استاناداعى «تۇلپار-تالگو» زاۋىتىنىڭ دانەكەرلەۋشىلەرى قىتاي استاناسى بەيجىڭدە وتكەن حالىقارالىق «Arc Cup» بايقاۋىندا ەكىنشى ورىنعا يە بولدى. بايقاۋعا الەمنىڭ 25 ەلىنەن 300 دانەكەرلەۋشى قاتىسىپتى.
كوماندالىق بايقاۋدا قازاقستان ماماندارىنىڭ دانەكەرلەۋ شەبەرلىگىن كورسەتكەن ۆلاديمير شۆارتس پەن ميحايل گوفمان بايقاۋدىڭ جۇلدەلى ەكىنشى ورنىن جەڭىپ العان. قازاقستان مۇنداي بايقاۋعا تۇڭعىش رەت قاتىسىپ وتىر ەكەن. دانەكەرلەۋشى شەبەرلەر گازبەن, مايىسقان ەلەكترودپەن, توت المايتىن بولات, اليۋميني, مىس, نيكەل بۇيىمدارىن, تيتان قۇيماسىن دانەكەرلەگەن. ون ەكى جىلدىق ەڭبەك ءوتىلى بار دانەكەرلەۋشى ميحايل گوفمان اليۋميني بۇيىمدارىن دانەكەرلەۋدەگى شەبەرلىگىن كورسەتىپ, وزىندىك تاجىريبەسىمەن ءبولىستى. سوڭعى بەس جىلدا اليۋمينيمەن جۇمىس جاساپ جۇرگەن ۆلاديمير شۆارتس تەمىردەن باعىن سىناپ كوردى. ءارتۇرلى مەتالدارمەن جۇمىس جاساعان دانەكەرلەۋشىلەردىڭ شەبەرلىگىن ارنايى كوميسسيا باعالاپتى. بايقاۋعا قاتىسۋشىلار ارنايى ۇيىمداستىرىلعان كورمەنىڭ قۇرالدارىمەن دە تانىسقان. – ءبىز قازاقستاندا دا مىقتى ماماندار بارلىعىن كورسەتۋدى ماقسات ەتتىك. قيىندىقتار بولدى. ونىڭ ىشىندە باسقا ورتا, باسقا قۇرال-جابدىقتارمەن جۇمىس جاسادىق. ءبىز بايقاۋ اراسىندا وزىمىزدە جوق وقۋ قۇرالدارىمەن تانىستىق. بايقاۋعا پوستكەڭەستىك ەلدەردىڭ دانەكەرلەۋشىلەرى قاتىستى. ولارمەن ءوزارا تاجىريبە الماستىق, – دەدى م.گوفمان.نۇرباي ەلمۇراتوۆ,
«ەگەمەن قازاقستان»
مۇنداي بايقاۋ كەلەسى جىلى شانحايدا ۇيىمداستىرىلادى ەكەن. بۇيىرتسا, قازاقستاندىق دانەكەرلەۋشىلەر كەلەسى جىلى «التىندى» قانجىعاسىنا بايلاۋدان دامەلى.
