سارمات زامانىنىڭ ساربازدارى

اقتوبەدەگى ارحەولوگيالىق قازبا جۇمىستارى كەزىندە تابىلعان بۇل ەسكەرتكىشتىڭ ەڭ باستى ەرەكشەلىگى – ولاردىڭ قارۋ-جاراقتارىمەن بىرگە جەرلەنگەندىگى. بيىلعى دالالىق ماۋسىمدا ۇلتتىق مۋزەيدىڭ «حالىق قازى­ناسى» عىلىمي-زەرتتەۋ ينستيتۋتى ەلىمىز بويىنشا ءاربىر تاريحي كەزەڭدى قامتيتىن 10-نان استام نىساندا ارحەولوگيالىق زەرتتەۋ جۇمىستارىن جۇرگىزۋدە. كەزەكتى زەرتتەۋدىڭ ءبىرى اقتوبە وبلىسىنىڭ قوبدا اۋدانىندا ورنالاسقان ج.س.د. VI–V عع. جاتاتىن ءتورتوبا جەرلەۋ-عۇرىپتىق كەشەنىندە جال­عاسقان بولاتىن. بۇل كەشەندەگى بيىلعى اتقا­رىلعان جۇمىستار مەن الىنعان ماعلۇماتتار تۋرالى ەكسپەديتسيا جەتەكشىسى, تاريح عىلىمدارىنىڭ كانديداتى اقان وڭعار ۇلى بىزگە قىسقاشا بايانداپ بەردى. –جەرگىلىكتى بيلىك اۋلەتى وكىلىنىڭ قۇرمەتىنە سالىنعان ءتورتوبا جەرلەۋ-عۇرىپتىق كەشەنىندەگى زەرتتەۋ جۇمىستارى 2011 جىلدان باس­تالدى. بەس جىلدىق كەشەندى زەرتتەۋلەر ناتيجەسىندە ەسكەرتكىشتىڭ اينالاسىنان 7 جەرلەۋ ورنى مەن 2 عۇرىپتىق ءراسىم اتقارعان نىساندار زەرتتەلىندى. ءىرى ساۋلەت ەسكەرتكىشى سانالاتىن ديامەترى 50 م, بيىكتىگى 4,7 م  توپىراق ءۇيىندىلى وبادا قۇرىلىستىڭ سالىنۋ كەزەڭدەرىن انىقتاۋعا بايلانىستى قازبا جۇمىستارىن جۇرگىزۋ بارىسىندا بيىل ەكى جاۋىنگەردىڭ تونالماعان قابىرى اشىلدى. بۇل جەرلەۋ عۇرپى نەگىزگى ەسكەرتكىش تۇرعىزىلعاننان بىرنەشە ءجۇز جىلدان كەيىن جاسالىنعان. «ەر قۋاتى – قارۋى» دەگەندەي, ەكى جاۋىنگەر اتۋ قارۋى – وققا تولى قورامساقتى ساداقپەن (ساداقتىڭ تەك ءىزى ساقتا­لىنعان), تۇيرەۋ قارۋى – تەمىر ۇشتى نايزاسىمەن جانە كەسۋ قارۋى – قىلىش, قانجارىمەن بىرگە جەرلەنگەن. وبا ءۇيىندىسىنىڭ ورتاسىنداعى نە­گىزگى قابىر شۇڭقىرىنىڭ شەتىنە قويىلعان ءۇشىنشى جاۋىنگەردىڭ قورام­ساعىنان 184 قولا جەبە تابىلدى. ازامات بيتان