يسەكەشەۆ ىسكە كىرىستى

استانا اكىمى اسەت يسەكەشەۆ ءوزىنىڭ جاڭا قىزمەتىنە كىرىسكەن كۇن­نەن باستاپ باس قالانىڭ بارلىق اۋداندارىن ارالاپ, تىرشىلىكتى قام­تاماسىز ەتۋدىڭ تىرەكتى نىساندارىمەن تانىستى.  شاھار باسشىسى ەڭ الدىمەن وسى ۋاقىتقا دەيىن تالاي سىننىڭ ايتىلۋىنا ارقاۋ بولعان اتىشۋلى تالدىكولگە ات­­باسىن بۇردى. قاتتىراق جەل سوققان­دا قولقانى قابار جاعىمسىز ءيىس ەلور­دالىقتارعا ەداۋىر قولايسىزدىقتار تۋدىراتىنى تۋرالى جايسىزداۋ اڭگىمەنىڭ اركەز كوتەرىلىپ جۇرگەنى جاسىرىن ەمەس. –  بۇل ماسەلەنى ۇدايى نازاردا ۇس­تاي­تىن بولامىز. ەلباسىنىڭ وسىعان باي­لانىستى تاپسىرماسى بەلگىلەنگەن مەرزىمىندە ءارى مۇلتىكسىز ورىندالۋعا ءتيىس, – دەدى ول توقسان اۋىز ءسوزدىڭ توبىقتاي ءتۇيىنىن ايتىپ. سول ارادا جۇمىس جۇرگىزىپ جاتقاندار اكىمگە كولدى قۇرعاتۋ باعىتىندا باسى قايىرىلعان شارۋالاردىڭ بارىسىن بايانداپ بەردى. بۇل رەتتە, اسىرەسە, لاس سۋدى تازالايتىن قوسىمشا قوندىرعىلار ورناتۋ مەن توزعان توراپتاردى قايتا جوندەۋگە ايرىقشا نازار اۋدارىلۋدا ەكەن. بىلتىردان بەرى مۇندا قالانىڭ قالدىق سۋلارىن جىبەرۋ توقتاتىلعان. وسى جىلدىڭ اياعىنا قاراي كولدىڭ تابانى تەگىس تازارتىلماق. ەلوردا مەرى, سونداي-اق, استانالىق­تاردىڭ كۇندەلىكتى تۇرمىسىندا ايتار­لىقتاي ورىن الاتىن ەكىنشى جانە ءۇشىنشى جىلۋ ەنەرگەتيكالىق ورتالىقتارىنا بارىپ, الداعى جىلىتۋ ماۋسىمىنا دايىندىق دەڭگەيىن تەكسەردى. اتالمىش كاسىپورىن جەتەكشىلەرىنىڭ ايتۋىنا قا­راعاندا, ەكىنشى جەو-دا قىر استىنداعى قىس تۇسكەنشە №5, 6, 7 قازاندىق اگرەگاتتارىن ىسكە قوسۋ جوسپارلانىپ وتىرعان كورىنەدى. ەگەر وسى جوبا ويداعىداي جۇزەگە اسسا, جالپى جىلۋ بەرۋ مۇمكىندىگى 400 گ-كالعا شەيىن ارتپاق. ال ءۇشىنشى جەو-نىڭ ءبىرىنشى كەزەگىن سالۋ جۇمىستارى كەستەگە سايكەس جالعاسۋدا. استانا قالالىق ەنەرگەتيكا باسقار­ماسىنىڭ باسشىسى باقتىبەك جاپاەۆتىڭ سوزىنە سەنسەك, كاسىپورىننىڭ تاپقان, تايان­عان تابىسى تولىقتاي ينۆەستيتسيالىق باعدارلامالاردى ورىنداۋعا جۇمسالادى. دەمەك, بۇلار ءوزىن ءوزى قامتاماسىز ەتەتىن­دىكتەن, بيۋدجەت قارجىسى شىعىندالمايدى. ونىڭ ۇستىنە ءۇشىنشى جەو-نىڭ ەكىنشى كەزەگى مەملەكەت-جەكە مەنشىك ارىپتەستىگى اياسىندا پايدالانۋعا بەرىلمەك. ەنەرگەتيكتەرمەن اڭگىمە كەزىندە ءا.يسە­كەشەۆ قۋات كوزدەرىنىڭ قۇرىلىسىن جۇرگىزۋ مەن قايتا جاراقتاندىرۋ­دىڭ كەز كەلگەن قالا ءۇشىن ستراتەگيالىق زور ماڭىزى بارىن, ال ەلوردادا ونىڭ قاجەتتىلىگى تىپتەن ارتا تۇسەتىندىگىن اتاپ ءوتتى. ويتكەنى, قازىر ەكىنشى جانە ءۇشىنشى جەو-داعى اۋقىمدى ىستەر اياقتالسا, جىلۋ جەتىسپەۋشىلىگىن جاۋىپ, استانانى ۇزدىكسىز ەنەرگيامەن قامتاماسىز ەتۋگە جان-جاقتى جاعداي جاسالاتىن بولادى. تابيعاتتىڭ تاسىر مىنەز تانىتۋى سەبەپتى كەيىنگى كۇندەرى استانانىڭ كوم­مۋنالدىق قىزمەتتەرى كۇشەيتىلگەن رە­جىمگە كوشىرىلدى. تولاسسىز جاۋعان جاڭبىر سالدارىنان كەيبىر كوشەلەر كولكىپ كەتتى. وسىعان وراي اكىم اسەت يسەكەشەۆ سۋ باسۋ­دىڭ سالدارىن جويۋ جونىندە جەدەل كەڭەس وتكىزىپ, بارلىق كۇشتەردى ورتاق ماق­ساتقا جۇمىلدىرۋدى تاپسىردى. ازىرگە اسپان قاباعىنىڭ اشىلاتىن ءتۇرى بايقالماي تۇر. الدىمىزدا ايتۋلى مەرەكە – استانا كۇنى تويلانباق. وعان ازىرلىك شارىقتاۋ شەگىنە جەتكەنى امبەگە ايان. ەندەشە, ەلوردا باسشىسىنىڭ قالانىڭ قاربالاس تىرلىگىنەن ءبىر ءسات بوي تارتىپ, ەنتىگىن باسۋىنا ۋاقىتى جوق ەكەندىگى تالاس تۋدىرماسا كەرەك. تالعات باتىرحان, «ەگەمەن قازاقستان»