«ەگەمەندەگى» سپارتاكيادا

«ەگەمەن قازاقستان» گازەتىندە سپورتتان جارىستار ۇيىمداستىرۋ داستۇرگە اينالعان. گازەتىمىز جىل سايىن ەلىمىز بويىنشا اقپارات قۇرالدارى اراسىندا وتەتىن كوپتەگەن تۋرنيرلەر مەن جارىستارعا دا بەلسەنە قاتىسىپ كەلەدى. ال بيىل 95 جىلدىق تاريحى بار اعا گازەت ءوز قىزمەتكەرلەرى اراسىندا سپورتتىڭ بىرنەشە تۇرىنەن سپارتاكيادا وتكىزدى. وعان رەداكتسيا ۇجىمى ءتورت توپقا ءبولىنىپ, بيليارد, شاحمات جانە دويبىدان جارىستارعا قاتىستى. سپارتاكيادا ءبىر-ەكى كۇندە وتەتىن كۋبوكتىق جارىس ەمەس, ول بىرنەشە كۇنگە سوزىلاتىنى بەلگىلى. بيىلعى جارىس تا بايلانىس جانە اقپارات قىزمەتكەرلەرى كۇنىنە وراي وتكىزىلىپ, بىرنەشە كۇنگە جالعاستى. كەشە رەداكتسيا قىزمەتكەرلەرىنىڭ اراسىندا وتكەن سپارتاكيادا مارەسىنە جەتتى. وندا جۋرناليستەردىڭ «سۇڭقار» كومانداسى باس جۇلدەنى جەڭىپ الدى. ەكىنشى ورىندى حاتشىلىق جانە اكىمشىلىك بولىمدەرىنەن قۇرال­عان «جىگەر», ءۇشىنشى ورىندى ينتەرنەت-رەداكتسيانىڭ جىگىتتەرىنەن جاساقتالعان «ۇشقىن» كومانداسى يەلەندى. ال ءتورتىنشى ورىنعا جۋرناليستەردىڭ «ۇمتىلىس» جاساعى يە بولدى. سپارتاكيادا سوڭىندا «ەگەمەن قازاقستان» گازەتىنىڭ باسقارما توراعاسى دارحان قىدىرالى جەڭىمپاز بەن جۇلدەگەرلەردى جارىستا ۇزدىك اتانعان قىزمەتكەرلەردى قۇتتىقتاپ, ديپلومدار مەن باعالى سىيلىقتار تابىس ەتتى. بۇل سىندا «سۇڭقار» كومانداسىنىڭ ويىنشىلارى عالىم ومارحان مەن عابيت ىسكەندەر ۇلى, «جىگەر» جاساعىنىڭ مۇشەسى احمەتقالي وتەعاليەۆ بيليارد­تان وتكەن باسەكەدە ۇزدىك ويىنشى اتاندى. ال «ۇمتىلىس» كومانداسىنىڭ وكىلى ءفوتوتىلشى ورىنباي بالمۇراتقا شاحمات جارىسىندا تەڭ كەلەتىن ەشكىم بولمادى. ول ويىنداردىڭ بارلىعىن جەڭىپ, ۇزدىك ويىنشى اتانسا, «جىگەر» كومانداسىنىڭ مۇشەسى فاريزا ور­مانوۆا دويبى دوداسىندا جەكە-دارا شىعىپ, ۇزدىك ويىنشى دەپ تانىلدى. «ەگەمەن-اقپارات»