىلدە كۇنى رەسەيمەن اراداعى شيەلەنىستى شەشۋگە سەبەپكەر بولعان ماڭىزدى ديپلوماتيالىق وقيعا تۋرالى ماقالا جاريالاندى. «تۇركيا مەن رەسەيدى بىتىمگە كەلتىرگەن ديپلوماتيالىق وقيعا تۋرالى» دەپ اتالاتىن ماقالادا ەلباسى ن.نازارباەۆتىڭ حالىقارالىق قاتىناستارداعى ەرەن ەڭبەگى جايىندا ايتىلادى. بەدەلدى باسىلىم قازاقستان پرەزيدەنتى ن.نازارباەۆتىڭ تۇركيا مەن رەسەي قارىم-قاتىناسىن قالپىنا كەلتىرۋ ءۇشىن سانكت-پەتەربۋرگتە جانە تاشكەنتتە رەسەي پرەزيدەنتى ۆ.پۋتينمەن كەزدەسكەنىن ايتادى. ناتيجەسىندە ەلباسىنىڭ كەڭەسىمەن تۇركيا پرەزيدەنتى ر.ەردوعان ءوز اتىنان حات ازىرلەپ,  ول كەشىكپەي رەسەي پرەزيدەنتىنە جونەلتىلەدى. اتالعان حات شەشۋشى ءرول اتقارىپ, ەكى ەل اراسىندا كەلىسسوزدەر جۇرە باستادى. بۇل الەمدىك قوعامداستىق ءۇشىن ۇلكەن جاڭالىق بولعانى بەلگىلى. وسى وقيعالاردى اۆتور تۇركيا پرەزيدەنتى اكىمشىلىگىنەن الىنعان ناقتى ايعاقتاردى كەلتىرە وتىرىپ, ەگجەي-تەگجەيلى باياندايدى. سونداي-اق, ول رەسەي مەن تۇركيا اراسىنداعى سىرەسكەن سەڭدى بۇزىپ, دوستىق قاتىناستاردى قايتا جانداندىرۋعا ىقپال ەتكەن حاتتى ازىرلەۋگە قازاقستان ديپلوماتتارىنىڭ اتسالىسقانى ايتىلادى. قازاقستان باسشىسىنىڭ مامىلەگەرلىك شەشىمدەرىنىڭ ارقاسىندا كورشىلەس ىرگەلى مەملەكەتتەردىڭ قارىم-قاتىناسى تۇزەلىپ, كۇنى كەشە رەدجەپ ەردوعاننىڭ سانكت-پەتەربۋرگ قالاسىندا رەسەي پرەزيدەنتىمەن كەزدەسۋىنە ۇلاسقانى بەلگىلى. ماقالا اۆتورى «...انكاراعا العاشقى بولىپ, بيلىككە قولداۋ كورسەتۋ ماقساتىمەن ن.نازارباەۆ كەلدى», دەگەن جولدار ارقىلى ەلباسىنىڭ تاياۋدا عانا تۇرىك رەسپۋبليكاسىنا رەسمي ساپارمەن بارعانىن اتاپ وتەدى.  بۇل ساپار تۋرالى ايتا كەتەر بولساق, باۋىرلاس ەلدەگى جۇزەگە اسپاي قالعان اسكەري توڭكەرىستەن كەيىن وسى ەلگە العاش بولىپ بارعان ن.نازارباەۆتى رەدجەپ تايىپ ەردوعان رەسمي ساپار مارتەبەسىنە لايىق بارلىق ءجون-جورالعىمەن قارسى العان بولاتىن. تۇركيا مەملەكەتى باسشىسىنىڭ: «نۇرسۇلتان نازارباەۆتىڭ تۇركياعا رەسمي ساپارمەن كەلۋى مەن ءۇشىن, ەلىم ءۇشىن جانە ۇلتىم ءۇشىن ۇلكەن ابىروي بولىپ تۇر. «جامان جىگىت باسىن اراشالايدى, جاقسى جىگىت دوسىن اراشالايدى» دەمەكشى, بۇل رەسمي ساپار نۇرسۇلتان نازارباەۆتىڭ باۋىرلاس حالىقتى ويلايتىن شىنايى دوستىعىن ايعاقتاي تۇسەدى», دەپ اعىنان جارىلعانى دا ەسىمىزدە. «حۋرريەت» گازەتى تۇركيادا اسا جوعارى بەدەلگە يە ەكەنىن جوعارىدا اتاپ وتتىك. ەلباسى ن.نازارباەۆتىڭ حالىقارالىق ارەناداعى مامىلەگەرلىك رولىنە جوعارى باعا بەرگەن بۇل ماقالا باسقا دا شەت مەملەكەتتەردىڭ باق-تارىندا جاريالانىپ جاتىر. بۇگىنگى تاڭدا تۇركيانىڭ بەلدى باسىلىمدارىندا جاريالانعان ماقالالاردا, الەۋمەتتىك جەلىلەردە رەسەي مەن تۇركيا اراسىنداعى شيەلەنىستىڭ ءتۇيىنىن شەشىپ, توڭتەرىس قاتىناستاردىڭ تۇزەلۋىنە ىقپال ەتكەنى ءۇشىن قازاقستان پرەزيدەنتى نۇرسۇلتان نازارباەۆقا ريزاشىلىق بىلدىرۋشىلەردىڭ قاتارى كوپ. اتاپ ايتقاندا, 8 تامىز كۇنى ىستانبۇل شاھارىندا دەموكراتيالىق رەجىمدى قولداپ, الاڭعا شىققان جۇزدەگەن مىڭ تۇرىك ازاماتتارىنىڭ اراسىندا قازاقستاننىڭ مەملەكەتتىك تۋىن كوتەرگەن, قازاقستان رەسپۋبليكاسى پرەزيدەنتىنىڭ اتىنا العىستارىن ايتقان تۇرىك باۋىرلار از بولعان جوق. بۇل ولاردىڭ ەلدىڭ باسىنا بۇلت ۇيىرىلگەن الماعايىپ ۋاقىتتا باۋىرلاس حالىققا شىنايى دوستىق پەيىلىن كورسەتە بىلگەن, تۇركى الەمىنىڭ ليدەرىنە ءتان مىنەز بەن بىتىمگەرلىك قاسيەتىن ايقىن كورسەتكەن ەلباسىنا دەگەن شىنايى قۇرمەتىنىڭ بەلگىسى دەپ بىلەمىز. ازىرلەگەن ارنۇر اسقاروۆ, «ەگەمەن قازاقستان»