بالالار كارديوحيرۋرگياسى: باسىم باعىتتار

تاۋەلسىزدىك جىلدارى ءبىزدىڭ ەلىمىزدە وتاندىق مەديتسينا ايتار­لىقتاي العا جىلجىدى. سالا قىزمەتكەرلەرى ىزدەنىمپازدىق پەن تاباندىلىقتىڭ ارقاسىندا ىلكىمدى ناتيجەلەرگە قول جەتكىزدى. اسىرەسە, سوڭعى جىلدارى مەديتسينا ءوز دامۋىندا قۋاتتى ەكپىن الدى. مەملەكەت حالىق دەن­ساۋلىعىنا ەرەكشە كوڭىل ءبولىپ, سالا قۇرىلىمىن جەتىلدىرۋ, كەسەل­دىڭ الدىن الۋ مەن ونى ۋاقىت وتكىز­بەي انىقتاۋ ماسەلەلەرىن ءجىتى باقىلاۋدا ۇستاپ وتىرعانىن قانا­عات سەزىمىمەن ايتۋىمىز كەرەك. بۇگىندە ءبىزدىڭ دارىگەر­لە­رىمىزدىڭ بىلىكتىلىگى مەن كاسىبي دەڭگەيىن تمد ەلدەرى, ەۋروپا, امەريكا قۇرلىعى شىنايى مويىن­داپ وتىرعانى كوپ جايدى اڭعارتادى. ەندىگى جەردە قازاقستاندىقتاردىڭ, ونىڭ ىشىندە اقمولالىقتاردىڭ بۇرىنعىداي ەم ىزدەپ شەتەل اسۋىنىڭ, كۇردەلى وتا كەزەگىندە تۇرۋ­دىڭ, قىرۋار قارجى مەن ۋاقىت جۇمساۋىنىڭ قاجەتتىلىگى بولماي قالدى. مۇنداي كومەكتى كەز كەلگەن سالا بويىنشا وزىمىزدە دە الۋدىڭ مۇمكىندىگى تۋدى. ال اقمولا پەدياترياسىنا كەلەتىن بولساق, ءبىزدىڭ وبلىسىمىزدا بالالار كارديوحيرۋرگياسىنىڭ باسىم باعىت الا باستاعانىن ءبو­لەكتەپ ايتقىم كەلەدى. بۇل ورايدا, وتاندىق جانە شەتەلدىك ءارىپ­تەستەرمەن ىنتىماقتى بايلانىس ءتيىستى قايتارىمىن بەرگەنىنە ريزاشىلىق بىلدىرگەن ءجون. بيىلعى 27 اقپاندا, اقمولا وبلىستىق اۋرۋحاناسىنىڭ جۇرەك ورتالىعىندا جاسى 2-دەن 6-عا دەيىنگى 4 بالاعا كۇردەلى وتا جاسالۋىن جەرگىلىكتى تاجىريبەدەگى ەلەۋلى وقيعا سانايمىز. كوكشەتاۋلىق دارىگەرلەر الماتى قالاسىنداعى پەريناتولوگيا جانە بالالار كارديوحيرۋرگياسى ورتالىعى ماماندارىنىڭ قاتىسۋىمەن 10 ساعاتتىق ءساتتى وتا جاسادى. مۇنداي كۇردەلى وپەراتسيالار 2013 جىلى ليتۆا دارىگەرلەرىنىڭ قاتىسۋىمەن باستالعان ەدى. قا­زىرگى وتالار التى جاستان ءتو­مەنگى بالالارعا جاسالۋىمەن ەرەك­شەلەنەدى. اتالعان ءبىر وتا­­­نىڭ قۇنى 1 ميلليون 900 مىڭ تەڭگەنى قۇرايدى. ال اق­مو­لالىق بالا­قايلارعا وتا مەم­لەكەتتىك مەديتسينالىق كومەك اياسىندا مۇلدەم تەگىن جاسالدى. اتا-انا­لاردىڭ بالالار ءومىرىن ساق­تاپ قالۋداعى مەملەكەتتىك قامقورلىققا, دارىگەرلەردىڭ ەڭبەگىنە العىسى شەكسىز. مەديتسينا قىزمەتكەرلەرى كۇنى قارساڭىندا جىلى لەبىزدەردىڭ ءبىرىن اتاي كەتسەك, ارتىق بولماس. «ءبىزدىڭ بالامىزعا جۇرەك تالماسى دياگنوزى تۋعان بويدا قويىلعان بولاتىن. دارىگەرلەر كەڭەسىنە كوپ جۇگىندىك, استانا قالاسىنا دا بىرنەشە مارتە باردىق. بىراق, بىزگە ءبىرشاما كۇتۋ قاجەتتىگى ايتىلدى جانە ءار جارتى جىلدا ارنايى باقىلاۋدان ءوتىپ تۇردىق. سىرتتاي قاراعاندا ءسابيىمىزدىڭ سىرقات بەلگىلەرى بايقالمايتىن. قيمىلى شيراق, كوڭىلدى, كادۋىلگى ساۋ بالادان ايىرماشىلىعى جوق سياقتى. ايتكەنمەن, ۋاقىت وتە بۇل كەسەل بالامىزدىڭ دەنساۋلىعىنا ەلەۋلى اسەرىن تيگىزەتىنى قاتتى الاڭداتاتىن. سوندىقتان, كەزەككە تۇرىپ, جوسپارلى وتانى كۇتىپ جۇردىك. مىنە, وتا دا ويداعىداي ءوتتى, بارلىعى جاقسى بولاتىنىنان ءۇمىتتىمىز. دارىگەرلەرگە كوپتەن-كوپ راحمەت», – دەيدى كوكشەتاۋ قالاسىنىڭ ەكى جاسار تۇرعىنى تەمىرلان بايمۇقانوۆتىڭ اناسى. وتكەن جىلدىڭ سوڭىندا وبلىس بويىنشا 15 جاسقا دەيىنگى 887 بالا ديسپانسەرلىك ەسەپتە تۇرعان بولاتىن. ولاردىڭ 317-سىنە وتا جاسالدى. بيىلعى جىلدىڭ سوڭىنا دەيىن تاعى دا 47 وتا جاسالادى دەپ جوسپارلانۋدا. وسى رەتتە اقمولا وبلىستىق بالالار اۋرۋحاناسىنىڭ ۇجى­مىنا ەلەۋلى سالماق تۇسەتىنى راس. بۇل ابىرويلى مىندەتتىڭ تالاپ دەڭ­گەيىندە اتقارىلىپ وتىر­عانىنا ريزاشىلىق بىلدىرەمىز. جوعارى بىلىكتى دارىگەر سەرىك اقشالوۆ باسشى­لىق جاسايتىن اۋرۋحانا 15 جاسقا دەيىنگى بالالارعا بىلىكتى ءارى مامانداندىرىلعان كومەك كورسەتەدى. بالالار اۋرۋحاناسى قازىرگى زامانعى وزىق جابدىقتارمەن قامتاماسىز ەتىلگەن. مۇندا بالالار اۋىر حال­دە, سونىمەن بىرگە, جوسپارلى تۇردە جولدامامەن قابىلدانادى. ەمشارا تاسىلدەرىنە كەلەتىن بول­ساق, بولىمشەلەردە مي ەلەكتروەنتسەلوگرافياسىن, نەيروسونوگرافيا, ەحوەنتسەلوگرافيا, رەوەنتسەلوگرافيا, كومپيۋتەرلىك توموگرافيا, ماگنيتتىك-رەزو­نانستىق توموگرافيا جاساۋعا مۇمكىندىك بار. سانيتارلىق اۆيا­تسيانىڭ تۇراقتى كەزەكشىلىگى ۇي­ىمداستىرىلعان. وبلىستىق بالالار اۋرۋ­حانا­سىنىڭ حيرۋرگيالىق ءبولىمىنىڭ قۇرامىندا 10 توسەك-ورىنعا ار­نالعان نەيروحيرۋرگيالىق ءبو­لىم­شە دە جۇمىس ىستەيدى. مۇندا باس-مي جاراقاتىنا, مي-قان اينا­لىمىنىڭ بۇزىلۋىنا, تۋا بىتكەن ومىرتقا زاقىمىنا, باسقا دا كەسەلگە ۇشىراعان بالالارعا كومەك كورسەتىلەدى, وتالار جاسالادى. جالپى, ءاربىر وتباسى ءۇشىن, قوعام ءۇشىن بالا دەنساۋلىعىنان ارتىق باقىت جوق. ءبىز بۇگىن كارديوحيرۋرگيا سالاسى جونىندە عانا ءسوز قوزعادىق. نەگىزىندە, بالا دەنساۋلىعى بۇكىل مەديتسينا قىزمەتكەرلەرىنە جۇكتەلگەن اسا جاۋاپتى مىندەت سانالادى. بۇل باعىتتاعى كەشەندى قىز­مەت ۇنەمى جەتىلدىرىلۋ, دامۋ ۇستىندە ەكەندىگى قۋانىشتى. بيىلعى جىلى ءبىز 2016-2020 جىل­دارعا ارنالعان «دەنساۋلىق» مەم­لەكەتتىك دەنساۋلىق ساقتاۋ باعدارلاماسىن جۇزەگە اسىرۋدى باستادىق. جاڭا باعدارلاما قازاقستاندا ەپيدەميولوگيالىق قىزمەت جانە سالاماتتى ءومىر سالتىن قامتاماسىز ەتۋدى بىرىك­تىرەتىن قوعامدىق دەنساۋلىق ساق­تاۋ جۇيەسىن قۇرۋدى كوزدەيدى. مۇنداعى باستى نازار باستاپقى مەديتسينالىق-سانيتارلىق كومەككە باعىتتالادى. وسىعان بايلانىستى امبۋلاتوريالىق ەمشارا نەگىزىندە ءدارى-دارمەكپەن تەگىن قامتاماسىز ەتۋ كەزەڭ-كەزەڭىمەن ىسكە اسىرىلاتىن بولادى. سونداي-اق, قىزمەت كور­سەتۋدىڭ وتباسىلىق قاعيداتى ودان ءارى دامىتىلماق. ەلىمىزدە 2017 جىلدان باستاپ دەنساۋلىق ساقتاۋ سالاسىنىڭ قارجىلىق تۇراقتىلىعىن قامتاماسىز ەتۋگە ىقپال ەتەتىن مىندەتتى الەۋمەتتىك-مەديتسينالىق ساقتاندىرۋ قولعا الىناتىنى, مەملەكەتىمىزدىڭ كەشەندى قامقورلىق اياسىنىڭ كەڭي تۇسەتىنى كوڭىل وسىرەدى. بيبىگۇل يمانقۇلوۆا, اقمولا وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى اقمولا وبلىسى