قازاقستان پرەمەر-ءمينيسترى كارىم ءماسىموۆ 14 شىلدە كۇنى موڭعولياعا بارعان مەملەكەتتىك ساپارى كەزىندە الدىمەن بايان-ولگەي قالاسىنا ايالدادى. ۇكىمەت باسشىسى وندا جەرگىلىكتى قازاقتارمەن كەزدەسۋدەگى ءسوزىن قازاقشا ايتىپ شىعىپ, جينالعانداردى ريزا ەتتى.
kerey.kz اقپارىنا قاراعاندا, كارىم ءماسىموۆ وسىندا تاسقىن سۋدان زارداپ شەگىپ وتىرعان اعايىنعا قازاقستان مەملەكەتى تاراپىنان قولداۋ كورسەتىلەتىنى تۋرالى مالىمدەگەن.
ەسكە سالا كەتەيىك, بۇدان بىرەر كۇن بۇرىن قوبدا وزەنى جاعاسىنداعى بايان-ولگەي قالاسىن توپان سۋ باسىپ قالىپ, جەرگىلىكتى تۇرعىنداردى وراسان زور شىعىنعا ۇشىراتتى. سۋ تاسقىنى سالدارىنان 700-گە جۋىق ادام زارداپ شەگىپ, ەكى ادام قازا تاپتى.
«بۇگىن موڭعولياعا ارنايى بارعان ءماسىموۆ قانداستارىمىزعا كومەكتەسەتىنىن قازاق تىلىندە جەتكىزگەن. كوپشىلىك الدىندا قازاقشا سويلەمەيتىن ءماسىموۆتىڭ بۇل ارەكەتى جەلى قولدانۋشىلارىن تاڭ قالدىردى», - دەلىنگەن حابارلامادا.
كەزدەسۋ سوڭىندا كارىم ماسىموۆكە اپپاق ارعىماق سىيعا تارتىلىپ, شاپان جابىلدى. بۇل تۋرالى Islam.kz ءتىلشىسى مارفۋعا شاپيان Facebook-تەگى ءوز اككاۋنتىندا جازدى. ونىڭ جازۋىنا قاراعاندا, قازاقستان دەلەگاتسياسىنىڭ بايان-ولگەي قازاقتارىمەن كەزدەسۋى قالا مەيمانحانالارىنىڭ بىرىندە وتكەن.
«ءبىز ۇكىمەت باسشىسى كارىم ءماسىموۆتىڭ شەشەن تىلمەن قازاقشا سويلەپ تۇرعانىن تەلەۆيزوردان كورگەندە, قاتتى تاڭ قالدىق. ونىمەن بىرگە مۇندا مادەنيەت جانە دەنساۋلىق ساقتاۋ مينيسترلەرى دە كەلدى», - دەپ جازدى ول. ءتىلشى سونداي-اق جەرگىلىكتى حالىقتىڭ قازاقستان پرەمەرىمەن كەزدەسۋدى اسىعا كۇتكەنىن اتاپ ءوتتى. ءجۋرناليستىڭ جازۋىنا قاراعاندا, قازاقستان ۇكىمەتىنىڭ باسشىسى بۇل ايماققا سوڭعى 25 جىلدا ءبىرىنشى رەت كەلىپ تۇر.
https://youtu.be/ixWd5fKy1d0
«بايان-ولگەيدىڭ جەرگىلىكتى اتقارۋ ورگاندارىمەن بىرگە وسى ايماقتاردان قازاقستانعا كوشىپ بارعان ورالماندار ءۇشىن سالىناتىن بالالار باقشالارىنىڭ قۇرىلىسى, زەيناتاقىلارىن رەتتەۋ, بۇل جاقپەن اراداعى اۋە قاتىناسىن قالپىنا كەلتىرۋ ماسەلەلەرى تالقىلاندى. قازاقستان تاراپى موڭعوليادا سەلدەن زارداپ شەككەندەرگە كومەك كورسەتىلەتىنىن, سونداي-اق جاستاردىڭ ءبىلىم الۋلارى ءۇشىن گرانتتار بولىنەتىنىن مالىمدەدى.
ەسكە سالا كەتەيىك, قازاقستان پرەمەر-ءمينيسترى كارىم ءماسىموۆ موڭعولياعا ەۋروپا مەن ازيانىڭ XI سامميتىنە قاتىسۋ ءۇشىن كەلدى.
مۇرات ايتقوجا
