قازاقستان قور بيرجاسىندا ساۋدا-ساتتىق 64,4 پايىزعا ارتتى

«قازاقستان قور بيرجاسى» اكتسيونەرلىك قوعامى (KASE) 2016 جىلدىڭ ءبىرىنشى جارتى جىلدىعىنىڭ قورىتىندىسىن جاسادى. اكتسيالار نارىعىندا ساۋدا-ساتتىق كولەمى وتكەن جىلدىڭ سايكەس كەزەڭىمەن سالىستىرعاندا ايتارلىقتاي 64,4 پايىزعا ارتتى. KASE يندەكسى جىلدىڭ باسىنان بەرى 14,7 پايىزعا (جىلدىق 29,4 پايىز) ءوستى. سونىمەن قاتار, جەكە تۇلعا-ينۆەستورلاردىڭ اكتسيالار نارىعىندا بەلسەندىلىك بايقالادى. قازاقستان قور بيرجاسىندا 22 ەميتەنتتىڭ 23 باعالى قاعازى ليستينگىلەۋ راسىمىنەن ءوتتى. سول سياقتى, «اقتوبە مەتالل قۇرىلىمدار زاۆودى» اكتسيونەرلىك قوعامى جاي اكتسيالارى قازاقستان قور بيرجاسىندا 2016 جىلدىڭ شىلدە ايىندا وتەتىن IPO اياسىندا ينۆەستورلارعا ۇسىنىلماق. قازاقستاندىق قور بيرجاسىنىڭ جۇمىسىن قىسقا قورىتىندىلاعاندا, بيرجالىق ساۋدا-ساتتىق كولەمى 2016 جىلدىڭ التى ايىندا 49,2 ترلن. تەڭگەنى قۇرادى, ول وتكەن جىلدىڭ سايكەس كەزەڭىمەن سالىستىرعاندا (47,7 ترلن تەڭگە) 1,5 ترلن. تەڭگەگە نەمەسە 3,1 پايىزعا ارتقان. اكتسيالار نارىعىنداعى ساۋدا-ساتتىق كولەمى – 80,4 ملرد تەڭگە, وتكەن جىلدىڭ سايكەس كەزەڭىمەن سالىستىرعاندا ءوسىم 64,4 پايىزعا نەمەسە 31,5 ملرد. تەڭگەگە ارتقان, وسىلايشا ينۆەستورلاردىڭ تەڭگەلىك اكتيۆتەرگە سۇرانىسى ارتىپ وتىرعاندىعى بايقالادى. كەرىسىنشە كورپوراتيۆتىك وبليگاتسيالار نارىعى ەسەپتىك كەزەڭدە ساۋدا-ساتتىق كولەمى 2015 جىلدىڭ ءبىرىنشى جارتىجىلدىعىمەن سالىستىرعاندا ايتارلىقتاي تومەندەپ, 191,8 ملرد. تەڭگەنى قۇرادى. ونىڭ باستى سەبەبى – ۇلتتىق بانكتىڭ بازالىق مولشەرلەمەسىنىڭ جاڭا دەڭگەيىنە سايكەس تەڭگەلىك قوردىڭ بىردەن قىمباتتاۋىنا بايلانىستى. مەملەكەتتىك باعالى قاعازدار (مبق) نارىعىندا ساۋدا-ساتتىق كولەمى 2015 جىلدىڭ ءبىرىنشى جارتىجىلدىعىمەن سالىستىرعاندا, 334 ملرد. تەڭگەنى قۇراپ, 43,4 ملرد. تەڭگەگە نەمەسە 14,9  پايىزعا ارتتى. شەتەلدىك ۆاليۋتالار نارىعىنا كەلسەك,  وسى جارتىجىلداقتا ساۋدا-ساتتىق جيىنتىق كولەمى 19,3 ترلن. تەڭگە, وتكەن جىلدىڭ سايكەس كەزەڭىمەن سالىستىرعاندا 46,8 پايىز تومەندەدى. رەپو وپەراتسيالارىنىڭ نارىعىندا ساۋدا-ساتتىق كولەمى وتكەن جىلدىڭ سايكەس كەزەڭىمەن سالىستىرعاندا 2,8 ەسە ارتىپ, 29,3 ترلن. تەڭگەنى قۇرادى. تەڭگەنىڭ دوللارعا قاتىستى نىعايۋى جاعدايىندا رەپو وپەراتسيالارىن قاتىسۋشىلارعا دوللارلىق سۆوپ وپەراتسيالارىمەن الماستىردى. ايناش ەسالي