ەرەۆاندا پوليتسيا بولىمشەسىن باسىپ العان سودىرلار بيلىككە بەرىلدى

[caption id="attachment_54089" align="aligncenter" width="700"] reuters.com[/caption] ەرەۆاندا سودىرلار باسىپ العان پوليتسيا بولىمشەسىن بوساتۋ وپەراتسياسى اياقتالدى, دەپ حابارلادى ارمەنيانىڭ ۇلتتىق قاۋىپسىزدىك قىزمەتى. Interfax.ru-دىڭ مالىمەتى بويىنشا, بولىمشەنى ەكى اپتادان استام ۋاقىت كەپىلدە ۇستاپ كەلگەن سودىرلار قارۋلارىن تاستاپ, بيلىك وكىلدەرىنە بەرىلگەن. «قۇقىق قورعاۋ ورگاندارىنىڭ ارنايى جاساعى جۇيەلى ءارى كەلىسىلگەن ءىس-قيمىل ناتيجەسىندە قارۋلى توپ مۇشەلەرىن بەرىلۋگە ءماجبۇر ەتتى. 20 سودىر ۇستالىپ, پوليتسيا بولىمشەسىنىڭ اۋماعى تولىق بوساتىلدى», – دەپ مالىمدەدى ارمەنيا ۇلتتىق قاۋىپسىزدىك قىزمەتىنىڭ وكىلى. ەستەرىڭىزگە سالا كەتەيىك, 17 شىلدە كۇنى قارۋلانعان توپ ەرەۆانداعى پوليتسيا بولىمشەسىن باسىپ العان ەدى. شابۋىل بارىسىندا ولار پوليتسيا قىزمەتكەرىن ءولتىرىپ, ءتورت ادامدى جارالاعان. سودىرلار «قۇرىلتايشى پارلامەنت» وپپوزيتسيالىق قوزعالىسىنىڭ جەتەكشىسى جيرايرا سەفيلياندى تۇرمەدەن بوساتۋدى, سونداي-اق ارمەنيا پرەزيدەنتى مەن ۇكىمەتىنىڭ وتستاۆكاعا كەتۋىن تالاپ ەتكەن. ايدار ورىسباەۆ