بيزنەس جاعدايى جاقساردى

كەشە ورتالىق كوممۋنيكاتسيالار قىزمەتىندە ۇلتتىق ەكونوميكا مينيسترلىگى كاسىپكەرلىكتى دامىتۋ دەپارتامەنتىنىڭ ديرەكتورى عاليا جولدىباەۆا ءباسپاسوز ءماسليحاتىن وتكىزدى. ول بيزنەس-احۋالدى جاقسارتۋ بويىنشا اتقارىلىپ جاتقان جۇمىستار جونىندە ايتتى. دەپارتامەنت ديرەكتورى 2016 جىلى ناۋرىزدا رۇقسات بەرۋ قۇ­جات­تارىن قىسقارتۋ جانە رۇقسات بەرۋ راسىمدەرىن وڭايلاتۋ ماسەلە­لەرى جونىندەگى زاڭ تۋرالى اڭگى­مەلەدى. سونداي-اق, زاڭنامالىق قۇجات كاسىپكەرلىكتىڭ دامۋىنا, بيز­نەستىڭ جاندانۋىنا جانە ونىڭ قىز­مەتىن كەڭەيتۋگە اسەر ەتەتىنىن جەتكىزدى. بۇلارمەن بىرگە زاڭنىڭ قابىل­دانۋىنا بايلانىستى كاسىپكەرلىك سالاسىندا 34 رۇقسات بەرۋ قاعازى زاڭ بويىنشا مۇلدە جويىلعانىن مالىمدەدى. سپيكەر ۇكىمەت اكىمشىلىك كەدەر­گىلەردى جويۋ ماقساتىندا بيزنەس-احۋالدى جاقسارتۋ مەن كاسىپ­كەر­لىكتى قولداۋ بويىنشا جۇيەلى جۇ­مىس اتقارىپ جاتقانىنا توقتالدى. «كاسىپكەرلىكتى دامىتۋ – بۇل ەلى­مىزدىڭ ەكونوميكاسى مەن حالىقتىڭ ءال-اۋقاتىنا اسەر ەتەتىن ەڭ ماڭىزدى فاكتوردىڭ ءبىرى. 2016 جىلى كاسىپكەرلىك قىزمەت­تى مەملەكەتتىك رەتتەۋ جۇيەلەن­دىرىلدى. ءوزىن ءوزى رەتتەۋ ينستيتۋتى ەنگىزىلدى. رۇقسات بەرۋ قۇجات­تارى ەكى ەسە قىسقاردى. وزدەرى­ڭىز بىلە­تىندەي, قازاقستاندا 2016 جىلعى 1 قاڭتاردان باستاپ كاسىپكەرلىك كودەكس جۇمىس ىستەپ تۇر. كاسىپكەرلىك كودەكس پەن قازاقستانداعى كاسىپكەرلەردىڭ قۇقىقتارىن قورعاۋ جونىندەگى ۋاكىلەتتىلىكتىڭ ءرولىن كۇشەيتۋ بويىنشا شارالار قابىلداندى. 2016 جىلى ناۋرىزدا رۇقسات بەرۋ قۇجاتتارىن قىسقارتۋ جانە رۇقسات بەرۋ راسىمدەرىن وڭايلاتۋ ماسەلەلەرى جونىندە زاڭ قابىلداندى. زاڭ كاسىپكەرلىكتىڭ دامۋىنا, بيزنەستىڭ جاندانۋىنا جانە ونىڭ قىزمەتىن كەڭەيتۋگە اسەر ەتەدى. ويتكەنى, وسى زاڭ بويىنشا رۇقسات بەرۋ جۇيەسى ەلۋ پايىزعا قىسقاردى. بۇل دەگەنىمىز, 34 رۇقسات بەرۋ قاعازى زاڭ بويىنشا مۇلدە جويىلعانىن, 14 رۇقسات بەرۋ ەسكەرتپە تارتىبىنە اۋىستىرىلعانىن بىلدىرەدى. وڭتايلاندىرۋ اياسىندا 105 رۇقسات بەرەتىن قۇجاتتار الىنىپ تاستالدى», دەدى ع.جولدىباەۆا. اعىمداعى جىلدىڭ مامىر ايىندا قولدانىسقا ەنگەن «ءوزىن ءوزى رەتتەۋ تۋرالى» زاڭ «100 ناقتى قادام» ۇلت جوسپارىنىڭ اياسىندا جاسالعانىن ايتقان دەپارتامەنت ديرەكتورى, ونىڭ نەگىزگى ماقساتى ءوزىن ءوزى رەتتەيتىن ۇيىمعا ەرىكتى جانە مىندەتتى مۇشەلىككە نەگىزدەلگەنىن ايتتى. ول ەكونوميكانى مەملەكەتتىك رەتتەۋدىڭ تيىمدىلىگىن ارتتىراتىن كورىنەدى. «قابىلدانعان شارالاردىڭ ناتيجەسىندە ادال كاسىپكەرلەر ءوزىن ءوزى رەتتەۋ ۇيىمىنىڭ ادال ەمەس مۇشەلەرىن قاتاردان شىعارىپ تاستاۋعا مۇددەلى بولادى. ناتيجەسىندە, بۇل شارا بيزنەستىڭ باسەكەگە قابىلەتتىلىگىن ارتتىرۋعا ىقپال ەتەدى», دەدى دەپارتامەنت باسشىسى. نۇرباي ەلمۇراتوۆ, «ەگەمەن قازاقستان»