80 جاستاعى ايەل ءوز «جانازاسىنان» 4 ايدان كەيىن ۇيىنە كەلگەن

رەسەيدىڭ ءنوۆوسىبىر وبلىسىنىڭ بەردسك قالاسىندا جۇرتتى قاتتى دۇرلىكتىرگەن وقىس وقيعا ورىن الدى. وبلىس ورتالىعىنداعى اۋرۋحانادا ەمدەلىپ جاتقان 80 جاستاعى جالعىزباستى زەينەتكەر ايەلدى تۋعان-تۋىستارى سىرتىنان «جەرلەپ» جىبەرىپ, ونىڭ پاتەرىن ساتىپ جىبەرۋگە ارەكەت جاساعان. sib.fm پورتالىنىڭ مالىمەتىنشە, زەينەتكەر رايسا پوزدنياكوۆا وسى ۋاقىتتىڭ بارىندە وبلىس ورتالىعىنداعى اۋرۋحانادا ەمدەلىپ جاتقان. ونىڭ ۇيىندە جوق ەكەنىن الدىمەن كورشىلەرى بايقاعان. سوسىن ولار پاتەردىڭ سىرتقى ەسىگىن بۇزىپ, ىشكە كىرگەن. ايەلدىڭ جوق ەكەنىن كورگەسىن, ىزدەۋ جاريالاعان. سول ەكى ورتادا يسكيتيم اۋدانىنان كەمپىردىڭ تۋىستارى تابىلا كەتكەن. ولار سول اۋداندا كوشەدە ءولىپ جاتقان ءبىر كەيۋانانى ءوز تۋىستارى ەسەبىندە جەرلەپ, بەردسك قالاسىنا كەلگەن. بۇرىن زەينەتكەر ايەلدىڭ كورشىلەرى ەشقاشان كورمەگەن تۋىستارى كەلە سالا پاتەردى ساتىپ, پۇلعا اينالدىرۋدىڭ جولىن قاراستىرعان. ولار ءۇيدى ءۇشىنشى بىرەۋدىڭ اتىنا اۋدارىپ تا ۇلگەرگەن. بىراق وسى تۇستا ىسكە پروكۋراتۋرا ارالاستى. بۇعان اۋرۋىنان ساۋىعىپ ۇيىنە قايتقان كەيۋانانىڭ دالادا قالۋى سەبەپ بولعان. «اقپار بويىنشا, 80 جاستاعى اجەي ءنوۆوسىبىر قالاسىنداعى اۋرۋحانادا 4 اي ۋاقىتىن وتكىزەدى. ال ۇيىنە ورالعان كەزىندە, وعان كىرە الماي قالادى. سەبەبى, ونى ءولىپ قالدى دەپ ەسەپتەگەن تۋىستارى, وزدەرىنشە «ءمايىتتى تانىپ», پاتەردى ءۇشىنشى بىرەۋدىڭ اتىنا اۋدارىپ جىبەرەدى», - دەدى پروكۋراتۋرا وكىلدەرى. قازىر ماسەلەنىڭ ءمان-جايىن پروكۋراتۋرا قىزمەتكەرلەرى تەكسەرىپ جاتىر. مۇرات ايتقوجا