كاسىپورىن تەمىرجولدىڭ دوڭگەلەكتەرىن شىعارىپ جاتىر

قازىرگى كەزدە ەلىمىزدە مەملەكەت باسشىسىنىڭ «100 ناقتى قادام» ۇلت جوسپارىن ىسكە اسىرۋ ماقساتىندا كوپتەگەن جۇمىستار جاسالىنىپ جاتىر. ءوندىرىس ورىندارىندا, ونەركاسىپتە ءبىراز ماڭىزدى جۇمىستار قولعا الىندى. سولاردىڭ ءبىرى – تەمىرجول دوڭگەلەكتەرىن شىعارۋمەن اينالىساتىن «پرومماشكومپلەكت» جشس 2017 جىلدىڭ ەكىنشى جارتىسىندا ءوندىرىستى 1,7 ەسەگە ارتتىرۋدى جوسپارلاپ وتىر. قولدا بار مالىمەتتەرگە قاراعاندا, وسى جوبامەن «بايتەرەك» اق حولدينگىنىڭ ەنشىلەس ۇيىمى «قازاقستاننىڭ دامۋ بانكى» اق اينالىسۋدا. بانك جوبانى 2015 جىلدىڭ شىلدە ايىنان قارجىلاندىرا باستادى. بۇل جوبا ەلىمىزدى يندۋستريالىق-يننوۆاتسيالىق دامىتۋدىڭ 2015 – 2019 جىلدارعا ارنالعان مەملەكەتتىك باعدارلاماسى اياسىندا جۇزەگە اسىرىلماق. ونىڭ جالپى قۇنى – 50,9 ملرد. تەڭگە. وسى سومانىڭ 71 پايىزى قازاقستاننىڭ دامۋ بانكى تاراپىنان قارجىلاندىرىلادى. بانك ارينە, اقشانى قارىزعا بەرەدى. قارىزدى وتەۋ مەرزىمى 19 جىلعا دەيىن. بۇگىنگى تاڭدا بانكتىڭ نەسيەلەۋگە بەرگەن قارجىسى 90 پايىزعا يگەرىلدى. كاسىپورىن تولىق جوبالىق قۋاتتىلىعىنا شىققاننان كەيىن ءونىمنىڭ 40 پايىزىنا دەيىن ىشكى نارىققا – نەگىزىنەن «قازاقستان تەمىر جولى» اق قاجەتتىلىگىنە, ال قالعان 60 پايىزى يران, ازەربايجان, رەسەي مەن تۇرىكمەنىستانعا ەكسپورتتالادى. قازىرگى ۋاقىتتا تەمىرجول دوڭگەلەكتەرى ءوندىرىسىنىڭ ورنىندا قايتا گازداندىرۋ ستانسالارىن ورناتۋ بويىنشا مونتاج جۇمىستارى باستالدى. قولدا بار دەرەكتەرگە قاراعاندا, بيىلعى جىلدىڭ سوڭىنا دەيىن ونەركاسىپتىك ماشينا كەشەنى كومپانياسىنا اۆستريا, گەرمانيا, چەحيا مەن پولشادان 4 000 توننا جوعارى تەحنولوگيالىق جابدىق جەتكىزىلەدى. داستان كەنجالين