ءۇشىنشى جارىس كۇنى – ءۇشىنشى مەدال
«ەگەمەن قازاقستاننىڭ» ارناۋلى ءتىلشىسى باقتيار تايجان, ريو-دە-جانەيرودان حابارلايدى
62 كيلودا سىنعا سالعان اۋىر اتلەتىمىز فارحاد حاركي جارادى. ريودا كۇن ەڭكەيىپ باتقان مەزگىلدە كۇندىزگى جارىستاردى قورىتىندىلاپ, بۇگىن قارماعىمىز قاپپادى ما دەپ وتىرعاندا, قورجىنى-
مىزعا قولا مەدال سالدى.
ءبارى دە ادەتتەگىدەي باستالعان. اۋەلى ءوز مۇمكىندىگىن بىلەتىندەر ءبىر-بىرىمەن جارىسقا ءتۇسىپ بولدىرىپ بارىپ توقتايدى دا, سوڭىنان كىل مىقتىلاردىڭ تارتىسى باستالادى. بۇعان ابدەن كوزىمىز ۇيرەنگەن. فارحاد جۇلقا كوتەرۋدى 135 كيلومەن باستادى. ءتۇرى شارشاۋلى كورىنگەنىمەن, جاقسى كوتەردى. بىراق 140 كيلونى ەكى رەت كەلىپ, كوتەرە الماي كەتتى. ىشتەن تىنىپ قالدىق. باستى قارسىلاستارى يندونەزيالىق ەكو يۋلي يراۆان مەن كولۋمبيالىق البەرتو فيگۋەرا موسكەرا 142 كيلومەن توقتادى. مىقتى سپورتشىلارعا بار-جوعى ەكى كيلو كەلەسى جاتتىعۋ ءۇشىن بۇيىم ەمەس. ىشتەي مەدالدىڭ اۋىلى الىس ەمەس ەكەنىن سەزىپ, تاقىمىمىزدى قىسىپ وتىرمىز.
ايتقانداي, جۇلدەگە تالاساتىندار وسى ۇشەۋى عانا ەكەنى سەرپە كوتەرۋدىڭ سايىسىندا اڭعارىلىپ قالدى. ءارۋاعىن شاقىرىپ, كوتەرە العانىن كوتەرىپ بارىپ, مۇلدە تىنشىعانداردان كەيىن جارىس قايتا قىزدى. بىراق اۋىر تىنىستاپ جۇرگەن فارحادتىڭ جۇزىندە جارقىل جوق. جارىستىڭ تەز اياقتالۋىن كۇتىپ جۇرگەندەي اسەر قالدىرادى. بۇل جولى ول 170 كيلومەن توقتادى. يراۆان دا 170 كگ-دەن اسا المادى. موسكەرا عانا 176 كيلونى باعىندىرا الدى. سونىمەن, قوس سايىس قورىتىندىسى بويىنشا 305 كگ جيناعان ءبىزدىڭ فارحاد حاركي قولا مەدالدى كەۋدەسىنە تاقتى. يندونەزيالىق يراۆان 312 كيلومەن كۇمىس مەدالعا يە بولسا, باس جۇلدە 318 ۇپايى بار كولۋمبيالىق موسكەرانىڭ قانجىعاسىندا كەتتى.
جارىستان سوڭ جۋرناليستەرگە سۇحبات بەرگەن باس جاتتىقتىرۋشى الەكسەي ني وليمپيالىق ويىندارعا قاتىسۋ ءۇشىن فارحادتىڭ از كۇندە سەگىز كيلو سالماق قۋعانىن ايتقان. الەم چەمپيوناتىنا 69 كگ سالماقتا بارعان ءبىزدىڭ وعلانعا وسىنشاما سالماق قۋعانى كۇشىنە ءتيىپ, الدەنەشە رەت باسى اينالىپ, قۇلاپ قالا جازداپتى. «ايتپەسە, ول جاتتىعۋدا سەرپە كوتەرۋدە 177 كيلونى ەركىن كوتەرەتىن», دەيدى الەكسەي ني. بولاشاقتا فارحادتىڭ 69 كگ سالماقتا جارىسقا دايىندالاتىنىن ايتتى. بۇل ءسوزدى فارحادتىڭ ءوزى دە قۋاتتادى. «مەن جولىم بولىپ قازاقستانعا ءبىر مەدال اپەرىپ, ورتاق جەڭىسكە ۇلەس قوسا العانىما, مەنەن ءۇمىت كۇتكەن ەلدىڭ الدىندا ۇياتقا قالماعانىما قۋانامىن. ارينە, بۇدان جوعارى مەدال السام دەگەن ارمانىم بولدى, بىراق كوپ قۋعان سالماق شتانگانى كوتەرگەندە ەسىمنەن ايىرىپ جىبەرە جازدادى. بۇل مەدال مەنىڭ ەڭ مىقتى كورسەتكىشىم ەمەس, الداعى وليمپياداعا دايىندىقتى قازاقستانعا بارىسىمەن باستاپ كەتەمىن».
الدىنا قويعان ۇلكەن ماقساتى بار ۇلان ءسوزىن وسىلاي تۇجىردى. فارحاد ءوز سوزىندە تۇرا الاتىندىعىن وسى جارىس بارىسىندا كورسەتتى. سول اسىل ارمانى ورىندالعاي دەپ تىلەيىك.
بوكستىڭ كەرەمەتىن قازاقتار كورسەتتى
ءتىل-كوز تاسقا, قازاق بوكسشىلارىنا دەيىن بۇل كۇنى شارشى الاڭعا شىققانداردىڭ ءبىرازى ۇلى ونەردىڭ قادىرىن كەتىرىپ, جانكۇيەرلەردى شارشاتىپ تا الدى. ءبىرجان جاقىپوۆتىڭ قارسىلاسى افريكالىق ماتياس حامۋنەلا باستاپقىدا ءبىزدىڭ بوكسشىنى قالپاقپەن ۇرىپ الارداي تارپا باس سالعان. ەكى قولىن الدىنا سالىپ, وڭدى-سولدى سەرمەگەن سوققىلارى كەيدە نىساناعا ءتيىپ تە جاتتى. ءبىرجان – كلاسسيكالىق مانەردىڭ بوكسشىسى. ءسال ابدىراپ قالعانىمەن, ەسىن تەز جيىپ, ماتياستىڭ ەكپىنىن باسۋدىڭ امالدارىن جاسادى. ءبىرىنشى راۋندتى تەڭ اياقتاعان جەرلەسىمىز ەكىنشى راۋندتا بۇل جەردە كىمنىڭ قوجايىن ەكەندىگىن ورەكپىگەن شىركىنگە تەز ۇقتىردى. ءالى دە بولسا جەڭىستەن ءۇمىتى بار ماتياس سوڭعى راۋندتا العا جۇگىرىپ ءجۇرىپ, بولدىرىپ ءبىتتى. بىلاي ايتقاندا, دايىنداپ كەلگەن وقتارىنىڭ ءدارىسى دە, قورعاسىنى دا تاۋسىلىپتى. سىرت كوزگە قولعابىنىڭ ىشىنە ماقتا وراپ العانداي اسەر قالدىرعان. ءبىرجان ءبىر-ەكى رەت بۇرىشقا قۋىپ تىعىپ, بورىكتىرىپ العاننان كەيىن شارشى الاڭنان ساعالار سايا تاپپاي ساندالعان. ەسەپتىڭ 3:0 – بولۋى وسىنىڭ ايعاعى.
ال 75 كيلودا شارشى الاڭعا كوتەرىلگەن جانىبەك ءالىمحان ۇلى بۇل كەشتەگى ادەمى ايقاستىڭ ارقاۋىن كورسەتكەن. ۇلىبريتانيالىق ەنتوني فوۋلەردىڭ برازيلياعا ءجانىبەكتەن تاياق جەۋگە كەلمەگەنى بەلگىلى. اياققاپتاي كەۋدەسىن كەرىپ-اق شىققان. جانىبەكتىڭ ەكى-ءۇش سوققىسى اۋىر وتكەننەن كەيىن قايقاڭداي باستاعانىن بايقادى. سوققى الماسقاندا, جانىبەكتىڭ قولىن قولتىعىنا قىسىپ الىپ, ەركىن قيمىلداۋىنا مۇمكىندىك بەرمەيدى. ءبىزدىڭ جىگىت قولىنا قولعاپ ەمەس, قوس ناركەسكەن ۇستاپ العانداي اسەر قالدىرادى. ەكەۋى بەتتەسسە بولدى, ەنتوني سوققىدان اۋىرسىنىپ, قايقاڭداي جونەلەدى. بولمادى. قۇتىلا المادى. ەكىنشى راۋندتا سول جاقتان وپىرا تيگەن گۇرزى جۇدىرىق ەكى اياعىنان جان كەتىرىپ جەرگە سىلق ەتكىزدى. سودان كەيىن-اق ەنتونيدان ءسان كەتتى. وعان ءدال قاسىمىزدا شىرىلداپ وتىرعان جانكۇيەرلەرىنىڭ دە ايقايى دەمەۋ بولا المادى. گونگتىڭ تەز سوعىلعانىن, تاعى دا ماسقارا بولىپ قۇلاپ قالماۋدى ويلاعانى انىق. سوڭعى راۋندتا دا قارسىلاسىپ جارىتپادى. جانىبەك ايقىن باسىمدىقپەن جەڭدى.
ۆاسيلي لەۆيتتىڭ قارسىلاسى قىتاي بوكسشىسى يۋ فەنگكاي قارادان-قاراپ ۇركىپ شىقتى. سوعان قاراعاندا, قازاق بوكسىنىڭ قايراتىن بۇرىننان بىلەتىن بولۋى كەرەك. لەۆيت تە اقىرى توبەلەسۋگە كەلدىك قوي, ۇرىستا تۇرىس جوق دەگەندەي, ەكى بىلەگىن سىبانىپ كىرىسىپ كەتتى. قىتاي ۇلى قورعانىستا. قوياندى ىندەتكەن قاسقىرداي ساباپ جۇرگەن ءبىزدىڭ جىگىت. ەكىنشى راۋندتا تۋرا تيگەن جويقىن سوققى ج ۇلىنداي ۇشىرىپ جىبەردى. يۋ فەنگكاي ەدەندە ەكى جاققا كەتكەن ەكى اياعىن جيناي الماي ۇزاق وتىرىپ قالدى. باپكەرلەرى شاكىرتىنىڭ قازاق بوكسشىسىنا شاماسىنىڭ جەتپەيتىنىن, ەندىگى باسكوزدىك دەنساۋلىعىنا زيان ەكەندىگىن تەز باعامداپ جارىستان الدى. كەيبىر بوكسشىلار مۇندايدا وتىرىك قوپاڭداپ, شايقاسقا قايتا تۇسەتىندەي سىڭاي تانىتاتىن ەدى, قىتاي بوكسشىسى امان-ەسەن قۇتىلعانىنا رازى بولعانداي سىڭاي تانىتقان.
اتاقتى فەليكس ساۆوننىڭ نەمەرە ءىنىسى ەرسلاندي ساۆوننىڭ جەكپە-جەگىن تاماشالادىق. اماندىق بولسا, ول ەكىنشى كەزدەسۋىنەن سوڭ جولى ءبىزدىڭ لەۆيتپەن توعىسادى. ساۆون باياعى قولدى-اياققا تۇرمايتىن ساۆون ەمەس, قيمىلى اۋىرلاپ قالىپتى. ياعني, ءۆاسيليدىڭ جارتىلاي فينالعا ات ويناتىپ وتۋىنە مۇمكىندىگى مول سياقتى. ول – ەندى, الداعى كۇندەردىڭ اڭگىمەسى.
باس جاتتىقتىرۋشى مىرزاعالي ايتجانوۆقا جولىقتىق. ونىڭ شاكىرتتەرىنە كوڭىلى توق. قارسىلاستار بەلگىلى. ءبىرجان كەلەسى جولى ءوزىنىڭ سىرالعى قارسىلاسى حاسانبوي دۋسماتوۆپەن جولىعادى. ەكەۋىنىڭ اراسىنداعى باسەكە بۇگىنگە دەيىن تەڭ – 1:1. ەندىگىسىنە – ريو شارشى الاڭى تورەشى.
حاركي مەن بوكسشىلاردى قوسپاعاندا, سۇرمەرگەنىمىز يۋري يۋركوۆ 10 مەترلىك مىلتىق اتۋدىڭ ىرىكتەۋ سايىسىندا 44-ءى ورىنعا تۇراقتادى. دزيۋدوشى ديدار حامزا ەكىنشى وتكەلدەن وتە العان جوق. ساداقشى سۇلتان دۇزەلباەۆ جارىستى جاقسى باستاعانىمەن, لوندون وليمپياداسىنىڭ چەمپيونى يتاليان ماۋرو نەسپوليدان ۇتىلىپ قالدى. اكادەميالىق ەسۋدە ۆياچەسلاۆ ياكوۆلەۆ پەن سۆەتلانا گەرمانوۆيچ جارتىلاي فينالعا شىعا المادى. سلالومدا بايداركامەن ەسكەك ەسكەن ەكاتەرينا سميرنوۆا ىرىكتەۋ جارىستا 19-ورىنمەن اياقتاعان.
كەستەدە بەلگىلەنگەن بوكسشىلاردىڭ شارشى الاڭعا شىعۋى وزگەرىپ جاتىر.
اتىڭنان اينالايىن, ابىلايحان!
ارقا توسىندەگى اباي سىندى نەبىر تارلان بوكسشىلار شىققان قالادا تۋعان ابىلايحاننىڭ بالا كۇنىنەن بوكس دەگەن ونەرگە ءۇيىر بولعانىنا تاڭدانۋدىڭ قاجەتى جوق شىعار. ەكىنشى سىنىپتا وقىپ جۇرگەنىندە اتا-اناسى بوكس ۇيىرمەسىنە بەرىپتى. بولار بالا بىلىكتى باپكەردىڭ قولىنا ءتۇسىپ جاتسا, قانداي عانيبەت دەسەڭىزشى! ابىلايحاننىڭ العاشقى جاتتىقتىرۋشىسى باۋىرجان امانباەۆ كەزىندە شارشى الاڭدا اتوي سالعان حاس شەبەردىڭ ءوزى. كەڭەستەر وداعى كەزىندە «كسرو سپورت شەبەرى» اتاعىنىڭ كىم-كورىنگەنگە بەرىلە سالمايتىنى بەلگىلى. ال امانباەۆ بولسا, وسى اتاققا ساي بولعان سايىپقىران ەدى. سپورتتا وسىنداي بيىكتەردى باعىندىرعان باۋىرجان-بوكسشى بۇگىندە ءوزىن تالانتتى تالىمگەر رەتىندە دە تانىتىپ ۇلگەردى. ءبىر عانا ابىلايحاندى مىسالعا كەلتىرەر بولساق, وسى سوزىمىزگە دالەلدى الىستان ىزدەپ اۋرە بولمايمىز.
«بالا كەزىمدە, – دەيدى ابىلايحاننىڭ ءوزى, – سەرىك ساپيەۆتىڭ جاتتىعۋلارىن تاماشالاۋدان جالىقپايتىنمىن. وسە كەلە چەمپيون جەرلەسىمە ۇقساعىم كەلدى. ونى ءوزىمە ۇلگى تۇتتىم. قازىر قاراپ تۇرساڭىز, مەنىڭ مانەرىمنەن ساپيەۆ تەحنيكاسىنىڭ كەيبىر ماشىقتارىن اڭداۋعا بولادى. «جاقسىدان – شاراپات» دەگەن عوي, ءوز باسىم سەرىك ساپيەۆ, گەننادي گولوۆكين سياقتى الدىڭعى تولقىن اعالارىمنان ۇيرەنەرىم ءالى دە كوپ دەپ ەسەپتەيمىن».
ءتىل-كوزدەن ساقتاسىن دەيىك, ابىلايحان ءجۇسىپوۆتىڭ بوكس الەمىندەگى جولى ازىرگە بۇرالاڭسىز بولىپ كەلەدى. وزدەرىڭىز-اق باعامداي بەرىڭىزدەر: جاسوسپىرىمدەر اراسىندا ازيا, الەم جانە وليمپيادا چەمپيونى اتاندى. بۇدان كەيىن جاستار اراسىندا دا جارقىراي كورىنىپ, سارى قۇرلىقتىڭ جانە دۇنيە ءجۇزىنىڭ بىرىنشىلىكتەرىندە توپ جاردى. ءبازبىر ماماندار ابىلايحان ءۇشىن ەرەسەكتەر اراسىنداعى دوداعا سىنالاي ەنۋ ۇلكەن سىناق بولادى دەپ, ءتىپتى كەيبىرى كۇماندانعانداي كەيىپ تانىتىپ, ساۋەگەيلىك ايتقان-دى. الايدا, جاس تالانت سىندارلى شاقتا سىر بەرمەدى. ساقا جىگىتتەر اراسىنداعى العاشقى سىننىڭ بىرىندە – قاراعاندىدا وتكەن عالىم جارىلعاپوۆتى ەسكە تۇسىرۋگە ارنالعان تۋرنيردە ول 64 كيلو سالماقتا ەلىمىزدەگى ەڭ مىقتى دەپ جۇرگەن بەكبەرگەنوۆ, مۇقانوۆ جانە الىمبەكوۆ سىندى ءۇش بىردەي بوكسشىمەن رينگكە شىعىپ, ۇشەۋىن دە بەت قاراتپاي جەڭدى. مىنە, سول كەزدە بارىپ ۇلتتىق قۇرامانىڭ تىزگىنىن ۇستاعان باپكەرلەردىڭ ابىلايحانعا دەگەن كوزقاراسى كۇرت وزگەرگەن. ءدال وسى ءتۋرنيردىڭ ءجۇسىپوۆ سىندى جاس بوكسشىنىڭ سپورتتىق مانسابىندا تاعدىرشەشتى ءرول ويناعانى راس. نەگە دەسەڭىز, جاتتىقتىرۋشىلار قۇرامى جاستىعىنا قاراماي, ابىلايحانعا ۇلكەن سەنىم ارتىپ, بيىلعى جىلدىڭ ناۋرىز ايىندا قىتايدا وتكەن ليتسەنزيالىق تۋرنيرگە الىپ باردى. وسى سىندا ول وزىنە كورسەتىلگەن سەنىمدى تولىق اقتاپ, ريو-2016 وليمپياداسىنىڭ جولداماسىنا قوسا جارىستىڭ التىن جۇلدەسىن دە جەڭىپ الدى!
ءجۇسىپوۆتىڭ جەكە باپكەرىنە اقىل-كەڭەس بەرىپ جۇرگەن اتاقتى مامان, قازاقستان جاستار قۇراماسىنىڭ باس جاتتىقتىرۋشىسى عالىم كەنجەباەۆتىڭ ابىلايحان تۋرالى ايتقان مىنا پىكىرىنە قۇلاق تۇرە كەتكەندى ءجون سانادىق. «ول – ءالى جەڭىلىستىڭ اششى ءدامىن تاتا قويماعان جاس پەرى. مۇنىڭ پسيحولوگيالىق تۇرعىدا ارتىقشىلىقتارى بار. ودان كەيىن ول جاستىعىنا قاراماي, وتە سالماقتى, پسيحولوگياسى ورنىقتى جىگىت. تەحنيكاسى جوعارى دەڭگەيدە. دەگەنمەن, ونىڭ ەرەسەكتەر بوكسىنداعى تاجىريبەسىنىڭ ازدىعى جانە دە كۇش-قۋاتىنىڭ ءالى دە بولسا تولىسا قويماعاندىعى كوڭىلگە ازداپ كۇدىك ۇيالاتادى. بىراق وليمپيادا سىندى الامان دودادان ءبارىن دە كۇتۋگە بولادى: مىقتىلار سۇرىنەدى, جاستار سۋىرىلىپ شىعىپ, جارق ەتە قالۋى مۇمكىن», دەيدى ايگىلى گولوۆكيننىڭ ءبىر كەزدەگى جەكە باپكەرى.
البەتتە, ريو-2016 وليمپياداسىنداعى جەكپە-جەكتەردىڭ ءبىزدىڭ ابىلايحان ءۇشىن وڭايعا تۇسپەسى ايدان انىق. تىم ارىگە بارماي-اق, بەرىدەن سالار بولساق, 64 كيلو سالماق دارەجەسىندە مۇنىڭ جولىندا نەبىر «سەن تۇر, مەن اتايىن» دەيتىن مىقتىلار ءيىن تىرەسىپ تۇر. بۇلاردىڭ الدىڭعى قاتارىندا قازىر ازەربايجاننىڭ اتىنان جۇدىرىقتاسىپ جۇرگەن كۋبالىق لورەنتسو سوتومايوردى اتاۋعا بولادى. وسى سالماقتا الەمدىك رەيتينگ بويىنشا ءبىرىنشى ورىندا تۇرعان رەسەيلىك ۆيتالي دۋنايتسەۆ تە ەكىنىڭ بىرىنە ەسە جىبەرەتىن بوسبەلبەۋ ەمەس. ال كۋبالىق ياسنيەر تولەدو تۋرالى اڭگىمە ءتىپتى دە بولەك. مىسالى, جوعارىدا ءبىز ايتقان ۆيتالي دۋنايتسەۆ وسى تولەدونى ريوداعى ءوزىنىڭ باستى قارسىلاسى سانايدى ەكەن. «تولەدو – امبەباپ بوكسشى. ول جەكپە-جەك كەزىندە تاكتيكاسىن مىڭ قۇبىلتاتىن تەڭدەسسىز شەبەر. ونىڭ بويىندا كەمشىلىك دەگەن جوقتىڭ قاسى», دەپتى رەسەيلىك بوكسشى سۇحباتتارىنىڭ بىرىندە. وسى سوزدەردى 2015 جىلعى الەم جانە ەۋروپا چەمپيونى ۆيتالي دۋنايتسەۆ ايتىپ وتىرعان سوڭ, نانباسقا لاج جوق.
مىنە, ءبىزدىڭ 19 جاستاعى بالاڭ جىگىت ابىلايحاندى وسىنداي ايبارلى قارسىلاستار كۇتىپ تۇر. جانكۇيەر جازعاننىڭ بويىندا قازىر ءۇمىت پەن كۇدىك ايانباي ايقاسقا تۇسكەن.
تاياۋدا قاراعاندىدا بولعانىندا وليمپيادا چەمپيونى, بەلل باركەر كۋبوگىنىڭ يەگەرى سەرىك ساپيەۆ جۋرناليستەرگە بەرگەن سۇحباتىندا ءبىزدىڭ الاڭ كوڭىلدى ازداپ بولسا دا دەمەيتىندەي ءسوز ايتتى. «مەنىڭشە, ابىلايحان ءجۇسىپوۆتىڭ جۇلدە الۋعا بارلىق مۇمكىندىگى بار. تەك ساتتىلىك پەن دايىندىق سەرىك بولسىن دەڭىز. مەن ەكى مارتە وليمپيادا ويىندارىنا قاتىسقان اداممىن. سونداعى تۇسىنگەنىم – ەشقاشاندا ساسپاۋ كەرەك», دەدى لوندون-2012 وليمپياداسىنىڭ ەڭ ۇزدىك بوكسشىسى. جاقسى ءسوز جاندى سەمىرتەدى عوي, «اۋزىڭا – ماي, استىڭا – تاي», دەدىك بىزدەر ىشتەي.
باسقا تىلەك جوق بىزدە – ارقا جۇرتى, الاش ەلى «اتىڭنان اينالايىن, ابىلايحان!», دەيتىن كۇنگە جازسىن!
قايرات ءابىلدينوۆ, «ەگەمەن قازاقستان»
قاراعاندى
جەرلەستەر – جاپپاي جانكۇيەر!
لاتىن امەريكاسى قۇرلىعىندا الاۋىن جاققان ريو وليمپياداسىنا شىعىس قازاقستان وڭىرىنەن 6 سپورتشى قاتىسادى. اتاپ ايتقاندا, جەڭىل اتلەتيكادان ولگا رىپاكوۆا, يرينا سمولنيكوۆا جانە ەلينا ميحينا, اۋىر اتلەتيكادان دەنيس ۋلانوۆ پەن ەكاتەرينا سميرنوۆا, ەسكەكتى سلالومنان ديسك لاقتىرۋ بويىنشا سىنعا تۇسەتىن ەۆگەني لابۋتوۆ ەل نامىسىن قورعايدى.
قازىرگى كەزدە ريو-دە-جانەيرو قالاسىنداعى وليمپيالىق ويىندار وتاندىق ءۇش تەلەارنادا تىكەلەي ەفير ارقىلى كورسەتىلۋدە. بۇل مەرزىمدە قازاقستان اۋماعىنداعى تەلەديدار مەن ينتەرنەتتە وليمپيالىق كونتەنتتەن كەز كەلگەن شەتەلدىك تاراتۋ شەكتەلەتىنىن ايتا كەتكەن ءلازىم.
وبلىس ورتالىعىنداعى سپورت سارايىنىڭ الدىندا تۇرعان ۇلكەن ەكراننان وليمپيادانىڭ اشىلۋ سالتاناتىنان باستاپ تىكەلەي كورسەتىلىم ۇيىمداستىرىلا باستادى. ەكراننىڭ الدىنداعى الاڭقايعا كورەرمەندەرگە ارنالعان ورىندىقتار قويىلعان. الدا, 13 تامىز كۇنى ونەر كورسەتەتىن ولگا رىپاكوۆا مەن دەنيس ۋلانوۆقا جەرلەستەرى وسى الىپ ەكران ارقىلى قولداۋ كورسەتپەك. جانكۇيەرلەر تاڭعى ساعات 4.00-دە باستالاتىن اۋىر اتلەتيكا سىنىن, سونداي-اق, كەشكى 18:40-تا بولاتىن جەڭىل اتلەتيكا جارىسىن ۇلكەن ەكراننان بىرگە تاماشالاي الادى.
سونداي-اق, ءحححى جازعى وليمپيادا ويىندارىنا قاتىسۋشى قازاقستاندىق سپورتشىلاردى قولداۋ ماقساتىندا مارافون ءوتتى. بيىكتىگى 522 مەترلىك قازاقستان تاۋىنا جۇگىرىپ شىققان 200-گە جۋىق مارافونشى وليمپياداشىلارعا قولداۋ ءبىلدىردى. بۇل شاراعا پاۆلودارلىق اۋەسقوي شاباندوز ءومىرجان وشانوۆ تا قاتىستى. ساياحاتىن پاۆلودار قالاسىنان باستاعان ۆەلوشاباندوز وسكەمەن شاھارى ارقىلى موڭعوليا, رەسەي جانە قىتاي ەلدەرىنە ساپارلاماق. وليمپياداشىلاردى قولداۋ ماقساتىندا باسقا دا ءتۇرلى شارالار, اكتسيالار وتكىزىلۋدە.
دۋمان اناش, «ەگەمەن قازاقستان»
وسكەمەن
نەمەرەسىنىڭ جارىسىن كورىپ وتىرىپ, قايتىس بولدى
تايلاندتىق اۋىر اتلەت سينفەت كرۋايتونگتىڭ ريو وليمپياداسىندا قولا مەدال جەڭىپ العان شايقاسى ونىڭ وتباسى ءۇشىن قايعىلى اياقتالدى. سپورتشىنىڭ 84 جاستاعى اجەسى سۋبين حونتاپ ونىڭ تۇعىر ۇستىندە تايتالاستا بولىپ وتكەن كۇرەسىن تەلەۆيزوردان كورىپ وتىرىپ, اسا قاتتى تولقىعاندىقتان, جۇرەگى ۇستاپ قالىپ, جاھاننامعا اتتانىپ كەتتى.
الايدا, بولعان وقيعاعا تۇسىنىكتەمە بەرگەن جەرگىلىكتى پوليتسەي بۇل قايعىلى جاعدايدىڭ سينفەتتىڭ سايىسىنا ەشقانداي قاتىسى جوق ەكەنىن ايتىپ وتىر. «مەنىڭ سول كەزدە اجەيدىڭ قاتتى تولقىپ كەتكەنىنە كۇمانىم بار, شاماسى, ول بۇرىننان اۋرۋ بولسا كەرەك», دەيدى ول.
وليمپيادادا 56 كگ سالماقتا سىنعا تۇسكەن سينفەت كرۋايتونگ الدىنا كحدر وكىلى وم يۋن چحول مەن قىتايلىق لۋن تسينگۋاندى سالعان بولاتىن.
ۋسەين بولت: «بۇل – مەنىڭ سوڭعى وليمپيادام»
يامايكالىق اتى اڭىزعا اينالعان جەڭىل اتلەت ۋسەين بولت ءتورت جىلدىقتىڭ باستى تۋرنيرىمەن ارا-قاتىناسىن ۇزۋگە شەشىم قابىلدادى. «سىزدەردىڭ بۇل جاڭالىقتى قول شاپالاقتاپ, قارسى الۋلارىڭىزعا بولادى, – دەپ مالىمدەدى سپورتشى ريودا وتكەن ءباسپاسوز ءماسليحاتىندا. – ءيا, بۇل – مەنىڭ سوڭعى ويىندارىم. مەن قولدان كەلگەننىڭ ءبارىن جاسادىم, ءبارىن دالەلدەدىم. كوپ ادامدار بۇعان رازى دا بولا قويعان جوق».
بولت تەك 200 مەترلىك قاشىقتىققا جۇگىرەر الدىندا عانا ازداپ جۇيكەسى سىر بەرەتىنىن ايتتى. «مەن ءۇشىن 100 مەترلىكتىڭ ەش قيىندىعى جوق. تەك 200 مەترلىككە جۇگىرۋدەن رەكورد جاساعىم كەلىپ ەدى. ول شامامەن 19 سەكۋندتىڭ ماڭايىندا بولۋعا ءتيىس», – دەدى ول.
ۋسەين بولت – وليمپيالىق ويىنداردىڭ التى التىن مەدالىن جەڭىپ العان ساڭلاق. ول الەمنىڭ 11 دۇركىن چەمپيونى.
دامير قوجامقۇل
