دۇنيەجۇزى مويىنداۋىنىڭ تاعى ءبىر دالەلى

  دۇبىرگە تولى دۇنيەنىڭ جاقسى جاڭالىعى كوپ بولسا ەكەن دەپ تىلەيمىز. ال سول جاقسى لەبىز ءوز ەلىمىزگە قاتىستى بولعاندا بوركىمىزدى اسپانعا اتقانداي قۋانامىز. قازاقستان بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. بىرىككەن ۇلتتار ۇيىمىنا مۇشە 193 مەملەكەتتىڭ 138-ءى قازاقستان ءۇشىن داۋىس بەردى. مۇنىڭ ءوزى زاڭدى قۇبىلىس ەدى. ەلباسى نۇرسۇلتان نازارباەۆتىڭ سىندارلى سىرتقى ساياساتىنىڭ ارقاسىندا دۇنيەجۇزىندەگى بەيبىتشىلىكتى جاقتايتىن مەملەكەتتەر مەن ءىرى حالىقارالىق ۇيىمدار قازاقستاندى تانىپ وتىر. ەندى 2017-2018 جىل­­دارعا قاۋىپسىزدىك كەڭەسىنە تۇراقتى ەمەس مۇشە بولۋ ارقىلى قا­زاقستاننىڭ بەي­بىت­شىلىكتى ساقتاۋ ىسىنە قوسار ۇلەسى قوماقتى بولا تۇسپەك. قازىر ءدۇ­نيە كۇر­دەلى كەزەڭدى باس­تان كەشىپ وتىر. ەكو­نوميكالىق, قار­جىلىق داعدارىس تەڭىز تولقىنى سەكىلدى قاي­تا­لاپ سوعىپ وتىراتىن قۇ­بىلىس. حالىق­ارالىق ەكونو­مي­كالىق بايلا­نىستاردىڭ ورنىعۋى, ەلىمىزدىڭ ىشكى قۋاتى مۇنداي تىعىرىق­تاردان جول تابۋعا مۇمكىندىك بەرىپ كەلەدى. بىراق, سوڭعى كەزدەرى تەررورلىق ارەكەتتەر قاي ەلدى دە سانسىراتىپ وتىر. سودىرلار, تەررورشىلار ەل, جەر تاڭدامايتىن بولدى. ولار جاساعان جارىلىستاردى كۇن سايىن ەستيتىن بولدىق. قاۋىپتىڭ قايدان بولارىن بىلمەگەن قاي ەلدىڭ دە بەيبىت تۇرعىندارى جازىقسىز زارداپ شەگىپ, مەرت بولۋدا. قازاقستان بىرىككەن ۇلتتار ۇيىمى­نىڭ كۇن تارتىبىندە تۇرعان وسىنداي وزەكتى ماسەلەلەردى شەشۋگە اتسالىسادى. تورتكۇل دۇنيە, الپاۋىت ەلدەر مەن بەدەلدى حالىقارالىق ۇيىمدار ەلباسى نۇرسۇلتان نازارباەۆتىڭ حالىقارالىق تۇراقتىلىقتى ساقتاۋ جونىندەگى ۇسىنىستارىن جوعارى باعالاپ كەلەدى. بيىل ۆاشينگتوندا وتكەن يادرولىق قاۋىپسىزدىك ءسامميتى اياسىندا مالىمدەگەن مانيفەسىندە نۇرسۇلتان نازارباەۆ يادرولىق قاۋىپتى قارۋلاردىڭ سودىرلار قولىنا ءتۇسىپ قالماۋىن ەسكەرتىپ ايتتى. قازىر ەلدەردە كۇن قۇرعاتپاي بولىپ جاتقان تەررورلىق ارەكەتتەر كورەگەن سايا­ساتكەردىڭ ەسكەرتپەسىن قۇلاققا ءىلۋ كەرەكتىگىن دە مەڭزەيدى. بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانعان قازاقستان تاراپى الداعى ەكى جىلدا تورتكۇل دۇنيەگە «كەمەدەگىنىڭ جانى ءبىر» دەگەن قازاق حالقىنىڭ دانالىعىن تالاي دالەلدەيتىن بولادى. قالقامان جاقىپ, قازاقستان حالقى اسسامبلەياسىنىڭ مۇشەسى, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ پروفەسسورى قوستاناي