دۋبايداعى توتەنشە جاعدايدى انىقتاۋ ءۇشىن ءۇش اي ۋاقىت كەتەدى

[caption id="attachment_54631" align="aligncenter" width="700"] فوتو: ria.ru[/caption] دۋباي اۋەجايىندا بولعان توتەنشە جاعدايدى تولىعىمەن انىقتاۋ ءۇشىن ءۇش اي ۋاقىت كەتەدى. بۇل تۋرالى بىرىككەن اراب امىرلىگىنىڭ ازاماتتىق اۆياتسيا باسقارماسى مالىمدەدى. ايتا كەتەيىك, كەشە دۋباي اۋەجايىندا قونعان Emirates اۋە كومپانياسىنىڭ Boeing 777 ۇشاعى ورتكە وراندى. اۆياكومپانيا وكىلدەرى لاينەر ءۇندىستاننىڭ تيرۋۆانانتاپۋرام قالاسىنان دۋبايعا ۇشىپ كەلگەنىن ايتتى. جەرگىلىكتى ۋاقىت بويىنشا ساعات 12:45 شاماسىندا اۋەجايدىڭ ۇشىپ-قونۋ جولاعىنا اپاتتى جاعدايدا قونعان ۇشاق جانىپ كەتتى. ريا «نوۆوستي» اقپارات اگەنتتىگىنىڭ حابارلاۋىنشا, ۇشاق بورتىندا 282 جولاۋشى جانە 18 ەكيپاج مۇشەسى بولعان. 14 ادام ءيىس ءتيىپ اۋرۋحاناعا تۇسكەن. وكىنىشكە وراي, ءتىلسىز جاۋدى ءسوندىرۋ كەزىندە دۋباي اۋەجايى ازاماتتىق قورعانىس باسقارماسىنىڭ ءبىر قىزمەتكەرى وپات بولدى. «اەروپورتقا قونار كەزىندە جوعارى كوتەرىلىپ بارىپ, جەرگە سوعىلعانى ەسىمدە. ۇشاقتىڭ ءىشى تۇتىنگە تولعاندا بىرنارسەنىڭ دۇرىس ەمەستىگىن تۇسىندىك. ءبارىمىز جانۇشىرا ەسىككە قاراي ۇمتىلدىق. قىرسىققاندا العاشىندا اپاتتىق ەسىكتى اشۋ قيىن بولدى. ەگەر ءبىز ءبىر مينۋت كەشىككەنىمىزدە تىرىدەي جانىپ كەتەر ەدىك», – دەدى جولاۋشىلاردىڭ ءبىرى. ايان ءابدۋالي