مۇناي قورى ەڭ كوپ ەلدە اشارشىلىق

سوڭعى ۋاقىتتا ۆەنەسۋەلادان جايسىز حابارلار كوپ ەستىلەدى. ساياسي تۇراقسىزدىق ءوز الدىنا, حالىقتىڭ الەۋمەتتىك جاعدايى بارىنشا قۇلدىراپ بارا جاتىر. سوڭعى كۇندەردە ەلدىڭ 150 مىڭداي حالقى كورشى كولۋمبياعا ءوتىپ, ازىق-ت ۇلىك الىپ قايتۋعا ءماجبۇر بولعان. وزدەرىندە جوق بولعان سوڭ عوي.  قاراپ تۇرساڭ, تابيعاتتىڭ ءوزى ۆەنەسۋەلاعا باي ەلدەردىڭ قاتارىندا بولۋدى جازعانداي-اق. سوڭعى مالىمەتتەرگە قارا­عاندا, ول مۇناي قورى جونىنەن الەمدە ءبىرىنشى ورىندا كورىنەدى. ارينە, جەر استىندا جاتقان مۇناي ءالى بايلىق ەمەس, ونى ءوندىرۋ كەرەك, باسقاعا ساتۋ كەرەك, سوندا عانا قازىناعا اقشا تۇسەدى. مۇ­نايدىڭ باعاسى تومەندەگەنى بەلگىلى. بىراق نەگىزگى بايلىعى مۇ­ناي بولعان ەلدەردىڭ ەشقايسىسى حالقىن اشارشىلىققا ۇشىراتىپ وتىرعان جوق. بۇل ەلدىڭ بايلىعى تەك مۇنايمەن شەكتەلمەيدى: تە­مىر دە بار, التىن دا بار. اۋىل شارۋاشىلىعىنىڭ مۇمكىندىگى قانشاما – كوفە, كاكاو, بانان دا وسىندا. مال شارۋاشىلىعىن وركەندەتۋگە بارلىق جاعداي بار. بالىق اۋلاساڭ, تەڭىز عانا ەمەس, مۇحيت تولقىندارى دا جاعاڭدى ۇرادى. سول مۇحيت جولىڭدى دا اشادى – قايدا بارام دەسەڭ, ايدىن جول الدىڭدا. وندىرگەن ءونىمىڭدى, الدىمەن مۇنايىڭدى, وتكىزەتىن رىنوك تا الىس ەمەس. باسقاسىن ايتپاعاندا, اقش پەن برازيليانىڭ ءوزى نە تۇ­رادى! بايلىققا باستايتىن ەكى شارت قولىڭدا: وندىرەتىن ءونىمىڭ, تاسيتىن جولىڭ بار. سونىڭ ەكەۋىن دە پايدالانا الماي وتىر بۇل ەل. مۇنىڭ باسى ۆەنەسۋەلانىڭ كەشەگى باسشىسى ۋگو چاۆەستىڭ زامانىنان باستالدى. سوتسياليستىك ەل قۇرماق بولىپ, وندىرىستىك كومپانيالاردى جەكەمەنشىكتەن تارتىپ الىپ, مەملەكەتتىك مەن­شىك­كە قوستى. ال مەملەكەت ونى وڭدىرىپ باسقارا المادى. بۇل – ءبىر. ەكىنشىدەن, اقش-قا قارسى شىقتى. ونىمەن كۇرەسۋ ءۇشىن قارۋلانۋعا كىرىستى. اقش-قا قارسى ءسوز ايتىلسا, ەلەڭ ەتەتىن ماسكەۋ سول قارۋعا قارىق قىلدى. اقشاسىنا بەردى, قارىزعا بەردى. وعان قىرۋار قارجى كەتتى. قارۋ بار-اۋ, بىراق ول تاماق بولمايدى ەكەن, حالىق اشىقتى. چاۆەسكە وكپەلەۋدىڭ ءجونى جوق­تاي, ونىڭ وتكەنىنە دە ءبىراز جىل. ونىڭ ورنىن باسقان نيكولاس مادۋرو ۇستازىنىڭ جولىنان اينىماي, تۇيىققا كەتىپ بارادى. ازىن-اۋلاق قارجى اسكەرگە جۇمسالادى. بۇكىل الەم مۇنايدان ەلەكتر قۋاتىن وندىرسە, سول بايلىقتىڭ ۇستىندە وتىرعان ۆەنەسۋەلا ەلەكتر قۋاتىنا ءزارۋ. سول قۋاتتى ۇنەمدەۋ ءۇشىن اپتاسىنا ەكى-اق كۇن جۇمىس ىستەۋگە كوشتى. جۇمىس ىستەمەيتىن ەلدە تاماق قايدان بولسىن! جوعارىدا ايتقانداي, ءوز ەلىندە تۇك تاپپاعان حالىق, كورشى كولۋمبيا شەكاراسىن اشسا, سولاي قاراي لاپ بەرەدى. حالىق پرەزيدەنت مادۋروعا: باسقارا الماساڭ كەت, دەيدى. رە­فەرەندۋم وتكىز دەپ قول جي­نادى: 2 ميلليون ادام قول قويدى! ءبارىبىر مادۋرو ءوت­كىزبەيدى. ونىڭ قازىرگى رەيتينگى 23 پايىز عانا. ءتىپتى سيرەك كەزدەسەتىن جاعداي – كورشى ەلدەر: ارگەنتينا, چيلي, ۋرۋگۆاي, كولۋمبيا باسشىلارى رەفەرەندۋمعا بارساڭشى دەپ ۇسىنىس ايتتى. مادۋرو قورقادى. ءبىر كەزدە ۆەنەسۋەلانىڭ گۇل­دەنگەن ەل بولعانى دا بەلگىلى. ال قازىر ولمەستىڭ كۇنىن كورىپ جاتىر. بىلتىر ينفلياتسيا دەڭگەيى 720 پايىزعا جەتتى. دۇكەندە ازىق-ت ۇلىك جوق. وعان بيزنەس پەن ساۋداگەر كىنالى, دەيدى پرەزيدەنت. كىنالى بولسا, ولاردى نەگە جونگە سالمايدى؟ حالىق اش. اش حالىق اشىنادى. ماماديار جاقىپ, جۋرناليست