استانادان اۋىلعا اۋىسقان

جاس مەملەكەتتىك قىزمەتشى كادرلىق رەزەرۆكە ەندى «مەملەكەتتىك قىزمەتكە ورنالاسۋ تەك كەشەندى ىرىكتەۋ مەن جۇمىستى تەك تومەنگى لاۋازىمداردان باستاۋدىڭ ناتيجەلەرى بويىنشا مۇمكىن بولادى» دەدى ەلباسى جىل باسىنداعى «ۇلت جوسپارى – قازاقستاندىق ارمانعا باستايتىن جول» اتتى باعدارلامالىق ماقالاسىندا. 100 ناقتى قادامدى جۇزەگە اسىرۋ تەتىكتەرىنىڭ ءبىرى سانالاتىن «مەملەكەتتىك قىزمەت تۋرالى» جاڭا زاڭ اياسىندا كۇشىنە ەنگەن تالاپ مەملەكەتتى كاسىبيلەندىرۋ العىشارتتارىنىڭ ءبىرى بولماق. پروۆينتسيادا تۋىپ, پاريجدە تۇرۋدى پوەزيا وكىلدەرى عانا ەمەس, وزگە كاسىپ يەلەرى دە قالايدى. اسىرەسە, البىرت جاستاردىڭ دەنى استانادان باقىت ىزدەيتىنى جاسىرىن ەمەس. ال ءبىزدىڭ كەيىپكەرىمىز – ەربولات مۇحامەدجانوۆ, كەرى­سىنشە, استانادان اۋىلعا اۋىسىپ كەلگەن, پرەزيدەنت ماقالاسىندا ايتىل­عانداي, مەملەكەتتىك قىز­مەتتى تومەنگى ساتىدان باستاعان ازا­مات. جيىرمانىڭ بەل ورتاسىنان اسقان ەربولات سەمەي قالاسىندا تۋىپ, ءۇرجار وڭىرىندەگى قارابۇتا اۋىلىندا ءوستى. بارقىتبەلدىڭ باۋ­رايىندا بالالىق بال كۇندەرىن وتكىزگەن ول 1995 جىلى قارابۇتا اۋىلىنداعى ورتا مەكتەپتىڭ تابالدىرىعىن اتتاپ, 2004 جىلى دارىندى بالالارعا ارنالعان قازاق ءتىلى مەن ادەبيەتىن تەرەڭ­دەتە وقىتاتىن رەسپۋبليكالىق مامان­داندىرىلعان مەكتەپ-ينتەرناتتا ءبىلىمىن جالعاستىردى. 2006-2012 جىلدار ارالىعىن­دا تۇرار رىسقۇلوۆ اتىنداعى قازاق ەكونوميكا جانە بيزنەس ۋني­­­ۆەر­سيتەتىندە «ەكونوميكا» ماماندىعى بويىنشا باكالاۆر­لىق جانە ماگيسترلىك ءبىلىم الدى. ول ءوزىن ءوزى سىناي بىلەتىن, قانداي ورتاعا تۇسسە دە ارىپتەس­تەرىمەن تەز ءتىل تابىساتىن جاس. جو­عارى وقۋ ورنىن بىتىرگەن جىلى العاشقى ەڭبەك جولىن قول­­­­دان­­بالى ەكونوميكالىق ورتا­لىق­تا ەكونوميكا ساراپشىسى رەتىندە باستادى. كەيىن الماتى ساۋدا پالاتاسى كاسىپ­كەرلىك مەكتەبىنىڭ ديرەكتورى بولىپ, بىرقاتار جوعارى وقۋ ورىندارىندا ءدارىس وقيدى. ت.رىسقۇلوۆ اتىنداعى قازاق ەكونوميكا جانە بيزنەس ۋنيۆەرسيتەتى مەن استانا قالاسىنداعى قازاق گۋما­ني­تار­لىق زاڭ ۋنيۆەر­سي­تەتىندە ۇستاز­دىق ەتە ءجۇرىپ, جەكە عىلىمي ءىز­دە­نىس­تەرىن جەتىلدىرە ءتۇستى. كوزى قاراقتى كورەرمەننىڭ جادىن­دا بولار, ە.مۇحامەدجانوۆ «قازاقستان» ۇلتتىق ارناسىندا «ەكونوميكا جاڭالىقتارى» ساراپتامالىق باعدارلاماسىنىڭ اۆتورى ءارى جۇرگىزۋشى-رەداكتورى بولدى. وسىنداي دۋماندى شاھار­دى, قىزىقتى ارىپتەستەر ورتاسىن قالدىرىپ, اۋىلعا اۋىس­قان ە.مۇحامەدجانوۆقا تاڭ­عالا قارايتىندار كوپ. الاي­دا, جاڭا ورتانى جاتسىنبايتىن جاس جارقىراعان قالادان شەكارالىق شالعاي اۋدانداردىڭ ءبىرى سانالاتىن ۇرجارعا كەلە سالىسىمەن, باستاپقىدا اۋدان اكىمىنىڭ كومەكشىسى, كەيىننەن اۋداندىق ىشكى ساياسات ءبولىمىنىڭ باس مامانى بولىپ مەملەكەتتىك قىزمەتكە بىلەك سىبانا كىرىسىپ كەتتى. – انام «قازپوشتا» مەكە­مە­سىندە جۇمىس ىستەيتىن. اراسىن­دا اۋدان ورتالىعىنداعى «قاز­پوشتاعا» ەسەپ بەرۋگە كەلەدى. اناما ەرىپ كەلەتىن مەن اۋدان اكىمدىگىنىڭ الدىنان ءوت­كەن كەزدە, بولاشاقتا وسى مەكەمە­دە قىزمەت ەتسەم دەپ ارماندايتىن ەدىم. وسىلايشا, جوعارى سى­نىپتا وقىعان كەزدە-اق ءومى­رىمدى مەملەكەتتىك قىزمەتكە ارناۋعا شەشىم قابىلدادىم. بالا كۇنگى تىلەگىمدى بىرتىندەپ ىسكە اسىرا باس­تادىم, – دەيدى ە.مۇحامەدجانوۆ. مەملەكەتتىك قىزمەتكە كەل­گەنىنە از عانا ۋاقىت بولعان جىگەر­لى جاس مۇنداعى ءتارتىپ پەن جاۋاپ­كەرشىلىكتىڭ سالماعىن سەزىنە باستاعانىن, ابىرويلى ءمىن­دەتكە نۇقسان كەلتىرمەۋگە بار كۇش-جىگەرىن ارناپ جاتقانىن جەتكىزدى. – مەنىڭ ويىمشا, اۋىلدى جەردە ەڭبەك ەتۋدىڭ ءوز ارتىق­شىلىعى بار. مەملەكەت باسشىسى ۇلت جوسپارىنداعى 100 ناقتى قادامدا كەز كەلگەن مەملەكەتتىك قىزمەتشى ەڭبەك جولىن تومەننەن باستاۋى تيىستىگىن ايتتى. سەبەبى, جوعارى مىنبەردەن ەڭبەك جولىن باستاعان قىزمەتكەر حالىقتىڭ مۇڭ-مۇقتاجىن تۇسىنە بەرمەيدى. تاڭەرتەڭ كىرسە, كەشكە بىراق شىعاتىن قالاداعى كابينەتتىك جۇمىس رەجيمى دە ەلمەن ەتەنە ارالاسۋعا كەدەرگى. ال وڭىرلەر­دە جۇمىس ىستەگەن مەملەكەتتىك قىزمەتكەر كۇن سايىن حالىقتى كورەدى, سوندىقتان, ماسەلەنىڭ ءتۇپ-تامىرى مەن ءمانىن جاقسى تۇسىنەدى, – دەيدى ول. ە.مۇحامەدجانوۆ از ۋاقىتتا شىعىس ءوڭىرىنىڭ جاستار كادرلىق رەزەرۆىنە ەنىپ ۇلگەردى. اتالعان جوبا جونىندە الەۋمەتتىك جەلى­لەردەن بىلگەن سوڭ بىردەن جوباعا قاتىسۋعا rezerv.kz. سايتىنا ءوتىنىش بىلدىرگەن ەكەن. «جاستار كادرلىق رەزەرۆى» پارتيالىق جوباسىنا قاتىسۋعا شىعىس قا­زاق­ستان وبلىسىنان 234 ادام ءوتى­نىش ءبىلدىردى. ولاردىڭ اراسىنان ەكىنشى كەزەڭگە 145 ادام وتسە, جوبا ەرەجەسىنە سايكەس, سوڭعى فينالدىق كەزەڭگە ءوزىن جان-جاقتى دالەلدەگەن 2 ادام وتكەن-ءدى. ە.مۇحامەدجانوۆ وسى قوس ۇزدىكتىڭ ءبىرى بولدى. بۇدان كەيىن قازاقستان رەس­پۋب­لي­كاسىنىڭ پرەزيدەنتى جانىن­داعى مەملەكەتتىك باسقارۋ اكا­دەمياسى مەن «نۇر وتان» پار­تياسىنىڭ ساياسي مەنەدجمەنت مەكتەبىندە تاجىريبە جيناقتادى. رەسپۋبليكالىق كوميسسيا الدىندا بايانداما جاساپ, تەست سىناعىنان مۇدىرمەدى. ەلباسىنىڭ «100 ناقتى قادام» ۇلت جوسپارى باعدارلاماسىن جۇزەگە اسىرۋ جولىندا مەملە­كەت­تىك قىزمەت مارتەبەسىن ءوسىرۋ تۋرالى مىندەتتەردىڭ ماڭىز­دى ەكە­نىن جاقسى بىلەتىن ە.مۇحا­مەد­جانوۆتىڭ وزىندىك ساراپتامالارى بار. ماسەلەن, تاۋار ءوندىرۋشى كومپانيالاردان الىناتىن سالىقتىڭ ساتۋ كولەمىنىڭ بەس پايىزىنان اسپاۋى, سوت قاۋلىسىنسىز نەمەسە قىلمىستىق ءىس قوزعالمايىنشا مەملەكەتتىك تەكسەرۋلەرگە تىيىم سالىنۋى, م ۇلىكتى ساتۋ جانە ساتىپ الۋعا, كومپانيا اشۋعا نوتاريالدىق راستاۋدىڭ جەتكىلىكتى بولۋى سىندى گەرمانيا, سينگاپۋر, جاپونيا مەن وڭتۇستىك كورەيادا قولدانىلاتىن جۇيەلەر العا جەتەلەيدى, – دەيدى ول. جاس وتباسىنىڭ ەگەسى بەلگىلى ساياساتك­ەرلەر مەن اتاقتى تۇلعا­لاردىڭ ءومىربايانىن وقىعاندى, ات سپورتى مەن اقىل-ويدى جەتىل­دى­رەتىن ويىنداردى ۇناتادى. – جۋىردا ۆياچەسلاۆ شەستاكوۆ­تىڭ «ۋينستون چەرچيلل. ينتەل­لەكتۋالنىي پورترەت» اتتى كىتابىن وقىدىم. ارقاشان اسكەري كە­يىپتە ەلەستەتەتىن چەرچيللدىڭ مىقتى سۋرەتشى بولعانىن جانە شەشەندىك ونەر بويىنشا ادەبيەت سالاسىندا نوبەل سىيلىعىنىڭ لاۋرەاتى اتانعانىن ءبىلدىم, – دەيدى جاس تا بولسا زەرەك كەيىپكەرىمىز. ساياساتتان قازاقستاننىڭ تۇڭعىش پرەزيدەنتى نۇرسۇلتان نازارباەۆ, سينگاپۋردىڭ ءبىرىنشى پرەمەر-ءمينيسترى لي كۋان يۋ, مالايزيانى تىعىرىقتان الىپ شىققان ماحاتحير موحام­ماد, ەكونوميكادان ەكىنشى ءدۇ­نيە­جۇزىلىك سوعىستان كەيىن گەر­مانيا­نى اياققا تۇرعىزعان نەمىس ەكو­نوميسى ەرحارد ليۋدۆيگ پەن اعىلشىن ەكونوميسى دجون مەي­نارد كەينستى ۇلگى تۇتا­دى. مەم­لەكەتتىك قىزمەتشىنىڭ مارتەبەسى تاباندى مىنەزدىڭ بولۋىندا, دەيدى جاس مامان. دۋمان اناش, «ەگەمەن قازاقستان» شىعىس قازاقستان وبلىسى, ءۇرجار اۋدانى