قازاقستاندىق اۋىر اتلەت ۆلاديمير سەدوۆ تا دوپينگ كۇدىگىنە ءىلىنىپ جاتىر.
Proسپورت مالىمەتىنشە, قازاقستان ۇلتتىق وليمپيالىق كوميتەتىنە ۆلاديمير سەدوۆتىڭ دوپينگ-تەكسەرىسىنەن تىيىم سالىنعان پرەپارات تابىلعانى جونىندەگى حات كەلگەن. وندا سپورتشىنىڭ 2008 جىلى بەيجىڭ وليمپيالىق ويىندارىندا ونەر كورسەتكەن كەزىندە الىنعان سىنامادان تىيىم سالىنعان زاتتاردىڭ تابىلعانى ايتىلعان.
ەسكە سالا كەتەيىك, ۆلاديمير سەدوۆ سوندا 85 كيلوعا دەيىنگى سالماقتا ءتورتىنشى ورىنعا قول جەتكىزگەن ەدى. «تەكسەرۋدىڭ قورىتىندىلارى ۆلاديمير سەدوۆتىڭ «ا» سىناماسىنان ستانوزولول تابىلدى. كەلەسى اپتادا «ب» سىناماسى اشىلاتىن بولادى», - دەلىنگەن حابارلامادا.
ايتا كەتۋ كەرەك, حالىقارالىق اۋىر اتلەتيكا فەدەراتسياسى 2006 جىلى سەدوۆتى وسىنداي ءتارتىپ بۇزۋشىلىعى سالدارىنان سپورت جارىستارىنان شەتتەتىپ ەدى. سول جولى ول 2008 جىلدىڭ 18 مامىرىنا دەيىن جازاسىن وتەگەن بولاتىن.
بۇعان قوساتىنىمىز, باسىلىمنىڭ مالىمەتىنشە, اۋىر اتلەت ماريا گرابوۆەتسكايانىڭ قانىنان دا تىيىم سالىنعان زاتتار تابىلعان. ول دا 2008 جىلعى وليمپيادا كەزىندە الىنعان سىنامادان شىقتى. سول ويىنداردا ماريا قولا مەدال العان بولاتىن.
بۇل كەزگە دەيىن قازاقستاندىق وليمپيالىق چەمپيوندار يليا يلين, ءزۇلفيا چينشانلو, مايا مانەزا جانە سۆەتلانا پودوبەدوۆا جارىستاردان شەتتەتىلگەن ەدى. وسىنىڭ نەگىزىندە قازاقستان وليمپياداعا بەرىلگەن 10 جولدامانىڭ 2-ءىن قايتارۋعا ءماجبۇر بولدى.
ال ۆلاديمير سەدوۆ جاقىندا تالدىقورعاندا وتكەن رەسپۋبليكا چەمپيوناتىندا ارانداتۋشىلىق تۇرعىدا ۇلكەن شۋ شىعارىپ, جۇرت نازارىنا ىلىكتى. 94 كيلوعا دەيىنگى سالماقتا سىنعا تۇسۋگە ءتيىستى ول تۇعىرعا شىعىپ تۇرىپ, زىلتەمىردى كوتەرمەي كەتىپ قالدى. ءجاي كەتكەن جوق, «مىنە, ساعان ناعىز وليمپيالىق چەمپيون» دەپ, سىرتىندا رەسەيلىك اتلەت الەكساندر يۆانوۆتىڭ سۋرەتى بار جەيدەنى زالعا قاراي لاقتىرىپ كەتتى. ال يۆانوۆ لوندوندا يليننەن قالىپ قويىپ, ەكىنشى ورىن العان بولاتىن.
مۇرات ايتقوجا
