دونالد ترامپتىڭ كۇيەۋ بالاسى – پارتيزاندار ۇرپاعى
اقش پرەزيدەنتتىگىنە ۇمىتكەر, ميللياردەر دونالد ترامپتىڭ يۆانكا ەسىمدى قىزى بەلورۋس پارتيزانىنىڭ نەمەرەسىنە كۇيەۋگە تيگەن بولىپ شىقتى.
The New York Observer گازەتىنە بەرگەن سۇحباتىندا ترامپتىڭ كۇيەۋ بالاسى دجارەد كۋشنەر كۇتپەگەن جەردەن ءوزىنىڭ گرودنو وبلىسىنداعى نوۆگرۋدوك قالاسىندا تۋىپ-وسكەن بايىرعى پارتيزانىنىڭ تىكەلەي ۇرپاعى ەكەنىن ايتىپ بەردى. ونىڭ اتاسى مەن اجەسى 1943 جىلى بەلورۋس ورماندارىنىڭ بىرىندە تابىسىپتى.
ادامنىڭ ەڭ جاقىن دوسى ەشكى مە؟
لوندوننىڭ كورولەۆا ماريا ۋنيۆەرسيتەتىنىڭ بيولوگتارى ەشكىلەردىڭ قابىلەتتەرى يتتەر مەن جىلقىلاردان ەشبىر تومەن ەمەس دەگەن تۇجىرىم جاسادى.
عالىمدار تاجىريبە جاساۋ بارىسىندا ەشكىلەردىڭ ءۇي جانۋارلارى ىشىندەگى ەڭ اقىلدىلارىنىڭ ءبىرى ەكەنىنە كوز جەتكىزىپتى. ولار قاشاندا ادامداردىڭ ءارتۇرلى ارەكەتتەرىنە جاۋاپ قايتارىپ, ولارعا قيىن كەزدەردە كومەككە كەلە الادى. ەشكىلەر ادامنىڭ كوڭىل-كۇيىنە قاراي وزدەرىن دە وزگەرتىپ تۇرادى.
يتتەردىڭ ۇيلەنۋ تويى يەسىنە 2000 فۋنتقا ءتۇستى
ۇلىبريتانيادا تۇراتىن ءبىر ايەل ءوزىنىڭ ەكى ءيتىن ۇيلەندىرىپ, سول شاراعا 2000 فۋنت ستەرلينگ اقشا جاراتتى.
ايەلدىڭ شي-تسۋ تۇقىمداس يتتەرىن جاقسى كورەتىنى سونشالىق, ول بۇلاردى ۇيلەندىرۋدى وراسان زور شوۋعا اينالدىرىپ جىبەرىپتى. مۇنى ول تويدىڭ بارلىق سالت-داستۇرلەرىنە ساي جاساپ شىققان. اتاپ ايتقاندا, قالىڭدىققا اق كويلەك, كۇيەۋ جىگىتكە قارا سموكينگ كيگىزگەن. ءتىپتى, تويدىڭ ارنايى تورتى مەن اشەكەيلەرى دە بولىپتى. بىلايشا, ءبارىن ادامداردىڭ تويلارىنداي ەتىپ ۇيىمداستىرعان. جومارت ايەل ءوزىنىڭ تاربيەسىندەگى يتتەرىنىڭ بۇل تويىنا 2000 فۋنت اقشا شىعارىپتى. ال «باقىتتى جۇپتىڭ» اتتارى ەلۆيس جانە بەللا بولىپ كەلەدى. ولاردىڭ بەلۆيس دەگەن كۇشىكتەرى دە بار كورىنەدى.
ءبىر ساباق ءجۇزىمنىڭ باعاسى - $10 900
جاپونيادا ءبىر ساباق ءجۇزىم 11 مىڭ دوللارعا جۋىق اقشاعا ساتىلىپ, تاعى ءبىر الەمدىك رەكورد تىركەلدى.
ەلدەگى سۋپەرماركەتتەردىڭ ءبىرىنىڭ قوجايىنى 30 دانا ءجۇزىمنىڭ اربىرىنە 360 دوللاردان اقشا تولەپ, ونىڭ سول ساباعى ءۇشىن 11 900 دوللار قارجى شىعارۋعا ءماجبۇر بولعان. ال ەرەكشە ءتاتتى ءدامى بار ءجۇزىم «لاعىلدى ريمدىكتەر» دەپ اتالادى. ول جاپونيانىڭ يسيكاۆا پرەفەكتۋراسىندا ءوسىرىلىپ, ءبىرىنشى رەت ساۋداعا شىعارىلىپ تۇر ەكەن. وتكەن جىلى بۇل ەلدە ەكى دانا قاۋىن 12 مىڭ دوللارعا ساتىلعان بولاتىن.
61 جاسىندا بالپاناقتاي ۇل تۋعان
قىتايدىڭ چجەدزيان پروۆينتسياسىندا تۇراتىن 61 جاستاعى زەينەتكەر ايەل پەرزەنتتى بولدى.
بۇعان چان ەسىمدى ايەل مەن ونىڭ 66 جاستاعى كۇيەۋى 30 جاسار قىزدارى اۋىر ناۋقاستان قايتىس بولعاننان كەيىن بارعان. ولار قولدان ۇرىقتاندىرۋ جولىمەن بالالى بولۋعا شەشىم قابىلداپتى. چجەدزيان ۋنيۆەرسيتەتى جانىنداعى اۋرۋحانا اعا اكۋشەرىنىڭ ايتۋىنشا, چان وسىلايشا ايماقتاعى ەڭ جاسى ۇلكەن انا بولىپ وتىر.
جاس جۇبايلار سۋ استىندا جۇزىك الماستى
رەسەيدىڭ نيجني نوۆگورود قالاسىندا تۇراتىن پاۆەل جانە ەلەنا سيدنەۆالار وزدەرىنىڭ ۇيلەنۋ تويىن الدىندا جۇزىك الماسۋ راسىمدەرىن 10 مەترلىك تەرەڭدىكتەگى سۋ استىندا وتكىزدى.
قازىر پاۆەل سۋدا ءجۇزۋ نۇسقاۋشىسى بولىپ جۇمىس ىستەيتىنى, ال ەلەنانىڭ ەكى جىلدان بەرى دايۆينگپەن اينالىساتىنى بەلگىلى بولىپ وتىر. ولار اۆتوزاۆودسك احاج-ىنا تىركەلگەننەن كەيىن ۆەرسمەن اۋدانىنا اتتانىپ, سۋى كەرەمەت تازا كليۋچيك كولىنە تۇسكەن. مۇندا تالاي مارتە ءتۇسىپ كەلگەن پاۆەل بۇل جولى قالىڭدىعىن سوڭىنان ەرتكەن. راس, ولار سۋ استىندا ءبىر-بىرلەرىنە شىن ەمەس, فولگادان جاسالعان جۇزىكتەر كيگىزگەن.
«جولى بولعىش» سيىردى جاي وعى دا جايراتا المادى
اۆستريانىڭ زالتسبۋرگ قالاسىنىڭ تۇبىندەگى فەرمادا تابىننىڭ 19 سيىرىنا ءبىر مەزگىلدە نايزاعاي ءتۇستى. سولاردىڭ 18-ءى بىردەن ءتىل تارتپاي كەتسە, بىرەۋى عايىپتان تايىپ, ءتىرى قالعان.
ءبىر قىزىعى, امان قالعان سيىردىڭ لاقاپ اتى نەمىس تىلىنەن اۋدارعاندا, «جولى بولعىش» ەكەن. باس باقتاشى گەورگ بۋحەگگەردىڭ ايتۋىنشا, وقيعا سيىرلار جاۋىننان قاشىپ, الىپ شىرشا اعاشىنىڭ تۇبىنە تىعىلعان كەزدە ورىن العان. سول كەزدە داراققا جاي ءتۇسىپ, 18 ءىرى قارا بىردەن ءولىپ كەتكەن. ال «جولى بولعىش» دەگەن اتى بار سيىرعا تيتتەي دە زالال كەلمەگەن.
اقپارات اگەنتتىكتەرىنىڭ ماتەريالدارى نەگىزىندە دايىندالدى
