مەموراندۋمعا قول قويدى

«نۇر وتان» پارتياسى «اتامەكەن» ۇلتتىق كاسىپكەرلەر پالاتاسىمەن كاسىپكەرلىكتى دامىتۋ جانە بيزنەس مۇددەسىن قورعاۋ جونىندەگى جۇيەلى قارىم-قاتىناس ورناتۋ تۋرالى كەلىسىمدى بەكىتتى. ءوزا­را ىنتىماقتاستىق ءجونىن­دەگى مەموراندۋمعا «نۇر وتان» پارتياسى توراعاسى­نىڭ ءبىرىنشى ورىنباسارى مۇح­تار قۇل-مۇحاممەد پەن «اتا­مە­كەن» ۇلتتىق كاسىپكەر­لەر پالا­تاسىنىڭ باسقار­ما ءتورا­عاسى ابىلاي مىرزاح­مەتوۆ قول قويدى. قۇجات وتاندىق كاسىپكەرلىكتەگى باسەكەلەستىكتى ارتتىرۋ بويىنشا بىرلەسكەن جانە كەلىسىلگەن ارەكەتتەردى جۇزەگە اسىرۋ بارىسىندا ءوزارا قولداۋ مەن بەلسەندى ىنتىماقتاستىقپەن قامتاماسىز ەتۋدى كوزدەيدى. سونداي-اق, بيز­نەس-باستامالاردى ورىنداۋ ءۇشىن قولايلى قۇقىقتىق, ەكونومي­كالىق جانە الەۋمەتتىك جاعداي قالىپتاستىرۋ دا ماقسات ەتىلەدى. جيىنعا جەتەكشىلىك ەتكەن مۇحتار قۇل-مۇحاممەد مەملەكەت باسشىسىنىڭ 2050 جىلعا دەيىنگى قازاقستاننىڭ دامۋ ستراتەگيا­سىندا كورسەتىپ بەرگەن باستى تاپسىرمالارىنىڭ ءبىرى – ەلىمىزدىڭ ءىجو-دەگى شاعىن جانە ورتا بيزنەستىڭ ۇلەسىن 50 پايىزعا دەيىن ارتتىرۋ بولىپ تابىلاتىندىعىن اتاپ ءوتتى. «پارتيامىزدىڭ كوشباسشىسى ايقىنداپ بەرگەن الەمنىڭ دامىعان 30 مەملەكەتىنىڭ قاتارىنا قوسىلۋ جونىندەگى بيىك ماقساتتارعا قول جەتكىزۋ ءۇشىن كاسىپكەرلەردىڭ جۇمىس ىستەۋىنە مەيلىنشە قولايلى جاعداي جاساۋىمىز كەرەك. بۇل كۇردەلى ىستە «نۇر وتان» پارتياسى ماڭىزدى ءرول اتقارۋى ءتيىس. ءبىز وتاندىق كاسىپكەرلەرگە جەدەل جانە ءتيىمدى كومەك كورسەتۋ ءۇشىن ورتالىق پەن وڭىرلەردەگى بارلىق رەسۋرستاردى ىسكە قوسامىز. ويتكەنى, كاسىپكەرلىك – وركەندەگەن ەكونوميكانىڭ نەگىزى», – دەدى مۇحتار ابرار ۇلى. ايتا كەتەيىك, «نۇر وتان» پارتياسى ءوزىنىڭ «قازاقستان–2021: بىرلىك. تۇراقتىلىق. جاسامپازدىق» اتتى سايلاۋالدى باعدارلاماسىندا قازاقستانداعى كاسىپكەرلىككە جاسالاتىن جاعدايدى الەمنىڭ جەتەكشى ەلدەرىندەگى دەڭگەيگە دەيىن جەتكىزۋدى وزىنە مىندەت ەتىپ العان. سوندىقتان دا كەدەندىك باسقارۋدى جانە رۇقسات جۇيەسىن جاقسارتۋعا, سۋبسيديالاۋ ۇدەرىسى مەن نەسيە كەپىلدىگىن اۆتوماتتاندىرۋعا ءجىتى كوڭىل ءبولىنىپ كەلەدى. ال پارتيا جەتەكشىلەرىنىڭ 2021 جىلعا قاراي قازاقستاندى «Doing Business» رەيتينگى بويىنشا 25 وزىق مەملەكەتتىڭ قاتارىنا قوسۋ مىندەتىن قويىپ وتىرعاندىعىن ەسكەرسەك, ەل ەكونوميكاسىنىڭ نەگىزگى تىرەگى سانالاتىن ورتا جانە شاعىن كاسىپكەرلىكتى دامىتۋ قاجەتتىلىگى تۋىندايتىنى ءسوزسىز. ەندەشە, وسى تۇرعىدا ۇلتتىق كاسىپكەرلەر پالاتاسى مەن «نۇر وتان» پارتياسىنىڭ بۇگىنگىدەي مامىلەگە كەلۋى وتە ورىندى بولماق. «نۇر وتاننىڭ» ءبىز ارقىلى شاعىن جانە ورتا كاسىپ سالاسىنا بەت بۇرۋى زور جاۋاپكەرشىلىك ءارى ۇلكەن جەتىستىك. سەبەبى, پارتيا بۇگىنگى قوعامداعى وتە اۋقىمدى سايا­سي كۇش بولسا, ۇلتتىق پالاتا الىپ ەكونوميكامىزدىڭ بويىنا قان جۇگىرتەتىن كاسىپكەرلىكتى رەتتەيتىن نەگىزگى كىلت. سوڭعى كەزدەرى ۇلتتىق پالاتا شالعاي ەلدى مەكەندەر مەن الىس اۋداندارداعى حالىقتى شاعىن جانە ورتا كاسىپكە باۋلىپ, ۇيرەتۋدە ارنايى ورتالىقتار مەن كەڭسەلەر اشىپ, بەلسەندى ارەكەت ەتۋدە. ەندى وسىنداي يگى ءىستىڭ باسىنا «نۇر وتان» پارتياسىنىڭ كەلىپ, قىزمەت اياسىن كەڭەيتۋىن ءوز باسىم جاقسىلىققا بالايمىن. پارتيا جانىنداعى قوعامدىق كەڭەس پەن پالاتانىڭ وڭىرلىك كەڭەس مۇشەلەرى ارقىلى كاسىپكەرلىكتىڭ دامۋىنا تىڭ سەرپىن بەرىلەدى دەپ سانايمىن», – دەدى «اتامەكەن» ۇكپ باسقارما توراعاسى ابىلاي مىرزاحمەتوۆ. ونلاين رەجىمدە وتكەن القالى جيىندا پارتيانىڭ وبلىس ورتالىقتارىنداعى فيليالدارى تىكەلەي بايلانىسقا شىعىپ, ايماقتارداعى كاسىپكەرلىك قىزمەتتىڭ جاي-كۇيىن باياندادى. اتاپ ايتقاندا, وڭتۇستىك قازاقستان وبلىستىق پارتيا فيليالى توراعاسىنىڭ ءبىرىنشى ورىنباسارى بولاتبەك قىستاۋوۆ, «اتامەكەن» ۇكپ اتىراۋ وبلىستىق وڭىرلىك كەڭەسىنىڭ توراعاسى اسىلبەك جاكيەۆ, الماتى وبلىسىنان جەكەمەنشىك «دانا» ءبىلىم بەرۋ كاسىپورنىنىڭ ديرەكتورى كۇلاندا باتىربەكوۆا ءسوز سويلەپ, ءوز كاسىپتەرىنىڭ جەتىستىكتەرى مەن كەزدەسكەن قيىندىقتاردى شەشۋدەگى تاجىريبەلەرىمەن ءبولىستى. ولار كاسىپكەرلىك قىزمەتتىڭ ءوسىپ-وركەندەۋىنە پارتيانىڭ تىزە قوسا ەڭبەك ەتىپ, ۇيلەسىمدى جۇمىسقا ۇندەۋىن قولدايتىندىقتارىن ءبىلدىردى. وسىدان كەيىن ءسوز العان «نۇر بەرەكە 555» جشس باس ديرەكتورى تاۋكەن كەڭەسبەك ۇلى ەلدىڭ جەتەكشى پارتياسى مەن ۇلتتىق پالاتانىڭ وسىنداي مەموراندۋم بەكىتۋى وتاندىق تاۋار وندىرۋشىلەردى قولداۋعا زور مۇمكىندىك بەرەتىندىگىن العا تارتتى. «ءبىز ءبىر عانا استانا قالاسىنىڭ وزىندە وتاندىق تاۋار وندىرۋشىلەردىڭ باسىن قوسۋعا ۇمتىلىپ وتىرمىز. كۇنى كەشە عانا «سامعاۋ» اتتى ساۋدا ءۇيىن اشىپ, زاماناۋي ۇلگىگە ساي 5 مىڭ شارشى مەتردى قۇرايتىن ساۋدا الاڭىن ىسكە قوستىق. ول جەردە 100-دەن اسا استانالىق كاسىپكەر ونىمدەرىن ساۋدالاۋدا. الداعى ۋاقىتتا 300 ءوندىرۋشى ءوز ونىمدەرىن قويۋعا نيەت تانىتۋدا. كەلەشەكتە بۇل باعىتتاعى كورسەتكىشىمىزدى 15 000 شارشى مەترگە جەتكىزۋدى كوزدەيمىز. وسىلايشا, قازىر شاشىراڭقى باعىتپەن دامىپ جاتقان وتاندىق تاۋار وندىرۋشىلەرىمىزدى ءبىر جەرگە توپتاستىرۋ ارقىلى ولاردىڭ نارىققا ەنۋى مەن تانىمالدىعىن ارتتىرعىمىز كەلەدى. ال ەندى وسى جۇمىسىمىزعا نۇروتاندىقتار قوسىلسا, كاسىپكەرلىك قىزمەتتىڭ دامۋى ارقىلى قوعامنىڭ الەۋمەتتىك جاعدايى جاقسارا تۇسەدى دەگەن سەنىمدەمىن», – دەدى ت.كەڭەسبەك ۇلى. نۇرلىبەك دوسىباي, «ەگەمەن قازاقستان»