ەلوردا كۇنىنە ارنالعان شاتتىققا تولى شارالاردىڭ ءبىر لەگى «جەرۇيىق» ساياباعىندا جالعاسىن تاپتى. وندا كيىز ۇيلەر بوي كوتەرىپ, ۇلى دالا حالقىنىڭ باستى سۋسىنى قىمىزعا ارنالعان «قىمىزمۇرىندىق» حالىقارالىق ەتنوگرافيالىق فەستيۆالى وتكىزىلدى.
ايتا كەتەيىك, قالادا 1992 جىلدان باستاپ وتكىزىلىپ كەلە جاتقان بۇگىنگى ەتنوگرافيالىق مەرەكەنىڭ تاقىرىبى ەل تاۋەلسىزدىگىنىڭ 25 جىلدىعى مەن ەكسپو-2017 كورمەسى بولدى. ونى وتكىزۋ يدەياسى ەلىمىزدىڭ وزگە وڭىرلەرىندە الماتى, پاۆلودار, تاراز, شىمكەنت جانە باسقا قالالاردا دا قولداۋ تاپتى.
بىرنەشە كۇن بويى كوك شالعىندا ۇلتتىق ناقىشتا بەزەندىرىلگەن 10 كيىز ءۇي تىگىلىپ, مول داستارقان جايىلىپ, كوپشىلىككە ۇلتتىق تاعامدار: قۇرت, باۋىرساق, ىرىمشىك, شۇبات پەن قىمىز ۇسىنىلدى. ال كىرەبەرىستە قولدانبالى ونەر كورمەسى كۇتىپ تۇردى. سونىمەن قاتار, ەتنواۋىلدا التىباقاندار ورناتىلىپ, جىگىتتەر مەن قىزدار ساۋىق-سايران قۇرىپ, ءان ايتىپ, بالۋاندار كۇش سىناسىپ, شەبەرلىكتەرىن سىنعا سالدى.
فەستيۆالدىڭ اشىلۋ راسىمىندە قىمىزدى ناسيحاتتاۋعا ارنالعان تەاترلاندىرىلعان قويىلىم كورسەتىلدى. مۇنىمەن قوسا, كەلۋشىلەر شارا بارىسىندا قىمىز تۋرالى ءبىلىمىن تەكسەرىپ, قىمىز ىشۋدەن جارىسىپ, قول كۇرەس, ارقان تارتۋ جانە ت.ب. سايىستاردى تاماشالادى.
استانا كۇنىنە وراي ۇيىمداستىرىلعان ايتۋلى شاراعا كورشىلەس قىرعىزستان, ومبى, التاي, ياكۋتيا سىندى ۇلتتىق سۋسىندى دارىپتەۋشى ايماقتاردىڭ وكىلدەرى دە كەلدى.
«ءبىز استاناعا جەتۋ ءۇشىن 18 ساعات بويى ۇشتىق. وزىمىزبەن بىرگە كەرەمەت قىمىز الىپ كەلدىك. فەستيۆال بارىسىندا حالىققا ءوز سۋسىنىمىزدى ۇسىنىپ, قالىڭدىقتى كيىندىرۋ ءداستۇرىن كورسەتپەكشىمىز. سونىمەن بىرگە, ارتىستەرىمىز حومۋز دەپ اتالاتىن ۇلتتىق اسپاپتا وينايدى», – دەدى ياكۋتيادان كەلگەن مەيمان يانا يگناتەۆا.
وتكىزىلىپ كەلە جاتقانىنا 24 جىل بولعان فەستيۆال بيىل ءبىرىنشى رەت حالىقارالىق دارەجەدە ۇيىمداستىرىلىپ وتىرعانىن ايتا كەتسەك دەيمىز. سالت-ءداستۇر, ادەت-عۇرىپتى دارىپتەپ قانا قويماي, ۇلتتار دوستىعىنا دا يگى اسەرىن تيگىزەتىن, تاتۋلىققا ۇندەيتىن تاعىلىمدى شارا ونەرپازداردىڭ ونەرىمەن ءوز جالعاسىن تاپتى.
راۋان قايدار,
«ەگەمەن قازاقستان»
