كازگۋ-ءدىڭ قالاشىعى كەيىن وزگە فاكۋلتەتتەردىڭ جاتاقحانالارىمەن جانە وقۋ عيماراتتارىمەن تولىعا ءتۇستى. جەتپىسىنشى-سەكسەنىنشى جىلداردىڭ جاستارى مەن ستۋدەنتتەرى ماماندىقتارى مەن فاكۋلتەتتەرىنىڭ ءارتۇرلى بولعانىنا قاراماستان, ءبىر-بىرىمەن ميداي ارالاسىپ جاتاتىن. ءبىر-بىرىمەن تەز تانىسىپ, تەز تابىساتىن. مۇنداي ادەت, اسىرەسە, قالاشىقتاعى جاتاقحانادا تۇراتىن ستۋدەنتتەرگە كوبىرەك ءتان بولاتىن.
سونداي كەزدە ءبىزدىڭ تانىسىپ, كەيىننەن جاقسى دوس, جولداس بولىپ كەتكەن زامانداسىمىز – ونىنشى جاتاقحانادا تۇراتىن زاڭ فاكۋلتەتىنىڭ ستۋدەنتى ماقسۇتحان احمەتوۆ ەدى. سول كەزدە-اق تاۋ قوزعالسا قوزعالمايتىن, سالماقتى, ورنىقتى مىنەزدى, دوس-جولداستارىنا دەگەن كەڭپەيىل كوڭىلى مەن دوستىققا ادالدىعى ونىڭ ادامگەرشىلىك بەينەسىن تۇعىرلاندىرا تۇسەتىنىن بايقايتىنبىز. قازاق پوەزياسىنىڭ پاتريارحى, مارقۇم قادىر مىرزا ءالى ءبىر ولەڭىن بىلايشا ورنەكتەپتى: «و باستان-اق جارات, مەيلىڭ, جاراتپا, بال قوسساڭ دا بارمايدى اۋزىم شاراپقا. سەرى بولىپ قۇمارتپادىم شىلىمعا, سۇلۋلارعا جوق ەدىم مەن بۇرىن دا».
مىنە, وسى قادەكەڭ ايتقانداي, ماقسۇتحان اراق-شاراپقا دا, شىلىمعا دا اۋەس بولمادى. كەرىسىنشە, اشىعىن ايتقاندا, ول كەزدىڭ ستۋدەنتتەرى ىڭعايى كەلىپ تۇرعاندا بىرەر ساپتىاياق سىرانى سىمىرە سالۋدان باس تارتپايتىن. ول ۋاقىتىنىڭ دەنىن پۋشكين كىتاپحاناسىندا, قالا بەردى ۋنيۆەرسيتەتتىڭ سپورت زالىندا وتكىزەتىن. اق تەر, كوك تەر بولىپ اۋىر اتلەتيكانىڭ پاتشاسى – ءزىل تەمىر كوتەرۋمەن شۇعىلدانىپ, سپورتتىڭ بۇل ءتۇرى بويىنشا ءتاپ-ءتاۋىر ناتيجەگە جەتكەنى دە ۇمىتىلا قويعان جوق. ول بەس جىل بويى ونىنشى جاتاقحاناداعى ستۋدەنتتىك كەڭەستىڭ توراعاسى بولدى. بەسىنشى مەن ونىنشى جاتاقحانانىڭ اراسى تاياق تاستامداي عانا. ەكەۋىنىڭ اراسىن سايعا تۇسكەندەي تومەندە جاتقان جاياۋ جول عانا ءبولىپ تۇراتىن.
ءبىزدىڭ بايقاعانىمىز, ول بۇل قوعامدىق جۇمىسىندا ءوزىن جاتاقحانادا تۇراتىندارعا سىيلاتتىرا بىلگەندىگى. بىرەۋمەن ارتىق-اۋىز سوزگە كەلىپ كەرىلدەسىپ تۇرعانىن ەستىمەپپىز دە, كورمەپپىز دە. كەرىسىنشە زامانى ءبىر, جاستارى قاتارلاس جوعارى جانە تومەنگى كۋرس ستۋدەنتتەرى ونىڭ ايتقانىن جەرگە تاستامايتىنىنا دا تالاي مارتە كۋا بولعانبىز. قالاشىقتاعى جاتاقحانالاردىڭ سەكتسيالىق بولىگى ەكى جانە ءۇش ادامدىق ورىنداردان تۇراتىن. ولار ۇشەۋ ەدى. ءبىرىنشىسى – بۇگىنگى كەيىپكەرىمىز ماقسۇتحان احمەتوۆ, جوعارىدا ايتىلعانداي, جاتاقحاناداعى ستۋدەنتتىك كەڭەستىڭ توراعاسى بولسا, ەكىنشىسى – سارسەنباي داۋلەتوۆ جەتپىسىنشى جىلداردىڭ ستۋدەنتتەرىن تارتىپكە باعىتتاي بىلگەن جەدەل كومسومول درۋجيناسىنىڭ كومانديرى. وسىناۋ قوعامدىق ستۋدەنتتىك قۇرىلىم كەزىندە وكد دەگەن اتپەن كەڭ تانىمال بولدى. ءۇشىنشىسى – دوس-جولداستارى اراسىندا ءازىل-قالجىڭى جاراسقان, كوڭىلى قاشاندا اشىق-جارقىن, كىم-كىمدى دە جاتىرقاماي باۋىرىنا تارتا بىلەتىن بولاشاق زاڭگەر باقتيار بايمۋرزين بولاتىن.
ول ءوزىن توراعا مەن كومانديردىڭ ورتاسىنداعى «جايىن جاسپىن» دەپ اتايتىن. ءبىزدى كوكشەتاۋدىڭ سىرباز جىگىتى ماقسۇتحانمەن تانىستىرعان دا وسى ورالدىق جىگىت باقتيار ەدى. ماقسۇتحان احمەتوۆتىڭ بويىنداعى تاپسىرىلعان ىسكە دەگەن جاۋاپكەرشىلىك, ءوزىنىڭ بولاشاق ماماندىعىنا دەگەن ادالدىق, تاباندىلىق پەن تىندىرىمدىلىق, ايتقان سوزىندە تۇرا ءبىلۋ سەكىلدى بيىك ادامگەرشىلىك قاسيەتتەر ستۋدەنتتىك كەزدە تولىق قالىپتاسىپ ۇلگەرگەن. 1982 جىلى قازاق مەملەكەتتىك ۋنيۆەرسيتەتىنىڭ زاڭ فاكۋلتەتىن اياقتاعاننان كەيىن ول جاس مامان رەتىندە ءوزىنىڭ «كەربەز سۇلۋ – كوكشەتاۋىنا» قاراي باعىت الدى. ول مۇندا پروكۋراتۋرا, سوت ورگاندارىنا قىزمەتكە ورنالاسقاننان كەيىن ءوز ماماندىعىن قولدىڭ بەس ساۋساعىنداي جەتىك مەڭگەرگەن, كاسىبي دەڭگەيى تەرەڭ, بىلىكتىلىگى جوعارى زاڭگەر رەتىندە كورسەتە بىلگەنىن, ۇزدىك سۋديا اتانعانىن ەستىپ جۇردىك. ماقسۇتحاننىڭ جەتىستىكتەرىنە ءوز جەتىستىگىمىزدەي قۋاندىق.
ول شورتاندى اۋداندىق سوتىنىڭ توراعاسى بولىپ تاعايىندالعان كەزدە قۇتتىقتاپ, شىنايى دوستىق كوڭىلىمىز بەن پەيىلىمىزدى بىلدىردىك. ول بۇعان بالاشا قۋانىپ, ريزاشىلىعىن جەتكىزدى. ماقسۇتحان ءسالىم ۇلى بۇگىندە اقمولا وبلىسىنداعى ستەپنوگورسك قالالىق سوتىنىڭ توراعاسى قىزمەتىن ابىرويمەن اتقارىپ ءجۇر. ول قاي كەزدە دە, قانداي جاعدايدا دا ازاماتتىق بيىكتەن الاسارىپ كورگەن جوق. كەربەز سۇلۋ كوكشەتاۋدىڭ تابيعاتى تاماشا, اتاۋى دا ايىرىقشا كورنەكتى دەگەن اۋىلىندا تۋىپ-وسكەن, ءبىر كەزدەگى ستۋدەنتتىك دوس بۇگىنگى كۇنى رەسپۋبليكامىزداعى سوت جۇيەسىنىڭ بەلدى ءبىر وكىلى.
تەمىر قۇسايىن, «ەگەمەن قازاقستان» باتىس قازاقستان وبلىسى سۋرەتتە: ماقسۇتحان احمەتوۆ
