شوۋلارعا قاشانعى شاشىلامىز؟

دەپۋتاتتار جارتى ميلليارد تەڭگەنى قۇتقارىپ قالدى ماڭعىستاۋدا جىلدا وتەتىن ۇلكەن شوۋلاردىڭ ءبىرى وبلىستىق ءماسليحات دەپۋتاتتارى تاراپىنان سىنعا الىنىپ, كەرى قايتارىلدى. وڭىردەگى بيىل ءۇشىنشى رەت وتكىزىلۋى جوسپارلانعان «Aktau Open Fest» شاراسىنىڭ بيۋد­جەتتىڭ قالتاسىنا سالار سالماعى وتە اۋىر ەدى. 2014 – 2015 جىلدارى بىرنەشە ميلليونداردى جەل­گە ۇشىرعان اتالعان جوبا بيىل كۇشىنە قايتا ءمىنىپ, اۋىزدى ارانداي اشىپ, وبلىس بيۋد­جەتىنە قول سالعان ەدى. سۇراپ وتىرعان قارجىسى 550 ملن. تەڭگە! ناقتىراق ايتساق, 300 ملن. تەڭگەنى بيۋدجەتتەن, ال 250 ملن. تەڭگەنى مۇناي كومپانيا­لارىن تارتۋ ارقىلى تابۋ جوسپارلانعان. ماڭعىستاۋ وبلىستىق ءماسلي­حاتى­نىڭ ەكىنشى سەسسياسى قار­ساڭىنداعى تۇراقتى كەڭەس وتىرىسىندا بۇل ماسەلە تارتىستى پىكىرتالاسقا نەگىز بولدى. جارتى ميللياردتان استام تەڭگەنىڭ شوۋ-شۋعا جۇمسالعالى تۇرعانىن كورگەن س.مۇساباەۆ, ن.سارسەنباي, ا.سالمانوۆ, م.دۇيسەنباي, تاعى دا باسقا دەپۋتاتتار بىردەن نارازىلىق تانىتادى. دەپۋتاتتاردىڭ نارازى پىكىرى بۇعان دەيىن باس شۇلعي بەرگەنگە ابدەن ەتى ۇيرەنىپ كەتكەندەر ءۇشىن توسىن, ياعني كۇتپەگەن جاعداي بولعان سياقتى. بيۋدجەتتى قورعاۋعا كەلگەن وبلىس اكىمى­نىڭ ەكونوميكا بويىنشا ورىن­باسارى ش.يلمۇحامبەتوۆا سول جەرگە ماڭعىستاۋ وبلىسى اكىمىنىڭ كەڭەسشىسى ە.يسمايلوۆتى شاقىرتتى. الايدا, دەپۋتاتتار  ە.يسمايلوۆتىڭ ۋاجىنە قۇلاق اسپاي, تابانداپ وتىرىپ الدى جانە وسىنشا قارجى ءبولۋ جونىندەگى شەشىم بەكىتىلەتىن بولسا, مانداتتارىن تاپسىراتىنىن دا ايتتى. سەسسياداعى ايتىستى تىڭداعان ماڭعىستاۋ وبلىسىنىڭ اكىمى ا.ايدارباەۆ بۇل جولى كورەگەن­دىك تانىتىپ: «دەپۋتاتتار قارسى دەگەن ءسوز, دەمەك حالىق قارسى دەگەن ءسوز. حالىق قولداماعان شەشىمدى مەن دە قولدامايمىن!» – دەپ ءبىر-اق قايىرىپ, ايتىس-تارتىستىڭ نۇكتەسىن قويدى. وسىمەن اتالمىش فەستيۆالعا بيۋدجەتتەن قارجى بولىنبەيتىن بولدى. حالىق قالاۋلىلارى تەرەڭ تىنىستادى, بىراق فەستيۆالدىڭ قۇرىعى ۇزىن قۇرىلتايشىلارى قارجى «تاۋىپ» قالايدا وتكىزە مە, جوق پا؟ ماڭعىستاۋدا مول قارجىنى قاجەت ەتەتىن, بىراق حالىققا بەرەرى جوق, كەرىسىنشە, ەل اراسىندا تۇسىنبەۋ­شىلىككە, ءتىپتى, الەۋمەتتىك جەلىلەردە نارازىلىققا تاپ بولىپ جاتقان شارالار مەن جوبالار ءبىر بۇل عانا ەمەس. سەمينارلار مەن فەستيۆالدار, كونفەرەنتسيالار مەن ترەنينگتەر, وقۋلار... بۇلاردىڭ ماڭىزى مەن ماقساتىن تەك ۇيىمداستىرۋشىلاردان باسقا ەشكىم تۇسىنبەيدى, ارنايى بەرىلگەن پرەسس-رەليزگە سۇيەنىپ بۇقارالىق اقپارات قۇرالدارىندا كورسەتەتىن جۋرناليستەرگە دە ولاردىڭ ىشكى دۇنيەسى جۇمباق.  گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى