Triathlon park استانادا اشىلدى

استانا قالاسىندا Astana Triathlon park اشىلدى. اشىلۋ سالتاناتىنا قالا اكىمى اسەت يسەكەشەۆ پەن BI Group باسشىسى ايدىن راحىمباەۆ قاتىستى. نىساننىڭ اشىلۋ سالتاناتىنا ار­نالعان ۆەلوجارىستى العاش بولىپ قالا اكىمى باستادى. ارتىنشا پاركتى ارالاپ, Street Workout الاڭىن تاماشالادى. وسىدان كەيىن ول بالالار الاڭىن, تەننيس كورتتارىن, جەڭىل اتلەتيكا مانەجىن تولىقتىرۋدى ۇسىندى. جاڭادان اشىلعان سپورت نىسانىنىڭ جالپى اۋماعى 45 گەكتاردى قۇرايدى. مۇندا جۇگىرۋگە, ۆەلوسيپەد سپورتىمەن اينالىسۋعا, سۋدا جۇزۋگە تولىق جاعداي جاسالعان. جوسپار بويىنشا, جاقىندا ترياتلونعا ارنالعان ەكى سەكتسيا اشىلادى. – بىزدە باس قالامىزعا ەرەكشە سىيلىق جاساۋ ءۇردىسى قالىپتاسىپ قالعان. ءبىر كەزدەرى كۇن ساعاتى, ەسكەرتكىشتەر, ساياباقتار بولعان ەدى. ەندى, مىنە, سپورت نىسانىن سىيعا تارتىپ وتىرمىز. مەنىڭ ويىمشا, سالاماتتى ءومىر سالتىن ۇستاناتىن جاندار ءۇشىن بۇل تاپتىرماس ورىن بولادى, – دەدى ايدىن راحىمباەۆ. سپورتتى جانىنداي جاقسى كورەتىن شەنەۋنىك, بۇرىنعى قارجى ءمينيسترى, قازاقستان دامۋ بانكىنىڭ جەتەكشىسى بولات جامىشەۆ كوپشىلىكتىڭ اتىنان بۇل ىسكە اتسالىسقاندارعا العىسىن ءبىلدىردى. ايان ءابدۋالي, «ەگەمەن قازاقستان»