پروكۋرورلىق قاداعالاۋ قايدا؟

وتكەن اپتاداعى ۇكىمەت وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا رەسپۋبليكاداعى كاسىپورىنداردىڭ ءوز جۇمىسشىلارىنا جالاقى قارىزى 1 ميلليارد 600 ميلليون تەڭگەنى قۇراي­تىنىن ايتتى. ونىڭ ىشىندە ءۇش ايعا دەيىن­گى اعىمداعى بەرەشەكتەر 514 ميل­ليون تەڭگە, ءۇش ايدان ءوتىپ كەتكەن بەرەشەك شامامەن 134 ميل­ليوندى قۇرايدى ەكەن. بانك­روتقا ۇشىراعان كاسىپ­ورىن­دار­دىڭ بەرەشەگى 955 ميلليون تەڭگەگە جەتكەن. بۇل ايتۋعا وڭاي بولعانىمەن ارتىندا زىلدەي سالماعى بار ۇلكەن ماسەلە. جۇرت­شى­لىقتىڭ ەسىندە بولار, وسى­دان ءبىراز بۇرىن ەلباسى سول كەز­دەگى باس پروكۋرور اسحات داۋىل­باەۆقا جالاقى قارىزى تۋرا­لى ماسەلەگە قاتاڭ قاداعالاۋ جاساۋ تۋرالى تاپسىرما بەرگەن بولا­تىن. سوندا مينيستر اي­تىپ وتىرعان بۇگىنگى كورسەتكىش پرو­كۋرورلىق قاداعالاۋدىڭ قاۋ­قار­سىز بولعانىن بايقاتپاي ما؟ تاباناقى, ماڭداي تەرىنىڭ اقى­سىن الا الماعان ادام اشى­نا­دى, ارينە. اشىنعان ادام ارىز جازادى. وسىلايشا «ەگەمەن قازاقستاننىڭ» الماتى ءبولىم­شەسىنە حاميت سابىرباەۆ دەگەن ازامات تا ارىز الىپ كەلىپتى. ونىڭ ايتۋىنشا, ءوزى جۇمىس ءىس­تەپ جاتقان مەكەمە باسشىلىعى اۋىسىمى بىتكەن سوڭ ونى ۇيىنە قايتارماي كەلەسى اۋىسىمعا ماجبۇرلەپ قال­دى­رادى. ناتيجەسىندە ەكى كۇن, ەكى ءتۇن قاتارىنان قاراۋىلدا تۇرعان ول كولىگىنىڭ رولىندە ۇيىق­تاپ كەتىپ, اپاتقا ۇشىرايدى. نە­سيەگە العان ماشيناسىنىڭ ساۋ-تامتىعى قالماي, ءوزى اۋرۋحاناعا ءتۇسىپ, وتا جاساتىپ, ەكى اي ەمدەل­گەن وعان مەكەمە تاراپىنان ەش­قان­داي جاردەم بولمايدى. ءجار­دەم بەرمەك تۇرماق, جۇمىسىنا قايتا شىعايىن دەسە, ونى قابىل­دا­ماي اۋرە-سارساڭعا سالادى. شاراسى تاۋسىلعان ح.سابىرباەۆ «ەگەمەنگە» جۇگىنۋگە كەلگەن ەكەن. ءبىز ح.سابىرباەۆتىڭ ارىزىن ول جۇمىس ىستەيتىن مەكەمە ورنا­لاسقان الماتى قالاسى­نىڭ جەتىسۋ اۋداندىق پروكۋرا­تۋرا­سى­نا جولدادىق. ارادان ءبىر ايعا جۋىق ۋاقىت وتەر-وتپەستەن اۋدان پروكۋرورى ناريمان بەكنازاروۆتان رەداكتسياعا حات كەلدى. ح.سابىرباەۆتىڭ ارىزى تەك­سەرىلىپ, وندا ايتىلعان ءجايت­تار دالەلدەنىپ, مەكەمە باسشى­لىعى ارىز يەسىنە ماتەريالدىق جانە مورالدىق شىعىنىن وتەپ بەرىپتى. پروكۋرورلىق قادا­عالاۋدىڭ پارمەندىلىگى دەگەن وسى ەمەس پە؟ ال ەندى وسىعان كەرەعار جاع­داي تۋرالى ايتايىق. جاقىن­دا رەداكتسيانىڭ الماتى ءبو­لىم­شەسىنە كاسىپكەر ءداۋىر مۇرات­باەۆ ارىز الىپ كەلدى. ول باس­قارعان «ترال-تاسىمال» جاۋاپ­كەرشىلىگى شەكتەۋلى سەرىكتەستىگى اقمولا وبلىسى, ارشالى اۋدا­نىن­داعى «ارشالى-نەرۋد» جاۋاپ­كەرشىلىگى شەكتەۋلى سەرىك­تەس­تىگىندە كەلىسىمشارت­پەن جۇمىس ىستەيدى. مىندەت ورىندالعان. بىراق 3-4 ايدىڭ 11 ميلليون 800 مىڭ تەڭگە جالاقىسىن ءالى كۇنگە الا الماي ءجۇر ەكەن. ارشالى اۋداندىق پرو­كۋرا­تۋراسىنا ءداۋىر مۇرات­باەۆ­تىڭ ارىزىن جىبەردىك. بەس-التى ايدىڭ ءجۇزى بولدى. تىم-تىرىس. مىنە, پروكۋرورلىق قاداعالاۋدىڭ پارمەنسىزدىگى دەگەن وسى ەمەس پە؟ «قازىرگى ۋاقىتتا بۇل باعىتتا باس پروكۋراتۋرامەن, قارجى مينيسترلىگىمەن جانە جەرگىلىكتى اتقارۋشى ورگان­دارمەن بىرلەسكەن جۇمىستار جۇرگىزىلۋدە», دەدى مينيستر تامارا دۇيسەنوۆا. ناتيجەسىن ۋاقىت كورسەتەدى. ءبىز دە كۇتەمىز, ازىرگە.  شارافاددين ءامىروۆ, ەگەمەن قازاقستان»