فۋتبولشىنىڭ جاراقات العانىن پيتستسا جەپ تويلايدى

فۋتبولدان ازۋلى ارگەنتينا قۇراما كومان­داسىنىڭ شابۋىلشىسى گونسالو يگۋاين جاقىندا يتالياداعى نەاپول قالاسى­نىڭ «ناپولي» كومانداسىنان ءتۋريننىڭ «يۋۆەن­تۋسىنا» وتكەن بولاتىن. «يۋۆەنتۋس» باسشىلىعى ونى ساتىپ الۋ ءۇشىن 90 ملن. ەۋرو جۇمسادى. بۇل حابار نەاپول فۋتبول سۇيەر قاۋىمىن قاتتى قاپالاندىردى. سەبەبى, وسى ماۋسىمدا 36 گول سوعىپ, يتاليا چەمپيوناتىنىڭ ۇزدىك سۇرمەرگەنى اتانعان ارگەنتينالىق جەرگىلىكتى «ناپولي» كومانداسىن «سكۋدەتتونىڭ» ەكىنشى ورنىنا ءبىر-اق شىعارعان بولاتىن. ودان بولەك, يگۋاين «ناپولي» ساپىندا 2013/2014-فۋتبول ماۋسىمىندا يتاليا كۋبوگى مەن سۋپەركۋبوگىنا قول جەتكىزگەن. وسىلايشا, «ناپولي» كومانداسىن وگىزدەي ورگە سۇيرەپ, جەرگىلىكتى جۇرتتىڭ قاھارمانى اتانعان ايگىلى فۋتبولشى ءتۋريننىڭ «يۋۆەنتۋسىنا» اۋىسىپ, ءبىر-اق ساتتە «حالىق جاۋىنا» اينالىپ كەتتى. كۇنى كەشە گونسالونى ءپىر تۇتىپ جۇرگەن فاناتتار بۇگىندە ونى ساتقىن دەپ اتاپ, فۋتبولشىنىڭ جەيدەلەرىن ورتەۋدە دەيىن باردى. ءتىپتى, نەاپولداعى مەيرام­حانالاردىڭ ءبىرى جەرگىلىكتى حالىقتىڭ اشۋىن تۋدىرعان بۇل ماسەلەگە بايلانىستى ەرەكشە ۇسىنىس جاساماقشى. ناقتىراق ايتساق, نەاپول قالاسىنداعى Show Pizza مەيرامحاناسى قالا تۇرعىندارى مەن قوناقتارىنا ارناپ ەرەكشە ۇسىنىس دايىن­داپ جاتىر. BBC اگەنتتىگىنىڭ مالىمەتىنە سايكەس, گونسالو يگۋاين «يۋۆەنتۋس» ساپىندا ويناپ ءجۇرىپ جاراقات العان كۇندەرى مەكەمە «مارگاريتا» پيتستساسىن قوماقتى جەڭىلدىكپەن ۇسىنادى. وسىلايشا, ارگەنتينالىقتىڭ العان ءاربىر جاراقاتى رەستوران قوناقتارىنا پيتستسانى بار بولعانى 1 ەۋروعا ساتىپ الۋعا مۇمكىندىك بە­رەدى. ەندى فۋتبولشىنىڭ جەرگىلىكتى كوماندادان كەتكەنىنە كوڭىلى تولماعان جۇرت ونىڭ جارا­قات العانىن پيتستسا جەپ تويلايتىن كورىنەدى. ايدار ورىسباەۆ, «ەگەمەن قازاقستان»