لاۋلا, وليمپيادا الاۋى!
بۇگىن تۇندە ريودا وليمپيالىق ويىندار باستالادى
تورتكۇل الەم ءتورت جىلدان بەرى تاعاتسىزدانا كۇتكەن جاھاندىق جارىس – برازيليانىڭ ريو-دە-جانەيرو قالاسىندا جالاۋ جەلبىرەتەتىن XXXI جازعى وليمپيادانىڭ سالتاناتتى جاعدايدا اشىلاتىن ءساتى دە كەلىپ جەتتى. اتلانت مۇحيتىنىڭ ارعى بەتىندەگى تۇستىك قاپتالىندا جاتقان ەل ورنالاسقان ساعاتتىق بەلدەۋگە ساي, ول استانا ۋاقىتىمەن 6 تامىزعا قاراعان ءتۇنى ساعات 4-تە سورەدەن شىعادى. وسىناۋ جان تولقىتىپ, جۇرەك تەبىرەنتەرلىك شاقتاردى ەلىمىزدىڭ ءۇش بىردەي تەلەارناسى سول مەزەتىندە جارىسا كورسەتۋگە كىرىسىپ كەتەدى. ولاردىڭ تىكەلەي ەفيردەگى حابارلارى ساعات 03:55-تە باستالادى.
ويىنداردىڭ اشىلۋ سالتاناتىن وتكەن عاسىردىڭ سوناۋ 50-ءشى جىلدارىنان بەرى اياسىنا 200 مىڭ ادامدى سىيعىزا الاتىن الەمدەگى ەڭ ۇلكەن فۋتبول ستاديونى رەتىندە بەلگىلى بولىپ كەلە جاتقان, كەيىن وسى زامانعا لايىقتالىپ قايتا جاساقتالعاندا, «ماريو فيليۋ» دەگەن ات الىپ, 80 مىڭ ورىندىق بولىپ جاڭاشا ورنىققان سپورت ارەناسىنىڭ تورىندە قانات جايادى. بۇل ايتۋلى الامانعا قازاقستاننان سپورتتىڭ 26 ءتۇرى بويىنشا 104 اتلەت قاتىسادى. وسى دەلەگاتسيامەن بىرگە «ەگەمەن قازاقستاننىڭ» ارناۋلى ءتىلشىسى باقتيار تايجان دا برازيليا جەرىنە اتتانىپ كەتتى. كەشە ونىڭ سول ساپاردان جازىلعان العاشقى جولجازباسىن جاريالاپ تا ۇلگەردىك. اللا جازسا, باسىلىم وكىلى بۇدان كەيىن دە وسىناۋ باسىرەلى باسەكەدەن كۇندەلىكتى اقپار-حابارلارى مەن رەپورتاجدارىن جونەلتىپ تۇراتىن بولادى. ءبىز سولاردىڭ اراسىندا ەل-جۇرتىمىزدان «ءسۇيىنشى» سۇراعان اقجولتاي حابارلار كوبىرەك بولسا ەكەن دەپ تىلەيمىز.
ءبىر ايتا كەتەتىن جايت, ريو-دە-جانەيرو ءۇشىن بۇل وليمپيادانى وتكىزۋ قۇقىعىن جەڭىپ الۋ وڭايعا سوعا قويماپتى. ول مۇنداي ءمارتەبەگە 80 جىلدان بەرى 5 رەت قول سوزىپ كورگەن ەكەن. العاش رەت تىلەكتى 1936 جىلعى وليمپيادا ءۇشىن ءبىلدىرىپ كورىپتى. سودان كەيىن 1940, 2004, 2012 جىلدارعى ويىندارعا دا قاتتى ءۇمىتى بولعان. بىراق, سولاردىڭ ەشقايسىسىندا دا دەگەنىنە جەتە الماعان. سودان كەيىن 2007 جىلى 2016 جىلعى وليمپيالىق ويىنداردى وتكىزۋگە تاعى تالپىنىس جاساعان. ونىمەن بىرگە جەتى قالا باسەكەگە تۇسكەن. سولاردىڭ تورتەۋى – مادريد, ريو-دە-جانەيرو, توكيو جانە چيكاگو تالاستىڭ فينالدىق بولىگىنە شىققان. بۇلاردىڭ اراسىنان ناعىز لايىقتىنى سۇرىپتاپ شىعارۋ ءراسىمى حالىقارالىق وليمپيالىق كوميتەتتىڭ (حوك) 2009 جىلعى 2 قازان كۇنى دانيانىڭ استاناسى – كوپەنگاگەن قالاسىندا وتكەن 121-سەسسياسى بارىسىندا جاسالعان. وسى سىناقتا مارەگە ريونىڭ اتى بارىنەن وزىپ كەلگەن.
قازىر الەمنىڭ ءتۇرلى اقپارات قۇرالدارىندا اتالعان قالانىڭ ويىندارعا تولىق دايىن ەمەس ەكەندىگى جونىندە ءار قيلى الىپ-قاشتى اڭگىمەلەر ايتىلىپ قالىپ جاتىر. بىراق ءبىز ءوزىمىز بارىپ كورمەگەن نارسە جايىندا پالەندەي ءبىر پىكىر ايتۋدان اۋلاقپىز. ءبىز تەك قاي جاعىنان العاندا دا, ءبارىنىڭ ءساتىن سالۋىن تىلەيمىز. ويىنداعى جارىستار دا قىزىقتى بولىپ ءوتسىن, ونداعى قاۋىپسىزدىك ماسەلەسى دە جوعارى دەڭگەيگە جەتسىن, سپورتشىلارعا جاسالاتىن جاعداي دا كوڭىلدەن شىقسىن, سونىڭ ءبارىنىڭ قورىتىندىسىندا قازاق ەلىنىڭ ساڭلاقتارى جۇرتى كۇتكەندەگىدەي ۇلكەن جەڭىستەرمەن ورالسىن. مۇندا تاعى دا كەيىن ەلدى ۇدەرە كوتەرىپ ءجۇرەتىن دوپينگ داۋى تۋىپ جۇرمەسىن. ايتۋلى الامان ءوزىنىڭ مەرەيلى مارتەبەسىنە ساي ناعىز ءادىل دە ادال سايىستىڭ ارناسىنا اينالسىن.
ەندىگى ءبىر ايتار جايت, ريوداعى ويىنداردىڭ رەسمي ۋاقىتى 16 كۇن سانالعانىمەن, وندا جالپى جارىستارعا بولىنگەن مەرزىم 19 كۇنگە سوزىلعالى تۇر. ولاي بولاتىنى, وليمپيادانىڭ فۋتبول ءتۋرنيرى 3 تامىز كۇنى باستالىپ كەتكەن. ول تۇسىنىكتى دە. مۇنداي كەز كەلگەن جارىستىڭ باستالعان شاعى ونىڭ رەسمي اشىلعان كەزىنەن قاشاندا بىرەر كۇن الدا جۇرەدى. بۇعان قوسارىمىز, ريودا العاش رەت 306 مەدالدار جيىنتىعى ساراپقا سالىناتىن بولادى. بۇل – رەكورد! تاعى ءبىر رەكورد مۇندا ويىندارعا قاتىسۋشى ەلدەر سانى بويىنشا جاسالىپ جاتىر. ۇيىمداستىرۋشىلار برازيليا جەرىندە 207 ەلدىڭ قۇراما كوماندالارى كۇش سىناساتىندارىن الدەقاشان ايتىپ قويعان. بۇلاردىڭ ساپى وسى جولى كوسوۆو جانە وڭتۇستىك سۋدان سپورتشىلارىمەن تولىقتى. مۇنىڭ سىرتىندا حوك اتىنان ءبىر كوماندا بولىپ تۇسەتىن ەۋروپانىڭ بوسقىندار جاماعاتى تاعى بار.
سولاردىڭ ءبارى دە بەلگىلى ءبىر جەڭىستەردەن ءۇمىتتى. تەك ول جەڭىستەردىڭ ءباسى مەن بەدەلى اركىم ءۇشىن ءارتۇرلى بولۋى زاڭدى نارسە. «باستىسى – جەڭۋ ەمەس, قاتىسۋ» دەگەندى بىلدىرەتىن وليمپيالىق قوزعالىستىڭ باستى ۇراندارىنىڭ بىرىنە سايساق, ءبىز وسىناۋ الامانعا جۇزدەن استام جۇيرىگىمىزدى ۇكىلەپ, جولعا سالىپ جىبەرۋىمىزدىڭ وزىنە تاۋبەشىلىك ايتۋىمىز كەرەك. بىراق سول وليمپيادا ۇستاناتىن «Citius, Altius, Fortius!» دەگەن دەۆيزگە ەلىكسەك, ءبىزدىڭ ونداعى جان الىپ, جان بەرىسەتىن جارىستاردا «جىلدام, جوعارى, كۇشتى» بولىپ كورىنبەۋگە تاعى قۇقىمىز جوق. ونىڭ ۇستىنە, قازاقستان تاۋەلسىزدىك العان جىلداردان بەرى ءوزىنىڭ الەمدەگى الدىڭعى قاتارلارداعى سپورت دەرجاۆالارىنىڭ ءبىرى ەكەنىن ۇدايى تانىتۋمەن كەلەدى. سوندىقتان, جاراتقان حوش كورسە, ءبىزدىڭ سول دەڭگەي مەن بەدەلدەن ءبىر مىسقال دا تۇسكىمىز جوق. دەمەك, برازيليا جەرىنە اتتانعان جىگىتتەرىمىز بەن قىزدارىمىزدان جەڭىستى جاڭالىقتار كۇتەمىز.
ءبىز بۇل جەردە بۇعان دەيىنگى بەس وليمپيادادا العان مەدالدارىمىز بەن چەمپيوندىعىمىزدىڭ سانىن قايتادان ەسەپشوتقا سالىپ, بۇرىنعىنىڭ ءبارىن بەتكە ۇستاي بەرۋدەن دە اۋلاقپىز. وتكەن كۇندەر ارتتا قالدى. ال الداعى كۇن – اللانىڭ ەنشىسىندە. سول جاراتقاننىڭ ەركىندەگى مەزگىلدىڭ ءبىزدىڭ ساڭلاقتار ءۇشىن مەيىرى مەن مەيىرىمى كوپ بولسىن. ۇلى ءدۇبىردىڭ دۇرمەگىندە قازان اۋزى جوعارى تۇرسىن! ىسكە ءسات, تارلاندار!
سەرىك ءپىرنازار,
«ەگەمەن قازاقستان»
نار قىز
ودان ەل جانكۇيەرلەرى ۇلكەن ءۇمىت كۇتەدى
بارشا قازاقستاندىق جانكۇيەر قاۋىم بۇگىن برازيليادا باستالاتىن جازعى وليمپيادا ويىندارىنا اتتانعان سپورتشىلارىمىزدان ۇلكەن ءۇمىت كۇتىپ وتىر. ولاردىڭ ءبارى دە الەمدىك الاپات باسەكەدە ايانىپ قالماسى انىق. دەگەنمەن, سپورتشىنىڭ دا سپورتشىسى بار. باستى سەنىم ەڭ الدىمەن سولارعا ارتىلادى.
بۇل تۇرعىدا ايەلدەر كۇرەسى بويىنشا وليمپيادادا باق سىنايتىن قازاقستاندىق ايەلدەر كۇرەسىنىڭ تۋ ۇستاۋشىسى ەكاتەرينا لاريونوۆانىڭ ورنى بولەك. بۇگىندە وتانداستارىمىزدىڭ اراسىندا وعان تىلەكشى, جاناشىر ءارى جانكۇيەر بولىپ وتىرعاندار جەتكىلىكتى. بۇلاي بولۋىنىڭ وزىندىك سىرى دا جوق ەمەس. ويتكەنى, ول بۇگىنگى كۇنگە دەيىن ءوزى قالاعان سپورتتىڭ ءتۇرى بويىنشا بىردە-ءبىر قازاقستاندىق ايەل سپورتشى جەتە الماعان اسۋلار مەن بيىكتەرگە قول جەتكىزدى. سونىڭ ىشىندە ەلىمىزدىڭ نار قىزى بىرنەشە دۇركىن الەم چەمپيونى اتاعىنا يە بولدى. قازاق سپورتىنىڭ تاريحىندا ءوز پەرزەنتىن ۇلكەن سپورتقا اكەسى باۋلىعان مىسالدار اسا ءبىر كوپ تە بولماسا كەرەك. بۇل تۇجىرىمنىڭ اكەلى-قىزدى الەكسەي مەن ەكاتەرينا لاريونوۆتارعا تىكەلەي قاتىسى بار. ۇزىن ءسوزدىڭ قىسقاسى, ەكاتەرينانىڭ جاتتىقتىرۋشىسى ءوزىنىڭ اكەسى – الەكسەي لاريونوۆ.
ونى جاراعان اتتاي ءدال وسى كۇنگە دەيىن جەتكىزىپ, جاتتىقتىرعان ا.لاريونوۆقا ەل ريزاشىلىعى شەكسىز. وسى ارادا وقىرماندارىمىزعا تاعى ءبىر شەتىن سىردى ايتا كەتۋدىڭ ورايى كەلىپ تۇر. اكە مەن قىزدىڭ اق تەر, كوك تەر بولىپ جاتتىعاتىن جەرى اتشاپتىرىم سپورتزال ەمەس, وزدەرىنىڭ تۇراتىن ءۇيى. ەكاتەرينا سوڭعى رەت ايەلدەر كۇرەسى بويىنشا بۇدان بىرەر جىل بۇرىن الەم چەمپيونى بولىپ ورالعان كەزدە جاناشىر اكە, بايىپتى باپكەر الەكسەي لاريونوۆتىڭ ۇيلەرىنە كەلىپ قۇتتىقتاعان كەزىمىز دە بولعان-دى.
مىنە, ريو-دە-جانەيروداعى وليمپيادا الاۋى تۇتانار تۇستا تاعى دا وسى ءۇيدىڭ ەسىگىن قاعىپ تۇرمىز. ابىروي بولعاندا, باپكەر اكە ۇيىندە بولىپ شىقتى. اماندىق-ساۋلىقتان سوڭ اڭگىمە اۋانى ەكاتەريناعا قاراي ويىستى. حالقىمىز بالاسى اتقا شاپسا, اتا-اناسى تاقىمىن قىسىپ وتىراتىنىن ايتادى عوي. ەسىمى بارشا ورال وڭىرىنە كەڭىنەن تانىمال باپكەر, كۇرەس سپورتىنىڭ قابىرعالى وكىلى الەكسەي لاريونوۆ بىزگە ءدال وسىنداي كوڭىل كۇيدە جۇرگەندەي اسەر قالدىردى. بەت-الپەتى مەن جانارىندا تۇڭعيىق ويدىڭ ۇشقىنى بايقالادى. قويىلعان ساۋالىمىزعا ول كىسى بارشا ەلىمىز ۇلكەن ءۇمىت كۇتىپ وتىرعان ءوز قىزىنا قاتىستى اڭگىمەسىن تومەندەگىشە باستاپ كەتتى.
– ارينە, مەن بۇگىنگى كۇنى قىزىم ءۇشىن وتە قاتتى الاڭداپ وتىرمىن. ارتىق ايتقاندىعىم ەمەس, ول – ەرىك-جىگەرى مەن كۇش-قايراتى وتە مول كۇرەس شەبەرى. بۇل اراداعى مەنى قاتتى تولعاندىراتىن ءارى كۇندىز-ءتۇنى ويىمنان كەتپەي ويلاندىراتىن باستى ءبىر گاپ, باستى ءبىر ماسەلە – وعان ەلىمىزدە ءدال ءوزىنىڭ دەڭگەيىندە تەڭ دارەجەدە جاتتىعاتىن بىردە-ءبىر ايەل- سپورتشىنىڭ بولماۋى. سوندا كاتيا قايتەدى؟ باسقا امالدىڭ جوقتىعىنان جاتتىعۋ ءۇشىن سپورتتىڭ وسى تۇرىندەگى ەرلەرمەن كۇرەس كىلەمىنە شىعادى. مەنى تاعى ءبىر الاڭداتىپ وتىرعان جايت – ەكاتەرينا وسىدان ءۇش اپتا بۇرىن يسپانيادا وتكىزىلگەن حالىقارالىق جارىستا جاراقات العان بولاتىن. وعان ميى شايقالعان دەگەن دياگنوز قويىلدى. سوندىقتان, وليمپياداعا جۇرەتىن كەزگە دەيىن دارىگەرلەردىڭ باقىلاۋىندا بولىپ كەلدى. الايدا, ءدال قازىرگى ساتتە مەنى قۋانتىپ وتىرعان جاعداي كاتيۋشا وليمپيادانىڭ الدىنداعى كۇندەردە جاتتىعۋىن تىنباي ۇزدىكسىز جۇرگىزىپ, برازيليانىڭ تابيعاتى مەن كليماتتىق ەرەكشەلىگىنە تەز بەيىمدەلە ءبىلىپتى.
– قازىر قالاي, بويىڭىزدا تولقۋ سەزىمى بار ما؟
– ارينە, تولقۋ بولادى عوي. بۇل تابيعي جايت. مۇنداي تولقۋ تەك مەنىڭ عانا ەمەس, بارلىق اتا-انالاردىڭ باسىندا كەزدەسەدى. جوعارىدا مەن كاتياعا ەلىمىزدە وعان ايەلدەر كۇرەسى بويىنشا تەڭ كەلەتىن ەشكىم جوق ەكەنىن ايتتىم ەمەس پە؟ ال برازيليادا ول وسىنداي وزىنە تەڭ كەلەتىن تەڭدەستەرىمەن كىلەمگە شىعادى. «كۇش اتاسىن تانىماس» دەگەندەي, ولاردىڭ اراسىندا كاتيۋشادان كۇشى ارتىق ايەل-سپورتشىلار دا تابىلۋى مۇمكىن. دەگەنمەن, مەن باق شاپپايدى, باپ شابادى دەگەن ويعا كوبىرەك قۇلاق تۇرەمىن.
– قىزىڭىزدىڭ وليمپيادا كەزىندەگى سايىسىن كورۋ ءۇشىن برازيلياعا بارۋدى جوسپارلاعان جوقسىز با؟
– جاتتىقتىرۋشىلارعا وليمپياداعا بارۋ ءۇشىن قاراجات كوزدەرى قاراستىرىلماعان. ارينە, ريو-دە-جانەيروداعى كۇرەس كىلەمى ۇستىندە قىزىمنىڭ سايىسىن ءوز كوزىممەن كورىپ, وعان قولداۋ جاساۋ مۇمكىندىگى بولماعانىنا ازداپ وكىنەمىن دە.
– قالاي ويلايسىز, ەكاتەرينانىڭ التىن الۋعا مۇمكىندىگى بار ما؟
– الدىن الا بال اشپاي-اق قويايىن. دەگەنمەن, تورەشىلەر ءادىل باعالاسا, قىزىمنىڭ وليمپيادادان جۇلدەسىز ورالمايتىنىنا سەنىمىم مول.
ءبىز دە باپكەر اكە الەكسەي لاريونوۆتىڭ وسى تىلەگىنە قوسىلا وتىرىپ, ەلىمىزدىڭ نار قىزى ەكاتەريناعا ۇلكەن تابىس تىلەمەكپىز.
تەمىر قۇسايىن,
«ەگەمەن قازاقستان»
ورال
ريودا 1,5 ملن. بيلەت ساتىلماي قالدى
ريو-دە-جانەيروداعى وليمپيالىق ويىندار جارىسىنا شىعارىلعان بيلەتتەردىڭ 1,5 ملن. داناسى ساتىلماعانى بەلگىلى بولدى. ۇيىمداستىرۋشىلار تريبۋنالارداعى بوس ورىندارعا ەندى مەكتەپ وقۋشىلارىن جىبەرۋدى جوسپارلاپ وتىر.
ويىندار باعدارلاماسىنداعى كوپتەگەن سپورت جارىستارىنىڭ بيلەتتەرى وتپەي قالعان. سونىڭ ىشىندە جەڭىل اتلەتيكا سايىستارىنىڭ جانكۇيەر قامتۋى ونشالىقتى اۋقىمدى ەمەس كورىنەدى. انشلاگ تەك تەننيس تۋرنيرىندە, ءجۇزۋ مەن ترياتلوندا, سونداي-اق ۆولەيبول (سونىڭ ىشىندە جاعاجاي ۆولەيبولى دا بار), فۋتبول مەن باسكەتبول جارىستارىندا عانا بولاتىن ءتۇرى بار.
دامير قوجامقۇل
ريو-2016 ويىندارىنا قاتىساتىن قازاقستان قۇراماسى:
- جەڭىل اتلەتيكا
(26 سپورتشى)
الەكساندرا رومانوۆا (400 مەترگە كەدەرگىمەن جۇگىرۋ)
اناستاسيا كۋدينوۆا (400 مەترگە جۇگىرۋ)
اناستاسيا پيليپەنكو (100 مەترگە كەدەرگىمەن جۇگىرۋ)
اناستاسيا تۋلاپينا (4×100 مەترلىك ەستافەتا)
ۆيكتوريا زيابكينا (100 جانە 200 مەترلەرگە جۇگىرۋ, 4×100 مەترلىك ەستافەتا)
گەورگي شەيكو (20 شاقىرىمعا ءجۇرۋ)
گۇلجانات جاناتبەك (مارافون)
ديانا ايدوسوۆا (20 شاقىرىمعا ءجۇرۋ)
دميتري كوبلوۆ (400 مەترگە كەدەرگىمەن جۇگىرۋ)
ەۆگەني لابۋتوۆ (ديسك لاقتىرۋ)
ەكاتەرينا ەكتوۆا ء(ۇش قارعىپ سەكىرۋ)
ەلەنا ميحينا (400 مەترگە جۇگىرۋ)
يۆان يۆانوۆ (يادرو لاقتىرۋ)
يرينا سمولنيكوۆا (مارافون)
يرينا ەكتوۆا ء(ۇش قارعىپ سەكىرۋ)
مارگاريتا مۇقاشەۆا (800 مەترگە جۇگىرۋ)
ماريا تەلۋشكينا (ديسك لاقتىرۋ)
ميحايل كراسيلوۆ (مارافون)
ولگا رىپاكوۆا ء(ۇش قارعىپ سەكىرۋ)
ولگا سافرونوۆا (100 جانە 200 مەترلەرگە جۇگىرۋ, 4×100 مەترلىك ەستافەتا)
پولينا رەپينا (20 شاقىرىمعا ءجۇرۋ)
رومان ۆاليەۆ ء(ۇش قارعىپ سەكىرۋ)
ريما كاشافۋتدينوۆا (100 مەترگە جۇگىرۋ, 4×100 مەترلىك ەستافەتا)
سۆەتلانا گولدەنكوۆا (4×100 مەترلىك ەستافەتا)
فلوريدا مينيانوۆا (20 شاقىرىمعا ءجۇرۋ)
يۋليا راحمانوۆا (4×100 مەترلىك ەستافەتا)
- بايداركا مەن كانوەدا
ەسۋ (11)
اندرەي ەرگۋچيوۆ (ەكى كىسىلىك بايداركا – 200 م, ءتورت كىسىلىك بايداركا – 1000 م)
الەكساندر ەمەليانوۆ ء(تورت كىسىلىك بايداركا – 1000 م)
الەكسەي دەرگۋنوۆ (ەكى كىسىلىك بايداركا – 1000 م)
ەۆگەني الەكسەەۆ ء(بىر كىسىلىك بايداركا – 1000 م, ءتورت كىسىلىك بايداركا – 1000 م)
زويا انانچەنكو ء(بىر كىسىلىك بايداركا – 500 م, ءتورت كىسىلىك بايداركا – 500 م)
يليا گولەندوۆ (ەكى كىسىلىك بايداركا – 1000 م, ءتورت كىسىلىك بايداركا – 1000 م)
يرينا كلينوۆا ء(بىر كىسىلىك بايداركا – 200 م, ءتورت كىسىلىك بايداركا – 500 م)
يرينا پودوينيكوۆا (ەكى كىسىلىك بايداركا – 500 م, ءتورت كىسىلىك بايداركا – 500 م)
ناتاليا سەرگەەۆا (ەكى كىسىلىك بايداركا – 500 م, ءتورت كىسىلىك بايداركا – 500 م)
سەرگەي توكارنيتسكي ء(بىر كىسىلىك بايداركا – 200 م, ءتورت كىسىلىك بايداركا – 1000 م, ەكى كىسىلىك بايداركا – 200 م)
تيمۋر حايداروۆ ء(بىر كىسىلىك كانوە –1000 م, ءبىر كىسىلىك كانوە – 200 م)
- بوكس, ەرلەر (10)
ءبىرجان جاقىپوۆ (49 كگ)
ولجاس ساتتىباەۆ (52 كگ)
قايرات ەراليەۆ (56 كگ)
بەرىك ءابدىراحمانوۆ (60 كگ)
ابىلايحان ءجۇسىپوۆ (64 كگ)
دانيار ەلەۋسىنوۆ (69 كگ)
جانىبەك ءالىمحان ۇلى (75 كگ)
ادىلبەك نيازىمبەتوۆ (81 كگ)
ۆاسيلي لەۆيت (91 كگ)
يۆان دىچكو (+91 كگ)
- اۋىر اتلەتيكا (8)
مارگاريتا ەليسەەۆا (48 كگ)
ارلي چونتەي (56 كگ)
فارحاد حاركي (62 كگ)
كارينا گوريچەۆا (63 كگ)
جازيرا جاپپارقۇل (69 كگ)
نيدجات راگيموۆ (77 كگ)
دەنيس ۋلانوۆ (85 كگ)
الەكساندر زايچيكوۆ (105 كگ)
- دزيۋدو (6)
گالبادراح وتگونتسەتسەگ (48 كگ)
ەلدوس سمەتوۆ (60 كگ)
ماريان ورداباەۆا (63 كگ)
جانساي سماعۇلوۆ (66 كگ)
ديدار حامزا (73 كگ)
ماكسيم راكوۆ (100 كگ)
- ەركىن كۇرەس (5)
نۇريسلام ساناەۆ (57 كگ)
عالىمجان وسەرباەۆ (74 كگ)
اسلان كاحيدزە (86 كگ)
مامەد يبراگيموۆ (97 كگ)
داۋلەت شابانباي (125 كگ)
- ايەلدەر كۇرەسى (4)
جۇلدىز ەشىموۆا (48 كگ)
ەكاتەرينا لاريونوۆا (63 كگ)
ەلميرا سىزدىقوۆا (69 كگ)
گۇزەل مانيۋروۆا (75 كگ)
- مىلتىق اتۋ (4)
ۆلاديمير يساچەنكو (پنەۆماتيكالىق تاپانشا – 10 م, تاپانشا – 50 م)
ەليزاۆەتا كورول (پنەۆماتيكالىق ۆينتوۆكا – 10 م, ءۇش ءتۇرلى سيپاتتان اتىلاتىن ۆينتوۆكا – 50 م)
راشيد يۋنۋسمەتوۆ (پنەۆماتيكالىق تاپانشا – 10 م, تاپانشا – 50 م)
يۋري يۋركوۆ (ۆينتوۆكادان جاتىپ اتۋ – 50 م, ءۇش ءتۇرلى سيپاتتان اتىلاتىن ۆينتوۆكا – 50 م, پنەۆماتيكالىق ۆينتوۆكا – 10 م)
- گرەك-ريم كۇرەسى (3)
المات كەبىسباەۆ (59 كگ)
دوسجان قارتىقوۆ (75 كگ)
نۇرماحان تىناليەۆ (130 كگ)
- تاەكۆوندو (3)
اينۇر ەسبەرگەنوۆا (49 كگ)
جانسەل دەنيز (67 كگ)
رۋسلان جاپاروۆ (+80 كگ)
- ايەلدەر بوكسى (2)
جاينا شەكەربەكوۆا (51 كگ)
داريعا شاكيموۆا (75 كگ)
- ۆەلوسپورت, تاسجول (2)
اندرەي زەيتس (توپتىق جارىس)
باقتيار قوجاتاەۆ (توپتىق جارىس)
- ساداق اتۋ (2)
لۋيزا سايديەۆا (جەكەلەي بىرىنشىلىك)
سۇلتان دۇزەلباەۆ (جەكەلەي بىرىنشىلىك)
- اكادەميالىق ەسۋ (2)
ۆلاديسلاۆ ياكوۆلەۆ (جەكەلەي جارىس)
سۆەتلانا گەرمانوۆيچ (جەكەلەي جارىس)
- قازىرگى زامانعى بەسسايىس (2)
ەلەنا پوتاپەنكو
پاۆەل يلياشەنكو
- سينحروندى ءجۇزۋ (2)
الەكساندرا نەميچ (دۋەت)
ەكاتەرينا نەميچ (دۋەت)
- ءجۇزۋ (2)
دميتري بالاندين (100 م – براسس, 200 م – براسس)
ەكاتەرينا رۋدەنكو (100 م – شالقالاي)
- تەننيس (2)
گالينا ۆوسكوبوەۆا (جەكەلەي جارىس, جۇپتاسىپ ويناۋ)
ياروسلاۆا شۆەدوۆا (جۇپتاسىپ ويناۋ)
- ۆەلوترەك (1)
ارتەم زاحاروۆ (ومنيۋم)
20.ستەند اتۋ (1)
ماريا دميتريەنكو (تراپ)
- سەمسەرلەسۋ (1)
يليا موكرەتسوۆ (سەمسەر)
- ۇستەل تەننيسى (1)
كيريلل گەراسيمەنكو (جەكەلەي جارىس)
- كوركەم گيمناستيكا (1)
سابينا اشىرباەۆا (جەكەلەي كوپسايىس)
- ەسكەك سلالومى (1)
ەكاتەرينا سميرنوۆا ء(بىر كىسىلىك كانوە)
- باتۋتتا سەكىرۋ (1)
ءپىرماماد اليەۆ
- اشىق سۋدا ءجۇزۋ (1)
ۆيتالي حۋدياكوۆ (10 شاقىرىمدىق مارافون).
پەلە وليمپيادا الاۋىن جاعۋعا ۇسىنىس الدى
برازيليا قۇراماسى ساپىندا الەمنىڭ ءۇش دۇركىن چەمپيونى اتانعان اتى اڭىزعا اينالعان فۋتبولشى پەلە ريو-دە-جانەيرودا وتەتىن ريو-2016 ويىندارىنىڭ وليمپيالىق الاۋىن جاعۋ جونىندە ۇسىنىس الدى.
ويىنداردىڭ اشىلۋ سالتاناتى 6 تامىزعا قاراعان ءتۇنى «ماراكانا» ستاديونىندا وتەدى. وسى ستاديوندا پەلە 1969 جىلى ءوزىنىڭ فۋتبول ومىرىندەگى 1000-ىنشى گولىن سوققان ەدى.
«فۋتبول كورولىنىڭ» ءوزى ايتقانداي, الاۋدى تۇتاتۋدى ودان حالىقارالىق وليمپيالىق كوميتەتتىڭ پرەزيدەنتى توماس باحتىڭ جەكە ءوزى مەن وليمپيادا-2016 ۇيىمداستىرۋ كوميتەتىنىڭ باسشىسى ارتۋر نۋزمان وتىنگەن ەكەن. الايدا, فۋتبولشىعا بۇل ۇسىنىستى قابىلداۋعا دەمەۋشىلىك كەلىسىمشارت بويىنشا موينىنا العان مىندەتتەرى كەدەرگى كەلتىرۋى مۇمكىن.
«مەنىڭ ورىنداۋدى تالاپ ەتەتىن كەلىسىمشارتىم بار. بىراق مەن برازيليا ازاماتى رەتىندە مۇنى (ويىندار الاۋىن جاعۋدى) جاساعىم كەلەدى», – دەدى 75 جاستاعى پەلە. ول بۇل سۇراققا جاۋاپتى بەيسەنبى كۇنى بەرە الاتىنىن مالىمدەدى.
بەتتى دايىنداعان سەرىك ءپىرنازار, «ەگەمەن قازاقستان»
