حوككەي. استانادا پرەزيدەنت كۋبوگى سايىسى باستالدى

[caption id="attachment_55274" align="aligncenter" width="691"] hcbarys.kz[/caption] استانادا حوككەيدەن قازاقستان رەسپۋبليكاسى پرەزيدەنتىنىڭ كۋبوگى ءۇشىن حالىقارالىق تۋرنير باستالدى. ونىڭ العاشقى ماتچتىندا «بارىس» پەن بيىل قۇرلىقتىق حوككەي ليگاسىنا قوسىلعان قىتايدىڭ «كۋنلۋن رەد ستار» كلۋبىمەن كەزدەستى. كەزدەسۋدە قوناقتارعا 0:5 ەسەبىمەن تەحنيكالىق جەڭىلىس جازىلدى. ولار  الاڭ يەلەرىنىڭ ويىنشىلارى دامير رىسپاەۆپەن جانە ماديار ىبرايبەكوۆپەن توبەلەستەن كەيىن ءارى قاراي ويناۋدان باس تارتتى. ماتچتاعى توبەلەس تۋرالى «بارىستىڭ» باس جاتتىقتىرۋشىسى اندرەي نازاروۆ: «ماتچ وتە تارتىستى بولدى. جانكۇيەرلەردىڭ ءۇش كەزەڭدى كورە الماعانى, ارينە, وكىنىشتى. قىتايدىڭ كومانداسىمەن العاشقى ويىندا داستين بويد اياعىن سىندىرىپ, قاتتى جاراعاتتاندى. تريبۋنادا داستين بويدقا قولداۋ كورسەتكەن پلاكاتتاردى كوردىك. جىگىتتەر دە سونى بايقاپ, سەزىمگە بەرىلىپ كەتتى. بۇل ەندى حوككەي. مۇنداي جاعدايلار بولىپ تۇرادى», – دەدى ول. ال ماتچتا «بارىستىڭ» ويىنشىلارى ءبىرىنشى كەزدەسۋدە ەرەكشە دورەكىلىكپەن كوزگە تۇسكەن قىتايلىقتاردان داستين بويد ءۇشىن ەسە قايتارعانعا ۇقسايدى. قازىر وسى جەڭىستەن كەيىن «بارىس» تۋرنير كەستەسىندە  3 ۇپايمەن كوش باستادى. ەكىنشى ورىندا نوۆوكۋزنەتسكىنىڭ «مەتاللۋرگ» كومانداسى 2 ۇپايمەن كەلەدى. ءۇشىنشى ورىنعا ۆلاديۆوستوكتىڭ 1 ۇپايمەن «ادميرال» كلۋبى جايعاستى. ال قىتايدىڭ «كۋنلۋن رەد ستار» جاساعىندا ازىرگە ۇپاي جوق. بۇگىن «ادميرال» «كۋنلۋن رەد ستار» كلۋبىن 4:0 ەسەبىمەن ۇتتى. ەندى كەشكە «بارىس» پەن «مەتاللۋرگ» كوماندالارى كەزدەسەدى. داستان كەنجالين