ءوڭىردىڭ وزەكتى ماسەلەلەرى تالقىلاندى

سەنبى كۇنى پاۆلودار وبلىسىنا جۇمىس ساپارىمەن بارعان پرەمەر-مينيستر كارىم ءماسىموۆ ءوڭىردىڭ نەگىزگى وندىرىستىك نىساندارىنىڭ جۇمىسىمەن تانىسىپ, اگروونەركاسىپ سالاسىنداعى وزەكتى جايتتاردى تالقىلادى. سونداي-اق, وڭىردەگى جاستاردىڭ پروبلەمالارىنا دا نازار اۋداردى. Pm.kz-ءتىڭ حابارلاۋىنشا, ۇكىمەت باسشىسى پاۆلودار مۇناي-حيميا زاۋىتىن جاڭعىرتۋ باعدارلاماسىنىڭ جۇزەگە اسىرىلۋ بارىسىمەن,  مۇنايدى العاشقى قايتا وڭدەۋدەن وتكىزەتىن قوندىرعىنىڭ جۇمىسىمەن تانىسىپ, مازۋتتى تەرەڭ وڭدەۋ بو­يىنشا بىرەگەي كەشەندەردى قاراپ شىقتى.  يندۋستريالاندىرۋ كارتاسى اياسىندا جۇزەگە اسىرىلىپ جاتقان پمحز جاڭعىرتۋ جوباسى وتاندىق مۇناي وڭدەۋ زاۋىتتارىن قايتا جوندەۋدەن وتكىزۋ جونىندەگى ۇكىمەت باعدارلاماسىنا ەنگەن. جاڭعىرتۋدان وتكەن سوڭ زاۋىت مۇناي وڭدەۋ تەرەڭدىگىن 90%-دان اسىرىپ, جىلىنا 7,5 ملن. توننا مۇنايدى قايتا وڭدەۋگە جانە ەۋرو-4 ستاندارتىنا سايكەس ءونىم شىعارۋعا  قول جەتكىزۋى ءتيىس. سونداي-اق, پرەمەر-مينيستر ساپار اياسىندا كومىر ونەركاسىبىن دامىتۋ جونىندە كەڭەس وتكىزدى. كومىر قورى جاعىنان قازاقستان الەمدەگى كوشباسشى ەلدەر وندىعىنا ەنەدى. قازاقستان اۋماعىندا 400-دەن استام كەن ورنى بار, كومىردىڭ جالپى قورى 150 ملرد. توننا دەپ باعالانعان. قازىرگى كومىر ءوندىرىسىنىڭ دەڭ­گەيىمەن شامالاعاندا, كومىر قورى 300 جىلدان استام ۋاقىتقا جەتەدى ەكەن. دەگەنمەن, بۇل سالادا دا ءتۇرلى تۇيتكىلدى ماسەلەلەر بار. ك.ءماسىموۆ جۇمىس توبىن قۇرىپ, وزەكتى ماسەلەلەردى قىسقا مەرزىمدە شەشۋدى تاپسىردى. ۇكىمەت باسشىسى ءوڭىردىڭ اۋىل شارۋاشىلىعى ماسەلەلەرىنە دە كوڭىل ءبولىپ, كەڭەس وتكىزدى. بۇل رەتتە, ول تۇرعىنداردى ساپالى اۋىز سۋمەن جابدىقتاۋ مەملەكەتتىڭ نەگىزگى مىندەتتەرىنىڭ ءبىرى ەكەنىن اتاپ ءوتتى. سوعان وراي, جاعدايدى تۇزەۋ ءۇشىن اۋىل شارۋاشىلىعى مينيسترلىگىنە, ۇلتتىق ەكونوميكا مينيسترلىگىنە جانە وبلىس اكىمدىگىنە بىرقاتار تاپسىرما بەرىلدى. پرەمەر-مينيستر جاستارمەن دە كەزدەستى. «ديپلوممەن – اۋىلعا!» باعدارلاماسىن جۇزەگە اسىرۋدا جاڭا باعىتتى ەنگىزۋ, «Start-Up» ارقىلى جاستار كاسىپكەرلىگىن دامى­تۋ جانە ءوز بەتىنشە شەتەلدىك جوو-لاردا وقىپ جۇرگەن جاستاردى جۇمىسقا ورنالاستىرۋ ماسەلەلەرى جان-جاقتى تالقىلاندى. جاستار جاعى دا ءتۇرلى ۇسىنىستارى مەن پىكىرلەرىن ورتاعا سالدى. «ەگەمەن-اقپارات»