«ميكروبيزنەس قىزىلوردا» جوباسى 273 جۇمىس ورنىن اشتى

«ميكروبيزنەس قىزىلوردا» جوباسى اياسىندا بۇگىنگى كۇنگە دەيىن اۋىل تۇرعىندارىنىڭ جالپى قۇنى 357,5 ملن. تەڭگەنى قۇرايتىن 56 جوباسى قارجىلاندىرىلدى. ناتيجەسىندە 273 ادام جۇمىسپەن قامتىلىپ وتىر. بۇل تۋرالى قىزىلوردا وبلىسى كاسىپكەرلەر پالاتاسى ديرەكتورىنىڭ ەكونوميكالىق ماسەلەلەر جونىندەگى ورىنباسارىنىڭ مىندەتىن اتقارۋشى باقىتجان ابيەۆ حابارلادى. ونىڭ ايتۋىنشا, بۇگىندە قىزىلوردالىقتار اراسىندا جوعارى سۇرانىسقا يە جوبا قارجىسىنىڭ قايتارىلىمى دا كوڭىل قۋانتادى. ماسەلەن, وتكەن جىلى وبلىس اكىمدىگىنەن بولىنگەن قارجىنىڭ بۇگىنگى كۇنگە دەيىن 71,5 ملن. تەڭگەسىن نەسيە العان كاسىپكەرلەر مەرزىمىندە قايتارعان. اتالمىش سوما بيىل جاڭادان 8 جوبانى قارجىلاندىرۋعا مۇمكىندىك بەرىپ وتىر. «قازىرگى تاڭدا ارال اۋدانىندا 20,3 ملن. تەڭگەگە – 4 جوبا, قازالى اۋدانىندا 74,3 ملن. تەڭگەگە – 11 جوبا, قارماقشى اۋدانىندا 97,7 ملن. تەڭگەگە – 13 جوبا, جالاعاش اۋدانىندا 27,6 ملن. تەڭگەگە – 4 جوبا, سىرداريا اۋدانىندا 32,9 ملن. تەڭگەگە – 5 جوبا, شيەلى اۋدانىندا 57 ملن. تەڭگەگە – 9 جوبا جانە جاڭاقورعان اۋدانىندا جالپى قۇنى 11,1 ملن. تەڭگەنى قۇرايتىن 5 جوبا قارجىلاندىرىلىپ, جۇزەگە اسىرىلىپ جاتىر», – دەدى ب. ابيەۆ. بۇدان بولەك, نەسيە كوميتەتى 5 جوبانى قارجىلاندىرۋعا كەلىسىم بەردى. ەندى ءتيىستى قۇجاتتاردى تىركەۋ جۇمىستارى جۇرگىزىلۋدە. سونداي-اق باقىلاۋشى كەڭەستىڭ سوڭعى وتىرىسىندا كەلىسىم العان وزگە جوبالار بويىنشا قۇجاتتار جيناقتالىپ جاتىر. تاعى ءبىر ايتا كەتەتىن جايت, بيىلعى جىلى «اتامەكەن» ۇكپ مەن وبلىس اكىمدىگى بىرلەسە وتىرىپ, «قىزىلوردا شاعىن بيزنەسى» جوباسى شەڭبەرىندە اۋىلدى جەرلەردەگى كاسىپكەرلىكتى دامىتۋعا 660 ملن. تەڭگە قارجى ءبولدى. ايدار ورىسباەۆ