ۋكراينا پرەمەر-ءمينيسترى ەلدە اجىراسۋعا تىيىم سالماقشى

ۋكراينا پرەمەر-ءمينيسترى ۆلاديمير گرويسمان ەلدە ەرلى-زايىپتىلاردىڭ قانداي ءبىر سەبەپتەرمەن دە اجىراسۋشىلىعىنا تىيىم سالاتىن ارەكەتتەر جاساۋعا نيەتتى ەكەنىن مالىمدەدى. 14 شىلدە كۇنى «ۆزگلياد» ىسكەرلەر گازەتىنىڭ حابارلاۋىنشا, ۇكىمەت باسشىسى مۇنى امالسىزدان باراتىن شارا رەتىندە قاراستىرعالى وتىر. «مەن, جالپى, ادىلەت ءمينيسترىنىڭ اجىراسۋعا تىيىم سالۋ جونىندەگى باستاماسىن قولدايمىن. جۇرتتىڭ ءبارى مۇنى قالجىڭ دەپ ويلاپ قالۋى مۇمكىن. بىراق بۇل – مەنىڭ شىندىعىم. سەبەبى, وتباسى دەگەن – ەڭ جوعارى قۇندىلىق. ماڭىزدىسى, ءۇيلى-جايلى ادامدار ءبىر-بىرلەرىمەن باقىتتى ءومىر سۇرۋلەرى كەرەك», - دەدى گرويسمان ۋكراينا مينيسترلەر كابينەتىنىڭ وتىرىسىندا. پرەمەر بۇل مالىمدەمەسىن ۋكراينا ادىلەت ءمينيسترى پاۆەل پەترەنكو تاۋلىگىنە نەكەگە تىركەلەتىندەر جونىندەگى پيلوتتىق جوبانىڭ ىسكە قوسىلعانىن بايانداعانىنان كەيىن جاسادى. ءمينيستردىڭ ايتۋىنشا, جوبانىڭ العاشقى قىزمەتىن كيەۆ, ودەسسا جانە لۆوۆ قالالارىنىڭ تۇرعىندارى پايدالانا الادى. جوبا كوپ ۇزاماي حەرسوندا, ماريۋپولدە جانە سەۆەرودونەتسكىدە جۇزەگە اسىرىلادى. قازىرگى تاڭدا ۋكراينادا نەكەگە تىركەلۋ ءۇشىن 30 كۇن بۇرىن ءوتىنىش بەرىلۋى كەرەك. مۇرات ايتقوجا