قازاقستان پارلامەنتى ءماجىلىسىنىڭ دەپۋتاتتارى جۇمىستارىن اۋىلدىق جەرلەردە جالعاستىرۋدا. تسەلينوگراد اۋدانىنىڭ رودينا جانە ۆوزدۆيجەنكا اۋىلدىق وكرۋگتەرىندە گۇلجان قاراعۇسوۆا مەن تاتيانا ياكوۆلەۆا ەل تۇرعىندارىمەن ىسكەرلىك كەزدەسۋ وتكىزدى.
قازاقستاننىڭ ەڭبەك ەرى يۆان ساۋەر باسقاراتىن «رودينا» اگروفيرماسىنىڭ قول جەتكىزگەن تابىستارى وزگەلەرگە ۇلگى بولارلىقتاي. مۇندا 4 مىڭ باسقا جۋىق ءىرى قارا مال تالاپقا ساي كۇتىپ-باعىلۋدا. مۇنىڭ 1400 باسى – ساۋىن سيىرلار. ءاربىر سيىردان جىل سايىن 7 مىڭ ليتر ءسۇت ساۋىلاتىندىعى اتاپ ءوتىلدى. ىرگەدە تۇرعان استانا قالاسىنىڭ ازىق-ت ۇلىك بەلدەۋىنە بۇل شارۋاشىلىقتىڭ قوسىپ وتىرعان ۇلەسى سالماقتى. تاۋلىگىنە 46 توننا تازا ءونىم شىعاراتىن كاسىپورىننىڭ ماي-قايماعىنا, ىرىمشىگى مەن سۇتىنە قالالىقتاردىڭ سۇرانىسى وتە جوعارى.
حالىق قالاۋلىلارى وسى وكرۋگتەگى بالالار باقشاسىنا, جاڭا ساۋىن جابدىقتارى ورناتىلعان ءسۇت زاۋىتىنا, دەمالىس جانە مادەنيەت باعىنا, حايۋاناتتار پاركىنە ارنايى اتباسىن تىرەپ, الەۋمەتتىك سالانىڭ ەكپىندى دامۋىنا ريزاشىلىقتارىن ءبىلدىردى.
ۆوزدۆيجەنكا وكرۋگىندە استانالىق قوناقتاردى «اقتىق» اكتسيونەرلىك قوعامىنىڭ باس ديرەكتورى مارات قامزەباەۆ پەن ۆوزدۆيجەنكا اۋىلدىق وكرۋگىنىڭ اكىمى سەيفوللا ىسقاقوۆ قارسى الدى. دەپۋتاتتار بالالار باقشاسى مەن مادەنيەت ۇيىندە بولىپ, وسى ەلدى مەكەننىڭ ونەر ۇجىمدارىمەن پىكىرلەستى.
وسى ورايدا, «اقتىق» اكتسيونەرلىك قوعامى بيزنەستىڭ الەۋمەتتىك جاۋاپكەرشىلىگى مىندەتتەمەلەرىن ابىرويمەن ورىنداپ جۇرگەن ۇجىم ەكەندىگىن اتاي كەتكەن ءجون. ماسەلەن, تۇزىلگەن شارت بويىنشا اتالمىش اۋىلدىڭ مادەنيەت ۇيىنە كۇردەلى جوندەۋ جۇمىستارى جۇرگىزىلىپتى. ساۋلەتتى وردانىڭ بۇگىنگى كەلبەتى ەرەكشە دەۋگە كەلەدى. اتالمىش شارۋاشىلىق وعان ءوز ەسەبىنەن 17 ميلليون تەڭگە قارجى بولگەن.
ءماجىلىس دەپۋتاتتارى اۋىل تۇرعىندارىنىڭ ءتۇرلى ماسەلەلەر بويىنشا قويعان سۇراقتارىنا تولىمدى جاۋاپ بەرۋمەن قاتار, كەزەگى كۇتىپ تۇرعان كۇردەلى ماسەلەلەر جونىندە پىكىر الماستى.
باقبەرگەن امالبەك, «ەگەمەن قازاقستان» اقمولا وبلىسى, تسەلينوگراد اۋدانى
