اقش-تا قازاقستانداعى اشارشىلىق تۋرالى كىتاپ شىقتى

امەريكالىق زەرتتەۋشى ماريا بلەكۆۋدتىڭ ايتۋىنشا, جارىق كورگەن كىتاپ – ەلىمىزدەگى XX عاسىردا بولعان اشارشىلىق جىلدارىن قامتيدى. «جالپى, قازاقستانداعى ارحيۆ قۇجاتتارى نەگىزىندە اعىلشىن جانە نەمىس تىلىندە جازىلعان بىرنەشە جاڭا كىتاپ جارىق كوردى. ال اشتىق جايىندا باياندالاتىن شىعارما گەرمانيادا جازىلدى. سونىمەن قاتار, امەريكالىق تاريحشى سارا كەمەروننىڭ كىتابى بيىل باسىلادى. قاراپ وتىرساڭىز, ەكى اۆتوردىڭ دا تاقىرىبى قازاقستانداعى ناۋبەت جىلدارىن قامتيدى. ولار وسىعان بايلانىستى كوپتەگەن قىزىقتى ماتەريالدار تاپقان», – دەيدى ماريا بلەكۆۋد. بۇگىندە ول وتكەن عاسىردىڭ 20-30 جىلدارىنداعى العاشقى قازاق بولشەۆيكتەرى جايلى ديسسەرتاتسيا جازۋدا. ناقتى ايتقاندا, ونىڭ ديپلومدىق جۇمىسىنىڭ تاقىرىبى الاشوردالىقتارعا ارنالعان. قازاقستان پرەزيدەنتىنىڭ مۇراعاتىندا وتكەن كونفەرەنتسيادا زەرتتەۋشى ماريا بلەكۆۋد: «عالىمداردىڭ نازارىن قازاقستان تاريحىنا اۋدارۋ وتە جەڭىل. سەبەبى ول وتە قىزىقتى. مەن الماتى مەن ماسكەۋدە بولىپ, مۇراعاتتاردان تاريحي تىڭ دەرەكتەر ىزدەدىم. اتالعان قالالاردا بۇرىنعى كەڭەس وداعىنىڭ ورتالىق مۇراعاتتارى بار. وندا قازاقستانعا بايلانىستى كوپتەگەن ماتەريالدار كەزدەسەدى», – دەدى. ايتا كەتەيىك, اشارشىلىق جايلى كىتاپ قازاقستانعا جىل سوڭىنا دەيىن جەتكىزىلىپ, كىتاپ دۇكەندەرىندە ساتىلاتىن بولادى. تالعات رايىمبەك