وتباسىنا ون توعىزىنشى پەرزەنت كەلدى
ۇلىبريتانيا عانا ەمەس, الەمنىڭ كەز كەلگەن ەلىندەگى وتباسى ءۇشىن 19 بالا تۋىپ, تاربيەلەۋ – وتە سيرەك كەزدەسەتىن قۇبىلىس. سونداي وقيعا انگليادا تۇراتىن ەرلى-زايىپتىلار نوەل جانە سيۋ رەدفوردتاردىڭ وتباسىندا بولدى.
جاسى قازىر 41-دەگى سيۋ ەڭ العاشقى بالاسىن 14 جاسىندا دۇنيەگە اكەلگەن ەكەن. ونىڭ تۇڭعىشى بۇگىندە 27-گە تولعان. ال ۇلكەن قىزدارى سوفي 22 جاسىندا ءۇش بالالى بولىپ ۇلگەرىپ وتىر. ولار قازىر جيىرماسىنشى پەرزەنتتىڭ بولۋ مۇمكىندىگىن دە جوققا شىعارمايدى.
يراندا ۆەلوسيپەد مىنگەن ايەل قامالادى
يراندا رۇقسات ەتىلمەگەن جەردە ۆەلوسيپەد ايداپ جۇرگەن قىز-كەلىنشەكتەر بىردەن قاماۋعا الىناتىن بولدى.
پارسى ەلى مەريۆانا قالاسىنىڭ سولتۇستىك-باتىس جاعىندا وسىلايشا بىرنەشە نازىك جىنىستى تەمىر توردىڭ ار جاعىنان ءبىر-اق شىقتى. پوليتسيا وكىلىنىڭ مالىمدەۋىنشە, ۇكىمەت ايەلدەردىڭ قوعامدىق ورىنداردا ۆەلوسيپەد تەبۋلەرىنە ءۇزىلدى-كەسىلدى تىيىم سالعان. ەندى پارسى حانىمدارى تەك وزدەرى ءۇشىن بەلگىلەنگەن جەرلەردە عانا «شايتان اربانى» زىرلاتا الادى.
ۇلىنا «قاسقىر» دەگەن ات بەرۋ قيىندىققا اينالدى
يسپانيانىڭ فۋەنلابرادا قالاسىندا تۇراتىن ەرلى-زايىپتى يگناسيو مەن ماريا بۇدان بىرنەشە اي بۇرىن تۋعان ۇلدارىنا ءالى وزدەرى ويلاعان ەسىمدى بەرە الماي وتىر.
بۇعان ولاردىڭ بالاعا يسپان تىلىنەن اۋدارعاندا, «قاسقىر» دەگەن ماعىنا بەرەتىن «لوبو» اتاۋىن بەرگىسى كەلگەندەرى سەبەپ بولعان. جەرگىلىكتى بيلىك بۇعان رۇقسات بەرمەي قويعان. ەندى العان بەتتەرىنەن قايتپاعان جۇبايلار قول جيناۋعا كىرىسىپتى. ەگەر ولار وزدەرىن قولداعان داۋىس جيناي السا, وسى ەسىمدى ۇلدارىنا بەرە الادى ەكەن.
عالىمدار لاس سۋدان اۋىز سۋ دايىندايدى
اقش-تىڭ سەنت-لۋيس قالاسىنداعى ۆاشينگتون ۋنيۆەرسيتەتىندە قىزمەت ەتەتىن ءۇندى عالىمدارى وتە قاتتى لاستانىپ كەتكەن سۋدىڭ ءوزىن تازا اۋىز سۋعا اينالدىرۋدىڭ ءتاسىلىن ويلاپ تاپتى.
وقىمىستىلار جاماعاتىنىڭ انىقتاۋلارى بويىنشا بۇعان كۇن, اۋا جانە گرافەن وكسيدى ءتارىزدى ءۇش فاكتور عانا كەرەك. ولار گرافەننىڭ نەگىزىندە كۇن ساۋلەسىنىڭ كومەگىمەن ارەكەت ەتەتىن ەرەكشە سۇزگى جاساپ شىعارعان. ال كومىرتەگىنىڭ, سۋتەگى مەن وتتەگىنىڭ قوسپاسى بولىپ تابىلاتىن گرافەننەن الىنعان سۇزگىنىڭ اسەرىنەن سۋدىڭ قۇرامى تەز وزگەرە باستايتىن كورىنەدى.
سمارتفون ارقىلى نەكەلەستى
يتاليانىڭ جوعارعى سوتى العاش رەت سمارتفوننىڭ كومەگىمەن سكايپ ارقىلى ۇيلەنگەن پاكىستاندىق جىگىت پەن يتاليالىق قالىڭدىقتىڭ نەكەلەرىن زاڭدى دەپ تانىپ وتىر. قالىڭدىق پەن جىگىت ءوز ەلدەرىندە ءبىرىن-ءبىرى تەك سكايپ ارقىلى كورىپ تۇرىپ, بارلىق راسىمدەردى ونلاين-رەجىمدە ورىنداعان.
الايدا, كوپ كەشىكپەي يتاليانىڭ ىشكى ىستەر مينيسترلىگى سوتقا اتالعان نەكەنى زاڭسىز دەپ تانۋ جونىندە شاعىم جولداعان. سۋديا ەكى جاستىڭ ءبىر-بىرىمەن ەرىكتى تۇردە ۇيلەنگەنىن ەسكەرۋ كەرەك ەكەنىن العا تارتىپ نەكەنى بۇزۋدان باس تارتقان. سونىمەن قاتار, سوت ءتيىستى زاڭنامالار شاڭىراق كوتەرۋشى جاستاردىڭ ءبىر-بىرىمەن بەتپە-بەت كەزدەسۋىن تالاپ ەتپەيتىنىن ەسكەرگەن.
انگليادا ارالاردىڭ دا
ءوز وتەلى بار
ۇلىبريتانيادا سەلولىق ەلدى مەكەندەردە ءجۇرىپ جاتقان وزگەرىستەر سالدارىنان قۇرىپ كەتۋدىڭ الدىندا تۇرعان ارالاردى ساقتاپ قالۋ ءۇشىن ولارعا ارنالعان وتەلدەر دايىندالدى.
مۇنىڭ ارحيتەكتۋراسىن جەرگىلىكتى كومپانيانىڭ تاپسىرىسى بويىنشا تەيلور حارروگەيت ەسىمدى مامان جاسادى. ول دايىنداعان وتەلدى دالا عانا ەمەس, قالاعا دا ورناتىپ قويۋعا بولادى. سونىمەن بىرگە, قازىر ارانىڭ قالالىق جەرلەردەگى ۇلەس سالماعى كوپ ەكەنى دە انىقتالدى.
بارسەلونادا يتتەر ءۇشىن جاعاجاي سالىندى
يسپانيانىڭ بارسەلونا قالاسىنىڭ بيلىگى بىرنەشە جىلعى جوسپارلاۋ مەن قۇرىلىس جۇمىستارىنان كەيىن اقىرى يتتەرگە ارنالعان جاعاجاي سالىپ بەردى.
قالانىڭ جەرگىلىكتى قۇمداۋىتتى جاعاجايىنىڭ الىس تۇكپىرىندە پايدا بولعان مەكەن ارنايى قابىرعامەن قورشالعان. وندا جۇرت يتتەرىن الىپ كەلىپ قىدىرتىپ, سۋعا شومىلدىرا الادى. مەملەكەتتىك قۇرىلىمداردىڭ بۇل ءۇشىن بولگەن اۋماعى 1 250 شارشى مەتر جەردى قۇرايدى. تەرريتوريا, سونداي-اق, قازىرگى زامانعى يتتەر پيسسۋارلارىمەن, سۋبۇرقاقتارمەن جانە دۋشتارمەن جابدىقتالعان.
اقپارات اگەنتتىكتەرىنىڭ ماتەريالدارى بويىنشا دايىندالدى
