*سىرت كوز – سىنشى

قازاقستاننىڭ مارتەبەسى جوعارى قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە سايلانۋىنا بايلانىس­تى ورتالىق ازيا مەملەكەتتەرىنىڭ ديپلوماتتارى دا ىزگى تىلەكتەرىن جەتكىزىپ جاتىر. بۇل ورىندى دا. ويتكەنى, قازاقستان رەسپۋبليكاسى ازيا توبى مەملەكەتتەرىنىڭ اتىنان اتالعان كەڭەسكە مۇشە بولىپ سايلاندى. چينار رۋسلاموۆا, تۇرىكمەنستاننىڭ قىتايداعى توتەنشە جانە وكىلەتتى ەلشىسى: – قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشە­لىگىنە سايلانۋىنا بايلانىستى مەن دە ءوز قۇت­تىقتاۋىمدى جەتكىزگىم كەلەدى. قازاق حالقى تۇرىكمەندەرمەن باۋىرلاس, دوس, تۋىس. ءبىزدى تەك شەكارا عانا ءبولىپ تۇر. ال, شىن مانىندە ءبىز ءبىر حالىقپىز. مىڭداعان جىلداردان بەرى بىرگە تاتۋ-ءتاتتى ءومىر ءسۇرىپ كەلەمىز. سون­دىق­تان, قازاقستاننىڭ بىرىككەن ۇلتتار ۇيىمى كەڭەسىنە مۇشە بولۋىن ءبىز دە زور قۋانىش­پەن قابىلدادىق. بۇل قازاق ەلىنىڭ الەمدىك دەڭگەيدە مارتەبەسىنىڭ بيىك ەكەندىگىن تاعى ءبىر كورسەتىپ بەردى. شىنىن ايتۋ كەرەك, قازاقستان ءار ۋاقىتتا بەيبىتشىلىكتى, تۇراقتىلىقتى ىنتىماق­تاس­تىقتى باسىم باعىت رەتىندە ۇستانىپ كەلەدى. تاۋەلسىز قازاق ەلىنىڭ وسىنداي سىندارلى سايا­ساتىنا كورشىلەس جاتقان ازيا مەملەكەتتەرى عانا ەمەس, الەمدەگى باسقا دا بەيبىتشىل مەملەكەتتەر قولداۋ ءبىلدىرىپ وتىر. تۇرىكمەنستاندا قازاق دياسپوراسى كوپ. ماسەلەن, ءبىزدىڭ وتباسى قازاق حالقىنىڭ سالت-داستۇرىمەن جاقسى تانىس. قازاقتاردى قوناققا شاقىرعان كەزدە, مىندەتتى تۇردە ءبارىمىزدىڭ سۇيىكتى اسىمىزعا اينالعان قازاقشا اسىلعان ەتتى الدىنا تارتامىز. ال تۇرىكمەنستاندا تۇراتىن باۋىرلارىمىز ءبىزدىڭ ۇلتتىق تاعامدارىمىزدى دايىنداۋدىڭ قىر-سىرىن جاقسى بىلەدى. قازاقستان مەن تۇرىكمەنستان اراسىندا ەكو­نوميكالىق بايلانىس وتە جاقسى. بۇل رەتتە قازاقستان – تۇرىكمەنستان – يران ارا­سىنداعى ترانسۇلتتىق تەمىرجولى ىنتى­ماق­تاستىعىمىزدى ودان ءارى كەڭەيتە ءتۇستى. ەندى پارسى شىعاناعىمەن قىتايدىڭ نارىعىنا تىكەلەي شىعۋعا مۇمكىندىك الدىق. باۋىرلاس ەلدەر اراسىنداعى ءوزارا ىنتىماقتاستىق قارىم-قاتىناس الداعى ۋاقىتتا دا دامي بەرەتىنىنە سەنىمىم مول. قانايىم باقتىعۋلوۆا, قىرعىز رەسپۋبليكاسىنىڭ قىتايداعى توتەنشە جانە وكىلەتتى ەلشىسى: – قازاقستاننىڭ جوعارى وكىلەتتى ورگان­عا سايلانۋى پرەزيدەنت نۇرسۇلتان نازارباەۆ­تىڭ حالىقارالىق بەدەل-ابىرويىنىڭ اسقاق ەكەندىگىنىڭ ايقىن كورىنىسى. نۇرسۇلتان نازارباەۆتىڭ كورەگەن باسشىلىعىنىڭ ارقا­سىندا قازاقستان الەمدىك قاۋىپسىزدىك پەن بەي­بىتشىلىكتى قامتاماسىز ەتۋ باعىتىندا باتىل قادامدار جاساپ كەلەدى. سوندىق­تان, قازاق­ستاننىڭ وسىنداي ساياساتىنا كور­شى­لەس جاتقان ەلدەر دە ءاردايىم قولداۋ بىلدىرەدى. بىرىككەن ۇلتتار ۇيىمى قاۋىپسىزدىك كەڭەسى­نىڭ تۇراقتى ەمەس مۇشەلىگىنە سايلاۋ بولعان كەزدە قىرعىز رەسپۋبليكاسىنىڭ قازاقستاندى قولداپ, داۋىس بەرۋىنىڭ ءمانىسى دە وسى. قازاق ەلىنىڭ باسشىسى نۇرسۇلتان نازارباەۆتىڭ باستاماسىمەن قازاقستان ءاردايىم الەمدىك دەڭگەيدەگى وزەكتى ماسە­لەلەردى كوتەرىپ كەلەدى. ماسەلەن, سەمەي يادرولىق پوليگونىنىڭ جابىلۋى, ورتا ازيا ايماعىندا يادرولىق سىناقتاردى توقتاتۋ جونىندەگى كەلىسىم, بىرىككەن ۇلتتار ۇيىمىنىڭ بەيبىتشىلىكتى قالىپتاستىرۋ تۋرالى جالپىعا ورتاق دەكلاراتسياسىنىڭ قابىلدانۋى جانە باسقا دا بەيبىتشىلىك باعىتتاعى ماڭىزدى شەشىمدەردىڭ جۇزەگە اسۋى, مىنە, مۇنىڭ ءبارى قازاقستان تاراپىنان يگى قادام ەدى. وسىنداي سىندارلى ساياسات­تىڭ ناتيجەسىندە قازاقستاننىڭ بەدەلى حالىقارالىق كەڭىستىكتە ودان ءارى نىعايا ءتۇستى. ەندى قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشە­لىگىنە سايلانۋىنا بايلانىستى وسى باعىتتاعى اۋقىمدى جۇمىستاردىڭ جالعاسا بەرەتىندىگى ءسوزسىز. پارۆيز داۆلاتزودا, تاجىكستاننىڭ قىتايداعى توتەنشە جانە وكىلەتتى ەلشىسى: – ايتۋلى وقيعاعا بايلانىستى قازاقستان حالقىن شىن جۇرەكتەن قۇتتىقتايمىن. شىنىندا دا بۇل مەرەيلى مارتەبە. مۇنى ءبىز دە اسىعا كۇتكەن ەدىك. ەندى قازاقستان بارلىق ورتالىق ازيا مەملەكەتتەرىمەن, ونىڭ ىشىندە تاجىكستان دا بار, ستراتەگيالىق ارىپتەستىكتى ساقتاي وتىرىپ, جاڭا بيىكتەرگە ۇمتىلاتىنى ءسوزسىز. بۇل رەتتە قازاقستان بىرىككەن ۇلتتار ۇيىمىنىڭ قاۋىپسىزدىك كەڭەسىندە ءبىزدىڭ ايماقتىڭ مۇددەسىن لايىقتى قورعاي الاتىنىنا كامىل سەنەمىن. ويتكەنى, ءدال قازىرگى ساتتە ءبىزدىڭ ەلدە قاۋىپسىزدىك پەن تۇراقتىلىقتى قامتاماسىز ەتۋ ەڭ قاجەت جانە وزەكتى ماسەلە بولىپ وتىر.  جازىپ العان سادىق اكىجانوۆ, «ەگەمەن قازاقستان» – بەيجىڭنەن قىتاي حالىق رەسپۋبليكاسى