كونەدەن سىر شەرتكەن

قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعىنىڭ ءاس­كەري-تاريحي مۋزەيىندە ۆەنگريالىق فوتوسۋرەتشى بەلا بەرنولاكتىڭ «بۋداپەشتتىڭ 1945 جىلدان بۇگىنگى كۇنگە دەيىنگى دامۋى» اتتى فوتوكورمەسىنىڭ اشىلۋ ءراسىمى ءوتتى. فوتوسۋرەتشى بەلا بەرنولاك 1967 جىلى بۋداپەشت قالاسىندا تۋعان. اكەسىنەن مۇرا ەتكەن فو­توونەرگە دەگەن ماحابباتى مەن سۋرەتكە ءتۇسىرۋ ونەرىنىڭ داع­دى­لارى ونى بۇگىنگى بيىككە جەتەلەگەن. بەلا بەرنولاكتىڭ ەڭبەكتەرى بۋداپەشت قالاسىنىڭ پوليتسيا باسقارماسىنىڭ رەزيدەنتسياسىندا, مەملەكەتتىك مەكەمەلەر مەن بۋداپەشتتەگى بالالار تەمىر-جولى ستانساسى قابىرعالارىنىڭ ءسانىن كىرگىزىپ تۇر. «بۋداپەشتتىڭ 1945 جىلدان بۇگىنگى كۇنگە دەيىنگى دامۋى» اتتى فوتوكورمە بۋدا­پەشت پوليتسياسىنىڭ, جەدەل جاردەم قىزمەتكەرلەرىنىڭ, ءورت سوندىرۋشىلەردىڭ جانە ءتو­تەنشە جاعداي قىزمەتى جۇ­مىس­شىلارىنىڭ كۇندەلىكتى ەڭبەكتەرىن بەينەلەيدى. اۆتوردىڭ تۋىندىلارى بۋداپەشت قالاسىنىڭ اسەمدىگى مەن دامۋىن عانا ەمەس, سونىمەن بىرگە, سوعىستان كەيىنگى جىل­دار­داعى ۆەنگرياداعى بىرلەسۋ, بوستاندىق الۋ كۇرەسىن, قايتا جاڭعىرتۋلاردىڭ قيىن جولدارىن كورسەتەدى. فوتوسۋرەتشىنىڭ كەيبىر جۇمىستارى پارلامەنت عيماراتىنىڭ توبەسىنەن, كو­رولدىك سارايداعى ۇلتتىق گا­لە­رەيانىڭ توبەسىنەن جانە وتۋگە تىيىم سالىنعان جەرلەردەن تۇسىرىلگەن. ايتۋلى شاراعا ەلىمىزدىڭ قوعام, عىلىم مەن مادەنيەت قايراتكەرلەرى, قورعانىس مي­نيسترلىگىنىڭ باسشىلارى, قا­زاقستان رەسپۋبليكاسىنداعى ۆەن­گريا ەلشىلىگى ىستەرىندەگى ۋاقىتشا سەنىمدى وكىلى شاندور دوروگي مىرزا جانە اۆتوردىڭ ءوزى قاتىسىپ, كونەدەن سىر شەرتەر كورمەنىڭ ءمانى مەن ماڭىزىنا توقتالىپ ءوتتى. راۋان قايدار, «ەگەمەن قازاقستان» سۋرەتتى تۇسىرگەن ورىنباي بالمۇرات