اۋىلداعى سۋپەرماركەت

الىس اۋىلدارداعى دۇكەندەردىڭ سيقى بارىمىزگە بەلگىلى عوي... ءبىر بولمەگە تاۋاردى ءۇيىپ تاستاعان. تازالىعىن بىلاي قويعاندا, تار بولعاندىقتان ىشىندە اينالىپ جۇرەتىن جەر جوق. اتتاپ باسساڭ ءبىر زاتقا شالىناسىڭ. دۇكەن يەسى ايتەۋىر, ساۋداسى جۇرگەنىنە ءماز. جاقىندا جۋالى اۋدانىنىڭ ەڭ شالعايدا جاتقان قوشقار اتا اۋىلىنا بارعاندا ماڭدايىندا «سۋپەرماركەت» دەگەن جازۋى بار دۇكەندى كورىپ, اڭ-تاڭ بولعانىمىز راس. ويباي-اۋ, قوشقار اتا دەگەنىڭىز وبلىستىڭ شەتىندە, جەلدىڭ وتىندە جاتقان اۋىل ەمەس پە؟ قىس تۇسە قوشقاراتالىقتار ورتالىقپەن قوش ايتىسىپ, جول قاتىناسى تىپتەن قيىنداپ, كۇن جىلىنعانشا تەرەڭ سايدا تىم-تىرىس جاتىپ الادى. ەندەشە سىرتپەن بايلانىسى از وسىنداي شاعىن اۋىلدان سۋپەرماركەت اشۋ قانشالىقتى ءتيىمدى؟ اتى بار دا, زاتى جوق ساۋدا ورنى بولار دەگەن كۇدىكپەن الگى دۇكەننىڭ ەسىگىن اشتىق. جوق, الىس اۋىلداعى مىنا سۋپەرماركەتتىڭ قالاداعى ساۋ­دا ورىندارىنان ءبىر مىسقال دا كەم ەمەس ەكەن. ءىشى كەڭ ءارى ءساندى, سوسىن تاۋارعا دا وتە باي. ءتىپتى, اۋىل­دىقتار ءۇشىن جات كورىنەتىن تەمىر اربالار دا تۇر. ءبىز باس سۇق­قان ون-ون بەس مينۋتتىڭ ىشىندە ءتورت-بەس تۇتىنۋشى ساۋدا جاساپ كەتتى. – ءومىر بويى وسى ساۋدا سالاسىندا ەڭبەك ەتىپ كەلەمىن, – دەيدى سۋپەرماركەت يەسى ءلاززات نۇرپەيىسوۆا. – سوندىقتان بۇل سالانى ءبىر كىسىدەي بىلەمىن. راس, العاشىندا شالعايداعى اۋىلدا ساۋدامىز جۇرە مە, جوق پا دەگەن سۇراق مازالاعان. بىراق ءبىز تاۋاردى كوپ اكەلۋدىڭ ارقاسىندا وسى توڭىرەكتەگى اۋىلداردىڭ كوتەرمە ساۋ­دا ورتالىعىنا اينالدىق. قىس تۇسە جاقىن اۋىلدار, ءتىپتى, كور­شى وڭ­تۇس­تىك قازاقستان وبلىسى, ءباي­دى­بەك اۋدا­نىنىڭ كەيبىر ەلدى مە­كەن­­­دەرى بىزدەن كەلىپ تاۋار الىپ تۇ­را­­دى. ءويت­كەنى, قىستىڭ قىتىمىر كۇندەرىندە دە ءبىز ورتالىقپەن بايلانى­سىمىزدى ۇزبەي, بارلىق تاۋارلاردى ۋاقتىلى جەتكىزىپ وتىرامىز. جانە بارلىق زاتقا ءوز باعاسىنىڭ ون پايىزداي كولەمىندە عانا ۇستەماقى قويامىز. ءيا, شىنىندا سورەدەگى باعالار تىم قىمبات ەمەس. ءتىپتى, كەيبىر زات­تار­­دىڭ باعاسى الدەقايدا تومەن ەكە­نى­­نە كوز جەتكىزگەن كەيبىر ءارىپ­تەس­­تەرىم قالتالارىن قارمانىپ, ساۋ­­دا جاساپ جاتتى. مىنە, «بالۋانعا وڭ-تەرىسى ءبىر» دەمەكشى, تىرلىكتىڭ كوزىن تاۋىپ, ەڭبەك ەتە بىلەتىندەر ءۇشىن تابىس كىلتى دالا-قالا بوپ ءبولىن­­­بەي­­تىنىن وسى جولى انىق اڭ­عار­­­دىق. ايتپاقشى, شالعايدا جاتسا دا شارۋاسى تۇزەلىپ كەلە جاتقان قوش­­قار اتانىڭ تۇرعىندارى ءۇشىن تاعى ءبىر قۋانىشتى جاعداي بار. اۋىل­­­دىڭ بيىك جەرىنەن ەكى قابات­تى جاڭا مەكتەپ عيماراتى بوي كوتەرۋ­­دە. ەسكى مەكتەپ عيماراتىنىڭ ىرگە­تا­سى 1967 جىلى قالانعان ەكەن. كۇ­تىپ-ۇستاۋدىڭ ارقاسىندا بۇگىن­گە جەتتى. ايتسە دە اۋىل اكىمى مەل­­دە­­بەك ايدوسوۆتىڭ ايتۋىنا قارا­عان­­دا, بۇل ەسكى عيماراتتى ال­دا­عى ۋاقىتتا كۇردەلى جوندەۋدەن ءوت­كى­زىپ, ءبىر جاعىنان بالاباقشا اشىپ, ءبىر بۇرىشىن اۋىلعا كەلگەن جاس ماماندارعا باسپانا رەتىندە بەر­مەك ەكەن. اۋىلدىڭ ايبىنىن اسقاقتاتىپ, اجارىن اشىپ تۇر­عان 250 ورىندىق جاڭا مەكتەپ عي­ما­را­تىندا الداعى وقۋ جىلىندا العا­ش­قى قوڭىراۋ سوعىلادى. ورالحان ءداۋىت, «ەگەمەن قازاقستان» جامبىل وبلىسى, جۋالى اۋدانى, قوشقاراتا اۋىلى